വെഞ്ഞാറമൂട്: നാടകാചാര്യന്‍ പ്രൊഫ.ജി.ശങ്കരപ്പിള്ളയുടെ അനുസ്മരണത്തോടനുബന്ധിച്ച് രംഗപ്രഭാതില്‍ നടന്നുവരുന്ന നാടകോത്സവം ശ്രദ്ധയാകര്‍ഷിക്കുന്നു. ജി.ശങ്കരപ്പിള്ളയുടെ നാല് നാടകങ്ങളാണ് രംഗത്ത് അവതരിപ്പിക്കുന്നത്.അവരംഗപ്രഭാതും, പ്രൊഫ.ജി.ശങ്കരപിള്ള മെമ്മോറിയല്‍ സെന്റര്‍ ഫോര്‍ പെര്‍ഫൊര്‍മിങ്ങ് ആര്‍ട്‌സും സംസാരിക വകുപ്പും ന്യൂ ഡല്‍ഹിയും സംയുക്തമായാണ് അനുസ്മരണ നാടകോത്സവം സംഘടിപ്പിച്ചിരിക്കുന്നത്.
‘തിരുമ്പി വന്താന്‍ തമ്പി’, ‘ഭീമ ഘടോല്‍ക്കച ബൊമ്മലാട്ടം’, ‘രാത്രിഞ്ചരന്‍’എന്നീ നാടകങ്ങളാണ് രംഗത്ത് അവതരിപ്പിച്ചത്. ജി.ശങ്കരപ്പിള്ളയുടെ തനത് നാടക സങ്കല്‍പ്പത്തിലാണ് അവതരണം എന്നത് ശ്രദ്ധേയമാണ്. ലക്ഷക്കണക്കിന് വേദികളില്‍ അവതരിപ്പിക്കപ്പെട്ട ‘ഭീമ ഘടോല്‍ക്കച ബൊമ്മലാട്ടം’പഴയ തനിമ നിലനിര്‍ത്തിതന്നെ അവതരിപ്പിക്കപ്പെട്ടത് പ്രേക്ഷക ശ്രദ്ധ പിടിച്ചുപറ്റി. സാധാരണ അവതരിപ്പിക്കപ്പെടുന്നതില്‍ നിന്ന് വ്യത്യസ്തമായി തമിഴ്‌നാട്ടിലെ ബൊമ്മലാട്ടത്തിന്റെ ചലനാത്മഗതിയിലാണ് നാടകം അവതരിപ്പിക്കപ്പെട്ടത്.
കത്തുന്ന പന്തങ്ങളുടെ വെളിച്ചത്തില്‍ ഒരുക്കിയ രംഗ സജ്ജീകരണം പ്രേക്ഷകരെ പഴയകാല നാടക വേദിയിലേക്ക് ആനയിച്ചു. സൂത്രധാരനെന്ന സങ്കല്‍പ്പത്തെ മാറ്റിനിര്‍ത്തി ഭീമനും ഘടോല്‍ക്കചനും കഥ പറഞ്ഞാണ് നാടകം അരങ്ങേറിയത്. പിന്നണിപ്പാട്ടുകാരെയും മേളക്കാരേയും രംഗത്ത് തന്നെ കഥാ പാത്രങ്ങളാക്കി കോറസ്സുകളെ ഒഴിവാക്കി അവതരണത്തിന് പുതിയ രംഗഭാഷയൊരുക്കി. ഭീമനായി അഭിഷേകും ഘടോല്‍ക്കചനായി അഖില്‍ ബാബുവും വേഷമിട്ടു. ഹരീഷ്.എസ്. രംഗപ്രഭാതാണ് നാടകത്തിന് രംഗഭാഷയൊരുക്കിയത്.
ശങ്കരപ്പിള്ള ദിനമായ ഇന്നലെ നടന്ന അനുസ്മര പ്രഭാഷണം സാംസ്‌കാരിക വകുപ്പ് സെക്രട്ടറി എം. സന്തോഷ്‌കുമാര്‍ ഉദ്ഘാടനം ചെയ്തു. പ്രൊഫ.ജി. ശങ്കരപ്പിള്ള അനുസ്മരണം മാവേലിക്കര മോഹനനും രാമാനുജം അനുസ്മരണം പിരപ്പന്‍കോട് മുരളിയും നടത്തി. തുടര്‍ന്ന് തിരുവനന്തപുരം കലാവേദിയുടെ ‘രാത്രിഞ്ചരന്‍’ അവതരിപ്പിച്ചു. രംഗ പ്രഭാത് അവതരിപ്പിക്കുന്ന ‘ഭരതവാക്യം’ നാടകത്തോടെ നാടകോത്സവം ഇന്ന് സമാപിക്കും.
