മറയൂര്‍: കോവില്‍കടവിലെ മദ്യവില്‍പ്പനശാല പൂട്ടണമെന്ന ആവശ്യവുമായി വനവാസി പെണ്‍ങ്കള്‍ ഒരുമൈ പ്രവര്‍ത്തകര്‍. ഇന്നലെ രാവിലെ ഇതുമായി ബന്ധപ്പെട്ട് കോവില്‍കടവില്‍ പ്രവര്‍ത്തിക്കുന്ന ബിവറേജസ് കോര്‍പ്പറേഷന്റെ ചില്ലറ വില്‍പ്പനശാല നൂറോളം വരുന്ന വനവാസി സ്ത്രീകള്‍ ഉപരോധിച്ചു. കാന്തല്ലൂര്‍ ഗ്രാമ പഞ്ചായത്തിലെ വനവാസി വനിത അംഗങ്ങളായ രേവതി, വനിത എന്നിവരുടെ നേതൃത്വത്തിലുള്ള സംഘമാണ് ഉപരോധത്തിന് എത്തിയത്. കൈകുഞ്ഞുങ്ങളടക്കം നിരവധി കുട്ടികളും ഉപരോധത്തില്‍ പങ്കെടുത്തു. ഉപരോധം പൊങ്കപ്പള്ളികുടിയിലെ രാധാകൃഷ്ണന്‍ ഉദ്ഘാടനം ചെയ്തു. വനവാസി കുടികളില്‍ മദ്യത്തിന്റെ ഉപഭോഗം നാള്‍ക്കുനാള്‍ കൂടിവരുന്നതായും സ്ത്രീകളും കുട്ടികളുമാണ് ഇതിന്റെ പരിണിതഫലങ്ങള്‍ അനുഭവിക്കുന്നതെന്നും സംഘാടകര്‍ പറയുന്നു. പ്രദേശത്തെ ഏക മദ്യ വില്‍പ്പനശാല അടച്ചാല്‍ ഈ സാഹചര്യത്തിന് മാറ്റം വരുമെന്ന് ഇവര്‍ പറയുന്നു. മദ്യവില്‍പ്പന ശാല ബലം പ്രയോഗിച്ച് അടയ്‌ക്കാനുള്ള ശ്രമം മറയൂര്‍ എസ്‌ഐ വിഎസ് ഹരിയുടെ നേതൃത്വത്തിലുള്ള പോലീസ് സംഘം തടഞ്ഞു. പൊങ്കപ്പള്ളി, ദണ്ഡ്‌കൊമ്പ്, മുനിയറ എന്നീ ഗ്രാമങ്ങളില്‍ നിന്നുള്ള സ്ത്രീകളും ഉപരോധത്തില്‍ പങ്കെടുത്തു. മദ്യവില്‍പ്പനശാല പൂട്ടുന്നത് വരെ ശക്തമായ സമരവുമായി മുന്നോട്ട് പോകുമെന്നും പെണ്‍ങ്കള്‍ ഒരുമൈ നേതാക്കള്‍ പറഞ്ഞു.
മദ്യവില്‍പ്പനശാല പൂട്ടണമെന്ന് വനവാസി പെണ്‍കള്‍ ഒരുമൈ
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.