കോഴിക്കോട്: ജില്ലാ ജയിലില് വനിതാ അസിസ്റ്റന്റ് സൂപ്രണ്ട് (ഗ്രേഡ്-2) നെ അപമാനിക്കാന് ശ്രമിച്ച പരാതിയില് ജയില് ഡിജിപി അന്വേഷണത്തിന് ഉത്തരവിട്ടു. ഒരുമാസം മുമ്പ് കോഴിക്കോട് ജില്ലാ ജയില് സൂപ്രണ്ട് സഹപ്രവര്ത്തകയോട് അപമര്യാദയായി പെരുമാറിയെന്നാണ് പരാതി.
ഇക്കഴിഞ്ഞ തിങ്കളാഴ്ച ജയില് ഡിജിപി ഋഷിരാജ് സിങ് കോഴിക്കോട് ജില്ലാ ജയില്, സ്പെഷ്യല് സബ്ജയില് എന്നിവ സന്ദര്ശിച്ചിരുന്നു. നേരത്തെ ജയില് ഡിഐജിക്ക് പരാതി നല്കിയിരുന്നെങ്കിലും നടപടി ഉണ്ടാകാത്തതിനെ തുടര്ന്നാണ് പരാതിക്കാരി കഴിഞ്ഞ ദിവസം ഡിജിപിക്ക് നേരിട്ട് പരാതി നല്കിയത്. തന്നോട് ലൈംഗികച്ചുവയോടെ സംസാരിച്ചുവെന്നാണ് പരാതിയില് ഉള്ളത്. നേരത്തെ പരാതിനല്കിയതിന് ശേഷം ഇവരെ ഓഫീസ് ഡ്യൂട്ടിയില് നിന്നും ജനറല് ഡ്യൂട്ടിയിലേക്ക് മാറ്റിയതായും പരാതിയുണ്ട്. വനിതാ ജീവനക്കാരുടെ നേരെ നടക്കുന്ന അതിക്രമങ്ങള് തടയാനുള്ള കമ്മിറ്റിയിലെ അംഗം കൂടിയാണ് പരാതിക്കാരി. ചുമതലയേറ്റതിനു ശേഷം ആദ്യമായി സന്ദര്ശനത്തിന് എത്തിയ ജയില് ഡിജിപി ജീവനക്കാരെ നേരില് കണ്ട് വിവരങ്ങള് ശേഖരിച്ചിരുന്നു.
