അടിമാലി: മൂന്നാറിലേക്ക് എത്തുന്ന വിനോദസഞ്ചാരികള്ക്ക് കുളിരുപകരുന്ന കാഴ്ചയാണ് ആറ്റുകാട് വെള്ളച്ചാട്ടം. കൊച്ചി-മധുര ദേശീയ പാതയില് പള്ളിവാസലില് നിന്നും 2 കിലോമീറ്റര് ദൂരത്തില് ആറ്റുകാട് എസ്റ്റേറ്റ് റോഡിലാണ് ആറ്റുകാട് വെള്ളച്ചാട്ടം. ഫാക്ടറി ജംഗ്ഷനില് നിന്നും തേയിലത്തോട്ടങ്ങളിലൂടെ വളഞ്ഞപുളഞ്ഞ് റോഡ് എത്തുന്നത് വെള്ളച്ചാട്ടത്തിലേക്കാണ്. മൂന്നാറിലെ മൂന്ന് ആറുകള് ഏകോപിച്ച് ഹെഡ് വര്ക്ക് ഡാമിലെത്തുന്നു. അവിടെ നിന്നും ചെങ്കുത്തായ പറക്കെട്ടുകളില് കൂടി ഊര്ന്നിറങ്ങി മുതിരപ്പുഴയാറായി ആറ്റുകാട്ടിലെത്തുന്നു. മുതിരപ്പുഴയാറിന് കുറുകെയുള്ള ചെറുപാലത്തില് നിന്നാല് ആറ്റുകാടിന്റെ മനോഹാരിത ആസ്വദിക്കാനാകും. വിസ്തൃതമായ പാറക്കെട്ടുകളിലൂടെ ചിന്നിച്ചിതറിയെത്തുന്ന വെള്ളം മഞ്ഞ് പോലെ അന്തരീക്ഷത്തിലേക്ക് പരക്കുന്നു… ഈ ദൃശ്യമനോഹാരിത മനസ്സിലേക്കാവാഹിച്ച് വിനോദസഞ്ചാരികള് അക്ഷരാര്ത്ഥത്തില് വിസ്മയത്തുമ്പത്താകും.സാഹസികരായ ചെറുപ്പക്കാര് വിലക്കുകള് അവഗണിച്ച് പുഴയിലേക്ക് ഇറങ്ങുന്നത് നിരവധി അപകടങ്ങള്ക്ക് കാരണമായിട്ടുണ്ട്. വെള്ളം കുത്തിയൊഴുകി മിനുസമായ പാറയുടെ അപകടാവസ്ഥ തിരിച്ചറിയാതെ അപകടത്തില്പ്പെട്ട് നിരവധി ജീവനുകള് പുഴ തട്ടിയെടുത്തിട്ടുണ്ട്. ആയിരക്കണക്കിന് ടൂറിസ്റ്റുകളെത്തുന്ന ഇവിടെ അടിസ്ഥാന സുരക്ഷയൊരുക്കുന്നതിന് അധികാരികള്ക്ക് കഴിഞ്ഞിട്ടില്ല. ഈ ഭാഗത്ത് നിയന്ത്രണ വേലികളോ, അപായ മുന്നറിയിപ്പുകളോ ഒന്നും അധികൃതര് സ്ഥാപിച്ചിട്ടില്ല. പാലത്തിന്റെ കൈവരികള് പോലും പൊട്ടിപ്പൊളിഞ്ഞ അവസ്ഥയിലാണ്. പാലത്തിന് താഴ്ഭാഗത്തുള്ള ആഴമുള്ള കയത്തില്പെട്ടും വെള്ളത്തിന്റെ കുത്തൊഴിക്കില്പെട്ടുമാണ് ജീവനുകള് നഷ്ടപ്പെട്ടിട്ടുള്ളത്. എങ്കിലും ഗൗരകരമായ രീതിയില് അധികൃതര് പ്രശ്നത്തെ സമീപിച്ചിട്ടില്ല. ആധുനിക സംവിധാനങ്ങള് ഉപയോഗപ്പെടുത്തിസുരക്ഷക്രമീകരണങ്ങള് ഒരുക്കിയാല് വിനോദസഞ്ചാരികള്ക്ക് ഹൃദയത്തില് സൂക്ഷിക്കാന് ഒരുപിടി നല്ല ഓര്മ്മകള് സമ്മാനിക്കാന് ആറ്റുകാട് വെള്ളച്ചാട്ടത്തിനാകും.
സഞ്ചാരികളെ മാടിവിളിച്ച് ആറ്റുകാട് വെള്ളച്ചാട്ടം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.