പയ്യന്നൂര്: കടന്നപ്പള്ളി-പാണപ്പുഴ പഞ്ചായത്തിലെ പത്താംവാര്ഡിലെ കൂളിക്കുന്ന് മണ്ണിടിക്കല് ലോബികളാല് നാമാവശേഷമായി. പ്രകൃതിയുടെ വരദാനമായി നാല്പതു മീറ്ററോളം ഉയരത്തില് രണ്ട് ഏക്കര് വിസ്തൃതിയില് നാടിന്റെ പാരിസ്ഥിതിക സന്തുലിതാവസ്ഥ നിലനിര്ത്തിയിരുന്ന കൂളിക്കുന്ന് കേവലം ഒരുവര്ഷം കൊണ്ടാണ് മണ്ണിടിച്ച് കടത്തി ഇല്ലാതാക്കിയത്.
ജനശ്രദ്ധ തിരിയാതിരിക്കാന് കുന്നിന്റെ കവാടം ഭാഗം നിലനിര്ത്തിക്കൊണ്ട് ആസൂത്രിതമായാണ് മണ്ണെടുപ്പ് നടന്നത്. വില്ലേജ് അധികാരികള് പലപ്രാവശ്യം മണ്ണിടിക്കല് നിര്ത്തിയെങ്കിലും അവധി ദിനങ്ങളില് മണ്ണെടുപ്പ് യന്ത്രസഹായത്തോടെ ടിപ്പറുകളില് നടത്തുകയായിരുന്നു.
ജില്ലാ പരിസ്ഥിതി സെക്രട്ടറി ഭാസ്കരന് വെള്ളൂര്, നിശാന്ത് കുളപ്പുറം എന്നിവരുടെ നേതൃത്വത്തില് പരിസ്ഥിതി പ്രവര്ത്തകര് സ്ഥലം സന്ദര്ശിച്ച് മണ്ണിടിച്ചിലിന്റെ വ്യാപ്തി കണക്കാക്കി. തറനിരപ്പില് നിന്നും ആഴത്തിലേക്ക് ഇപ്പോഴും മണ്ണ് കുഴിച്ചെടുക്കുകയാണെന്ന് അവര് കണ്ടെത്തി. പഞ്ചായത്തിലെ 28 സ്ഥലങ്ങളില് നടക്കുന്ന കുന്നിടിക്കല് കാരണം കുന്നുകളുടെ വിസ്തൃതി 4467 ഏക്കറില് നിന്നും 4427 ഏക്കറായിച്ചുരുങ്ങിയതായി അവര് പറഞ്ഞു.
