സ്വന്തം ലേഖകന്‍
കണ്ണൂര്‍: സര്‍ക്കാര്‍ ഉത്തരവ് നടപ്പാക്കാന്‍ തയ്യാറാവാതെ പൊതുമേഖലാ ബാങ്കുകള്‍ രാജ്യത്തെ വനിത ജീവനക്കാരെ ബുദ്ധിമുട്ടിക്കുന്നു. അവിവാഹിതയായ ബാങ്ക് ഉദ്യോഗസ്ഥര്‍ക്ക് അവരുടെ മാതാപിതാക്കള്‍ താമസിക്കുന്ന സ്ഥലത്തോ അല്ലങ്കില്‍ സമീപ ശാഖകളിലോ നിയമനം നല്‍കണമെന്നും വിവാഹിതരായ ഉദ്യോഗസ്ഥര്‍ക്ക് അവരുടെ ഭര്‍ത്താവ് താമസിക്കുന്നതോ ജോലി ചെയ്യുന്നതോ ആയ സ്ഥലത്ത് നിയമനം നല്‍കണമെന്നുമുളള ഉത്തരവ് നടപ്പാക്കാന്‍ തയ്യാറാവാതെയാണ് രാജ്യത്തെ പൊതു മേഖലാ ബാങ്കുകള്‍ വനിതാ ജീവനക്കാരെ ബുദ്ധിമുട്ടിക്കുന്നത്. പൊതുമേഖല ബാങ്കുകളിലെ വനിത ജീവനക്കാരുടെയും യൂണിയനുകളുടെയും നിരന്തരമായുള്ള ആവശ്യത്തെ തുടര്‍ന്ന് കേന്ദ്ര ധനകാര്യമന്ത്രിയുടെ നിര്‍ദ്ദേശാനുസരണം ധനകാര്യ വകുപ്പ് അണ്ടര്‍ സെക്രട്ടറി മനീഷ്‌കുമാര്‍ 2014 ഓഗസ്റ്റ് എട്ടിന് പുറപ്പെറുവിച്ച ഉത്തരവാണ് ബാങ്കുകള്‍ അവഗണിക്കുന്നത്. സ്ത്രീ ശാക്തീകരണത്തിനായി കേന്ദ്ര സര്‍ക്കാര്‍ ലോക്‌സഭാംഗം ബിജോയ ചക്രവര്‍ത്തി ചേയര്‍പേഴ്‌സണായി രൂപീകരിച്ച 31 അംഗം കമ്മിറ്റിയും പൊതുമേഖല ബാങ്കിലെ വനിത ജീവനക്കാര്‍ അനുഭവിക്കുന്ന തൊഴില്‍ സ്ഥലങ്ങളിലെ പീഡനങ്ങളെ പറ്റി പഠിച്ചു റിപ്പോര്‍ട്ട് നല്‍കിയിരുന്നു. ഈ കമ്മിറ്റി കഴിഞ്ഞ ആഗസ്റ്റ് നാലിന് കേന്ദ്ര സര്‍ക്കാരിന് സമര്‍പ്പിച്ച റിപ്പോര്‍ട്ടിലും വനിതാ ജീവനക്കാരുടെ സുരക്ഷയും അവരുടെ ജോലിയിലുണ്ടാകുന്ന സമ്മര്‍ദം കുറയ്‌ക്കുന്നതിനായി അവര്‍ ആവശ്യപ്പെടുന്ന സ്ഥലത്തേയ്‌ക്ക് നിയമനം നല്‍കണമെന്ന് ശിപാര്‍ശ ചെയ്തിരുന്നു. എന്നാല്‍ ഭാരതീയ മഹിളാ ബാങ്ക് ഉള്‍പ്പെടെ രാജ്യത്തെ 27 പൊതുമേഖലാ ബാങ്കുകളും ഈ ഉത്തരവ് നടപ്പാക്കാന്‍ തയ്യാറായിട്ടില്ല. നിയമസഭ കമ്മിറ്റിയുടെ പഠന റിപ്പോര്‍ട്ട് പ്രകാരം പൊതുമേഖല ബാങ്കുകളിലെ 857868 തൊഴിലാളികളില്‍ 196374( പേര്‍ സ്ത്രീകളാണ് (24 ശതമാനം). ഇതില്‍ 72625 പേര്‍ വനിത ഓഫീസര്‍മാരും 102354 പേര്‍ വനിത ക്ലര്‍ക്കുകളും 20475 പേര്‍ മറ്റു വനിത ജീവനക്കാരുമാണ്. വനിത ജീവനക്കാരാര്‍ക്കെതിരായി ബാങ്കുകളുകള്‍ സ്വീകരിച്ചു പോരുന്ന നിഷേധാത്മക സമീപനം മൂലം ഭൂരിഭാഗം വനിതകളും പ്രമോഷന്‍ എടുക്കാന്‍ മടിക്കുകയാണ്. പ്രമോഷന്‍ എടുത്താല്‍ റൂറല്‍ ഏരിയില്‍ ജോലിചെയ്യണമെന്ന് പറഞ്ഞ് ജീവനക്കാരെ മറ്റു സംസ്ഥാനങ്ങളില്‍ പോലും നിയമിക്കുന്നു. സ്ഥാനകയറ്റം സ്വീകരിച്ചപാടെ യാതൊരു മാനദണ്ഡവും പാലിക്കാതെ സ്ഥലം മാറ്റുന്നതുകാരണം പിഞ്ചുകുഞ്ഞുങ്ങളെവരെ ഉപേക്ഷിച്ച് ജോലി സ്ഥലങ്ങളിലേക്കു പോകേണ്ട ഗതികേടിലാണ് വനിത ജീവനക്കാര്‍. ഇതുകാരണം പൊതുമേഖലാബാങ്കുകളില്‍ വനിത ഓഫീസര്‍മാരുടെയും മാനേജര്‍മാരുടെയും എണ്ണം ഗണ്യമായി കുറയുകയാണ്. വനിതകള്‍ക്കെതിരെ ഇന്ത്യയിലെ പൊതുമേഖലാ ബാങ്കുകള്‍ സ്വീകരിച്ചുപോരുന്ന ഇത്തരം നടപടികള്‍ക്കെതിരെ വനിത കമ്മിഷന്‍ ഉള്‍പ്പെടെ യാതൊരു നടപടിയും സ്വീകരിക്കുന്നില്ല. യൂണിയനുകള്‍ വഴിയോ കോടതി മുഖേനയോ സര്‍ക്കാര്‍ ഉത്തരവ് ചൂണ്ടിക്കാണിച്ച് തങ്ങള്‍ക്ക് അര്‍ഹതപ്പെട്ട സ്ഥലംമാറ്റം നേടിയെടുക്കുന്നവര്‍ക്കെതിരെ ബാങ്കുകളുടെ ഡയറക്ടര്‍ ബോര്‍ഡില്‍നിന്നും പ്രതികാര നടപടികള്‍ നേരിടേണ്ട അവസ്ഥയാണ്. ഇതിനാല്‍തന്നെ ആരും കോടതിയെ സമീപിക്കാനോ സര്‍ക്കാരില്‍ പരാതിപ്പെടാനോ തയ്യാറല്ല.
