ചങ്ങനാശ്ശേരി: 139-ാമത് മന്നംജയന്തി ആഘോഷങ്ങള്ക്ക് ഇന്ന് പെരുന്നയില് തുടക്കം. ഇന്ന് അഖിലകേരള നായര് പ്രതിനിധി സമ്മേളനവും നാളെ മന്നംജയന്തി സമ്മേളനവും നടക്കും.
1914-ല് നായര് സമുദായ ഭൃത്യ ജനസംഘമായി രൂപീകരിക്കപ്പെട്ട സംഘടന അടുത്തവര്ഷം എന്എസ്എസ് പുനര്നാമകരണം ചെയ്യപ്പെടുകയായിരുന്നു. അതേവര്ഷംതന്നെ കറുകച്ചാലില് ആദ്യ സ്കൂള് ആരംഭിക്കാന് എന്എസ്എസിന് സാധിച്ചു. 100 വര്ഷം പിന്നിടുമ്പോള് നൂറുകണക്കിന് വിദ്യാലയങ്ങളും നിരവധി കോളേജുകളും എന്എസ്എസിന്റെ സ്ഥാപനങ്ങളായി ഉണ്ട്.
നായര് സമുദായത്തില് നിലനിന്നിരുന്ന അനാചാരങ്ങള്ക്കും ആര്ഭാടങ്ങള്ക്കുമെതിരെ മന്നം നിരന്തരം ശബ്ദമുയര്ത്തിയിരുന്നു. സമുദായത്തിനുവേണ്ടി മാത്രമല്ല മന്നം പ്രവര്ത്തിച്ചതെന്ന് ചരിത്രത്തിലൂടെ കണ്ണോടിക്കുമ്പോള് കാണാവുന്നതാണ്. ചരിത്രപ്രസിദ്ധമായ വൈക്കം സത്യാഗ്രഹം. ഗുരുവായൂര് സത്യാഗ്രഹം എന്നിവ എടുത്തുപറയേണ്ടവയാണ്.
പെരുന്ന മന്നത്തുവീട്ടില് നിലവിളക്കുകൊളുത്തി അതില് മുന്പിന് മന്നത്തുപദ്മനാഭനുള്പ്പെടെ 14 പേര് ചേര്ന്നെടുത്ത പ്രതിജ്ഞയുടെ അടിത്തറയില് പിറവിയെടുത്ത സംഘടന ഇന്നും കെട്ടുറപ്പോടെ മുന്പോട്ടുപോകുന്നത് അതിന്റെ ലക്ഷ്യത്തില്നിന്നും അണുവിട വ്യതിചലിക്കാതെയുള്ള പ്രവര്ത്തനംമൂലമാണ്.
സമുദായത്തിന്റെ ഉന്നതിക്കുവേണ്ടി വനിതാ സ്വാശ്രയ സംഘങ്ങള്. യുവജനങ്ങളുടെ നന്മലക്ഷ്യമാക്കി മനുഷ്യവിഭവശേഷി വിഭാഗം എന്നിവ കഴിഞ്ഞ പത്തുവര്ഷത്തോളമായി പ്രവര്ത്തിച്ചുവരുന്നു. 5600-ല്പരം വരുന്ന കരയോഗങ്ങളില് തൊഴില് സംരംഭങ്ങളും സ്വയംതൊഴില് സംരംഭങ്ങളും യുവജനങ്ങള്ക്കായി തൊഴില് മേഖലയില് അവബോധവും വിവാഹ പൂര്വ്വ കൗണ്സലിംഗ്, മൂല്യാവബോധ ക്ലാസുകള് തുടങ്ങി വ്യക്തിത്വ വികസനം ലക്ഷ്യമിടുന്നു.
മന്നത്തുപദ്മനാഭന് കേരളത്തിന്റെ സാമൂഹിക രാഷ്ട്രീയമണ്ഡലത്തില് ചെലുത്തിയ സ്വാധീനം വളരെ വലുതായിരുന്നു എന്ന് വ്യക്തമായി മനസ്സിലാക്കാന് കഴിയും. 1959ലെ വിമോചന സമരത്തിനു നേതൃത്വംകൊടുത്തത് മന്നമായിരുന്നു. തൊട്ടുകൂടായ്മയ്ക്കും തീണ്ടീക്കൂടായ്മയ്ക്കുമെതിരെ പോരാട്ടം നടത്തുകയും ക്ഷേത്രപ്രവേശനത്തിനു വഴിതുറന്ന സമരത്തിന്റെ നേതൃത്വം ഏറ്റെടുക്കുകവഴി നായര് സമുദായത്തിന്റെ മാത്രമല്ല അധസ്ഥിതജനവിഭാഗത്തിന്റെ കാര്യത്തില് ശ്രദ്ധാലുവായിരുന്നുവെന്നും കാണാന് കഴിയും. സ്വന്തമായി ഒന്നും നേടാതെ സമുദായത്തിനും സമൂഹത്തിനും ഗുണപരമായും സാമ്പത്തികമായും മാറ്റങ്ങള് നല്കി ഒരുവടവൃക്ഷമായി പന്തലിച്ച മന്നത്തിന്റെ പ്രവര്ത്തനങ്ങള് അനസ്യൂതം മുന്പോട്ടുകൊണ്ടുപോകുന്നതിനായി കഴിയണം. അതായിരിക്കും മന്നത്തു പദ്മനാഭനോടുള്ള ആദരവിന്റെ പ്രതിഫലനമാകേണ്ടത്.
