കോഴിക്കോട്: ബുദ്ധിപരമായി വെല്ലുവിളി നേരിടുന്നവര്ക്കായി എസ്സിഇആര്ടി തയ്യാറാക്കിയ പ്രത്യേക പാഠ്യപദ്ധതിയില് അധ്യാപകര്ക്കുള്ള സംസ്ഥാനതല പരിശീലന പരിപാടിക്ക് തുടക്കമായി.
ആദ്യഘട്ടത്തില് ഓരോ ജില്ലയിലും അമ്പത് പേര് വീതമുള്ള ഓരോ ബാങ്കിന്റെ പരിശീലനമാണ് നടക്കുക. സ്പെഷ്യല് സ്കൂള് എംപ്ലോയീസ് യൂണിയന്റെയും അസോസിയേഷന് ഫോര് ഇന്റലക്ച്വലി ഡിസേബ്ള്ഡിന്റെയും സഹായത്തോടെ തിരുവനന്തപുരം സ്റ്റേറ്റ് ഇന്സ്റ്റിറ്റിയൂട്ട് ഫോര് ദി മെന്റലി ചാലഞ്ച്ഡ് നടത്തുന്ന പരിശീലന പരിപാടിയുടെ സംസ്ഥാനതല ഉദ്ഘാടനം ദേവഗിരി ആശാകിരണ് സ്കൂള് ഓഡിറ്റോറിയത്തില് ജില്ലാ പഞ്ചായത്ത് പ്രസിഡന്റ് ബാബു പറശ്ശേരി നിര്വ്വഹിച്ചു. എസ്എസ്ഇയു സംസ്ഥാന പ്രസിഡന്റ് എം.മന്സൂര് അധ്യക്ഷത വഹിച്ചു.
എസ്ഐഎംസി ഡയറക്ടര് ഡോ. എം.ജെ. ജയരാജന് മുഖ്യപ്രഭാഷണം നടത്തി. എസ്എസ്ഇയു സംസ്ഥാന ജനറല്സെക്രട്ടറി ടി.പ്രഭാകരന്, പ്രൊഫ. കോയട്ടി, പി.മുകുന്ദന്, കെ.എം.ഉമ്മര് എന്നിവര് സംസാരിച്ചു.
എസ്സി ഇആര്ടി പരിശീലകരായ ഡോ. ബാബുക്കുട്ടന്, പത്മനാഭന്, പി.കുഞ്ഞബ്ദുള്ള എന്നിവര് പരിശീലനത്തിന് നേതൃത്വം നല്കി. കോഴിക്കോട് ജില്ലയിലെ 17 സ്പെഷ്യല് സ്കൂളുകളില് നിന്നുള്ള അധ്യാപകരാണ് പരിശീലനത്തില് പങ്കെടുത്തത്.
തുടര്ന്നുള്ള ദിവസങ്ങളില് മറ്റ് ജില്ലകളിലും പരിശീലനം നടക്കും.
ഡിസംബര് അവസാനത്തോടെ സംസ്ഥാതല പരിശീലനം പൂര്ത്തിയാവും.
