പാനൂര്‍: നാട്ടിന്‍പുറത്തെ സഹകരണങ്ങളും ഓര്‍മ്മകളില്‍ നിന്നും മായുന്നു. വിശ്വാസത്തില്‍ ഉറച്ച് നടന്നുകൊണ്ടിരുന്ന പണമിടപാടുകളും ഇനി ഓര്‍മ്മകളില്‍ മാത്രം. ഒരു കാലത്ത് നാട്ടുമുഖ്യസ്ഥന്‍മാരാല്‍ നിയന്ത്രിക്കപ്പെട്ട് നടന്നിരുന്ന പണപ്പയറ്റുകളാണ് ഇന്ന് വിസ്മൃതിയിലായിരിക്കുന്നത്. സാമ്പത്തിക ബുദ്ധിമുട്ടനുഭവിക്കുന്ന കുടുംബങ്ങള്‍ക്ക് ഏറെ ആശ്വാസം പകരുന്ന കൂട്ടായ്‌മയായിരുന്നു പണപ്പയറ്റുകള്‍. നിശ്ചയിക്കപ്പെട്ട ദിവസം കത്തടിച്ച് ആളുകളെ വീടുകളിലേക്ക് ക്ഷണിച്ച് സദ്യയും പലഹാരങ്ങളും നല്‍കും. നല്‍കുന്ന പണം പുസ്തകത്തില്‍ എഴുതി ചേര്‍ക്കും. പണം നല്‍കിയവര്‍ക്ക് അവര്‍ പണപ്പയറ്റു നടത്തുമ്പോള്‍ ഇരട്ടി തുക നല്‍കും. അതിനു കൂട്ടിപയറ്റുകള്‍ എന്നും നല്‍കിയ തുക മാത്രം തിരിച്ചു വാങ്ങുന്നതിന് മുതല്‍ വാങ്ങല്‍ എന്നും പറയും. ചായക്കടകളിലും സായാഹ്നങ്ങളില്‍ പണപ്പയറ്റു നടക്കാറുണ്ട്. പാറക്കടവ്, നാദാപുരം ഭാഗങ്ങളില്‍ മൈക്ക് കെട്ടി കുറച്ചുകൂടി പ്രൗഢിയോടെയാണ് പയറ്റു നടക്കുക. എല്ലാവരും അവനവനാല്‍ കഴിയുന്ന തുക നല്‍കി ആവശ്യക്കാരനെ സഹായിക്കുന്ന കൂട്ടായ്‌മ. ഐക്യനാണയ സംഘത്തിലൂടെ സഹകരണസ്ഥാപനങ്ങള്‍ ആരംഭിക്കും മുന്‍പ് ജനങ്ങള്‍ നാട്ടുനിയമത്തില്‍ ആരംഭിച്ച സഹായധനശേഖരണമായിരുന്നു പണപ്പയറ്റ്. സഹകരണ രജിസ്ട്രാര്‍ നിയമങ്ങളൊന്നുമില്ലാതെ നാട്ടുനിയമവ്യവസ്ഥയില്‍ നടക്കുന്ന ഗ്രാമത്തിലെ വിശ്വാസ പണമിടപാടുകള്‍ ഇന്ന് ഭീഷണി നേരിടുകയാണ്. രാഷ്‌ട്രീയ പാര്‍ട്ടികളുടെ അതിപ്രസരവും, സാമൂഹ്യ ജീവിതക്രമത്തിലെ മാറ്റവും ഇത്തരം വിശ്വാസത്തിന് ഭംഗം വരുത്തുകയായിരുന്നു. പാനൂര്‍, പൊയിലൂര്‍, ചെണ്ടയാട്, പാറാട്, വിളക്കോട്ടൂര്‍, നാദാപുരം, കടവത്തൂര്‍ ഭാഗങ്ങളില്‍ പണപ്പയറ്റിനു വിരാമമുണ്ടായത് കര്‍ക്കിടക മാസത്തില്‍ മാത്രമായിരുന്നു. ഇന്ന് പണപ്പയറ്റുളള മേഖല വിരളമാണ്. ഇവിടെ ഇന്ന്് ബ്ലേഡ് മാഫിയകള്‍ അരങ്ങു വാഴുകയുമാണ്. നാട്ടിന്‍പുറത്തെ ചിട്ടികളുടെയും സ്ഥിതിയും വിഭിന്നമല്ല. സ്ഥാപനങ്ങളും വ്യക്തികളും നടത്തുന്ന സ്വാശ്രയ സംരംഭങ്ങളെല്ലാം ഇന്ന് ഭീഷണിയുടെ നിഴലിലാണ്. പാരസ്പര്യത്തിന്റെ പൂരകങ്ങളായി ജീവിച്ചവര്‍ പല കാരണങ്ങളാല്‍ അകന്നു നില്‍ക്കുന്ന കാഴ്ചയാണ് ഇന്നു നാട്ടിന്‍പുറങ്ങളില്‍ ഉളളത്. അനധികൃത ചിട്ടിക്കമ്പനികള്‍ ഇന്ന് ഗ്രാമങ്ങളില്‍ നിലയുറപ്പിച്ചതിനു കാരണം പരിശോധിച്ചാല്‍ കൂട്ടായ്‌മയിലെ വിളളല്‍ ദൃശ്യമാവും. വിശ്വാസം നഷ്ടപ്പെട്ട നിഷ്‌കളങ്കരയായ ജനങ്ങള്‍ ഇന്ന് നേരിടുന്ന പ്രശ്‌നങ്ങള്‍ അനവധിയാണ്. പരസ്പരം സഹായിക്കാന്‍ കൂട്ടായ്‌മകള്‍ സൃഷ്ടിച്ചവര്‍ ഇന്നു മരവിപ്പിലാണ്. രാഷ്‌ട്രീയം നോക്കി സേവനം ചെയ്യുന്നവര്‍ പരസ്യത്തിനായി മുഖം നല്‍കി പ്രചരണം നടത്തുകയും ചെയ്യുന്നു. കളളവും, ചതിവുമില്ലാത്ത നാട്ടിന്‍പുറത്ത് ഇന്നു കാണുന്ന അരുതായ്‌മകളില്‍ പ്രായം ചെന്നവര്‍ ഏറെ ആശങ്കയിലുമാണ്. സാമ്പത്തിക പ്രയാസം മൂലം ആത്മഹത്യ ചെയ്യുന്നവരുടെ എണ്ണത്തില്‍ വര്‍ദ്ധനവുണ്ടാകുന്നതും പഴയകാലത്തെ സഹകരണത്തിന്റെ കുറവാണെന്ന് ഇവര്‍ പരിഭവിക്കുന്നു. തിരിച്ചു വരുമോ ആ പണപ്പയറ്റും സ്‌നേഹവും സഹകരണവുമെന്ന് പഴയ തലമുറയില്‍പ്പെട്ടവര്‍ ചോദിക്കുന്നത്.
വിസ്മൃതിയിലാകുന്ന പണപ്പയറ്റുകള്‍ അരങ്ങു വാഴുന്നത് കൊള്ളപ്പലിശക്കാര്‍
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.