കറുകച്ചാല്: ചമ്പക്കര ഉള്ളാട് കാവ് ഭാഗത്ത് നടപ്പുവഴി വൃത്തിയാക്കിക്കൊണ്ടിരുന്ന ഗൃഹനാഥനേയും കുടുബത്തേയും എസ്ഐ മര്ദ്ദിച്ചതായി പരാതി. ചമ്പക്കര മന്നം പറമ്പില് റൈജി(43), ഭാര്യ രജനി(39), മകള് ഡോണ(19) എന്നിവരെയാണ് മര്ദ്ദനമേറ്റ നിലയില് സ്വകാര്യ ആശുപത്രിയില് പ്രവേശിപ്പിച്ചത്.
നൂറോളം കുടുംബങ്ങള് ഉപയോഗിച്ചു വന്നിരുന്ന നാട്ടുവഴി നാട്ടുകാര് ഒന്നിച്ച് വൃത്തിയാക്കുമ്പോളാണ് സംഭവം. സമീപവാസി സ്ഥലം കൈയ്റുന്നതായി അറിയിച്ചതിനേ തുടര്ന്നെത്തിയ കറുകച്ചാല് എസ്ഐ ആര്. രാജീവ് റൈജിയെ മര്ദ്ദിക്കുകയായിരുന്നുവെന്ന് നാട്ടുകാര് പറയുന്നു.
ഇത് കണ്ട് ഒടിയെത്തി തടയാന് ശ്രമിച്ച ഭാര്യ രജനിയേയും മകള് ഡോണയേയും എസ്ഐ നിലത്തിട്ട് ചവിട്ടിയതായി ഇവര് പറയുന്നു. സ്ഥലം കൈയ്യേറുന്നതായി വിവരം സംബന്ധിച്ച് അന്വേഷിക്കുവാനായി എത്തിയ തന്നെ റൈജിയും സംഘവും അക്രമിക്കുകയായിരുന്നുവെന്നാണ് എസ്ഐ രാജീവ് പറയുന്നത്. യൂണിഫോമിന്റെ പോക്കറ്റും ഷോള്ഡര്ബാറും വലിച്ചു പറിച്ചതായും ഇദ്ദേഹം പറയുന്നു. പാമ്പാടി ഗവണ്മെന്റ് ആശുപത്രിയില് നിന്ന് എസ്ഐ പ്രാഥമിക ചികിത്സ തേടിയതായി അറിയുന്നു.
സംഭവത്തെ തുടര്ന്ന് കറുകച്ചാല് പോലീസ് സ്റ്റേഷന് പരിസരത്ത് വന്ജനാവലി തടിച്ചുകൂടി. നിയമങ്ങള് പാലിക്കാതേയും ധിക്കാരപരമായും പെരുമാറുന്ന എസ്ഐ രാജീവിനെതിരെ നടപടി വേണമെന്നാണ് നാട്ടുകാര് ആവശ്യപ്പെടുന്നത്. സ്കൂള് വിദ്യാര്ത്ഥിയേയും ദളിത് യുവാവിനേയും യാതൊരു പ്രകോപനവും കൂടാതെ മര്ദ്ദിച്ചതായി എസ്ഐക്കെതിരെ നേരത്തേയും പരാതികള് ഉണ്ടായിരുന്നു. റൈജിയും കുടുംബവും ആശുപത്രിയില് ചികിത്സയില് ആയതിനാല് ഇന്ഡിമേഷന് കിട്ടിയാല് ഉടന്തന്നെ ഇവരുടെ മൊഴിയെടുത്ത് കേസ് രജിസ്റ്റര് ചെയ്യുമെന്ന് വാകത്താനം സിഐ അനീഷ് വി. കോര പറഞ്ഞു.
