അതിരുദ്ര മഹായജ്ഞം ഒരുക്കങ്ങള്‍ പൂര്‍ത്തിയായി

കൊച്ചി: എറണാകുളം ഗ്രാമജന സമൂഹത്തിന്റെ ആഭിമുഖ്യത്തില്‍ 19 മുതല്‍ 27 വരെ അതിരുദ്രമഹായജ്ഞം നടത്തും. ഗ്രാമജനസമൂഹം ഹാളിലും അതിന്റെ മുന്‍വശത്തു പ്രത്യേകം തയ്യാറാക്കുന്ന 8000 സ്‌ക്വയര്‍ഫീറ്റ് അളവിലുള്ള യജ്ഞശാലയിലുമായിട്ടാണ് പൂര്‍ണ്ണ വിവിധ ഹോമങ്ങളും യജ്ഞങ്ങളും നടക്കുന്നത്. ചെന്നൈ സംസ്‌കൃത കോളേജ് മുന്‍ പ്രിന്‍സിപ്പല്‍ ഡോ.കെ.വി.ശേഷാദ്രിനാഥ ശാസ്ത്രികളുടെ നേതൃത്വത്തില്‍ 300 ഓളം വൈദീകരാണ് ഈ യജ്ഞത്തില്‍ പങ്കെടുക്കുന്നത്. 19ന് രാവിലെ കാലടിയില്‍ നിന്നും അതിരുദ്രയജ്ഞശാലയില്‍ ജ്വലിപ്പിക്കുന്ന ദീപം മറ്റും ധ്വജാരോഹണത്തിനുള്ള കൊടിയും പ്രതിഷ്ഠിക്കുവാനുള്ള ശിവലിംഗവും വഹിച്ചുകൊണ്ടുള്ള ശോഭായാത്ര ആരംഭിക്കും. വൈകിട്ട് 5ന് ദീപോജ്ജ്വലനം, കൊടിയേറ്റം, വിഗ്രഹപ്രതിഷ്ഠ എന്നിവയ്‌ക്കുശേഷം അതിരുദ്ര മഹായജ്ഞത്തിന്റെ ഉദ്ഘാടനം നടക്കും. തുടര്‍ന്ന് ത്യാഗബ്രഹ്മം ടി.എസ്.രാധാകൃഷ്ണജിയുടെ നേതൃത്വത്തില്‍ ഭക്തിഗാന തരംഗിണി ഉണ്ടാകും. ഡിസംബര്‍ 20ന് രാവിലെ 4.30ന് പ്രത്യക്ഷ മഹാഗണപതിഹോമത്തോടുകൂടി ചടങ്ങുകള്‍ക്ക് തുടക്കമാകും. തുടര്‍ന്ന് മഹാന്യാസപൂര്‍വ്വകമായ രുദ്രാഭിഷേകം, അരുണനമസ്‌ക്കാരം, അയ്യപ്പലക്ഷാര്‍ച്ചന, ക്രമാര്‍ച്ചന, മഹാദീപാരാധന എന്നിവയും വൈകുന്നേരം 4ന് ചെന്നൈ ഡോ.ഗണേഷ് ഭാഗവതരും സംഘവും അവതരിപ്പിക്കുന്ന ശിവനാമവൈഭവം നാമസങ്കീര്‍ത്തനവും ഉണ്ടായിരിക്കുന്നതാണ്.