കൊച്ചി: രാജേന്ദ്ര മൈതാനിയില് നടക്കുന്ന അന്നം 2015 നോടനുബന്ധിച്ച് നടന്ന ജൈവ കര്ഷക സംഗമം ഡോ.വന്ദനശിവ ഉദ്ഘാടനം ചെയ്തു. രാസവളനിര്മാതാക്കള് തന്നെ അതുമൂലം ഉണ്ടാകുന്ന ആരോഗ്യപ്രശ്നങ്ങള്ക്ക് ഔഷധം നിര്മിക്കുന്നവരായി അവതരിക്കുന്ന കാലഘട്ടമാണിതെന്ന് വന്ദനശിവ പറഞ്ഞു.തമിഴ്നാട് ജൈവകര്ഷക സംഘം തലവന് എസ്.ആര്. സുന്ദര് രാമന്, വയനാട്ടിലെ കര്ഷക ശ്രേഷ്ഠന് ചെറുവയല് രാമന് എന്നിവരും ജൈവകര്ഷകരും തമ്മില് സംവാദം നടന്നു. വിളനാശം വരുത്തുന്ന കീടങ്ങളേയും എലി തുടങ്ങിയ ക്ഷുദ്രജീവികളേയും തുരത്തുന്നതിനുള്ള നൂതന ജൈവമാര്ഗങ്ങള് സുന്ദര്രാമനും ചെറുവയല് രാമനും കര്ഷകര്ക്കു പറഞ്ഞുകൊടുത്തു. കേരള സര്ക്കാരിന്റെ ജൈവകൃഷി അംബാസഡര്മാരില് ഒരാളും പ്രായംകുറഞ്ഞ ജൈവകര്ഷകനുമായ 18 കാരന് സൂരജ് തന്റെ കൃഷി അനുഭവങ്ങള് വിവരിച്ചത് കൗതുകം പകര്ന്നു. കേരള സര്വകലാശാല മലയാള വിഭാഗം മേധാവി ഡോ.സി.ആര്. രാജഗോപാല് രചിച്ച രണ്ടു പുസ്തകങ്ങള് പ്രകാശനം ചെയ്തു. കേരളത്തിലെ കാലാവസ്ഥ, കൃഷി, ആചാരാനുഷ്ഠാനങ്ങള് എന്നിവ പ്രതിപാദിക്കുന്ന പതിനൊന്ന് ഇംഗ്ലീഷ് പ്രബന്ധങ്ങള് ഉള്പ്പെട്ട സമ്മര് റെയിന്: ദ റൂട്ട്സ് ഓഫ് ഇന്ഡിജീനസ് നോളജ് ഓഫ് കേരള എന്ന പുസ്തകം ഡോ.വന്ദന ശിവയും വരിക്കപ്ലാവിനുവേണ്ടി ഒരു വടക്കന് പാട്ട് (ഒരു പഠനം) എന്ന മലയാള പുസ്തകം ചെറുവയല് രാമനും പ്രകാശനം ചെയ്തു. സംഘാടകരായ സെന്റര് ഫോര് ഇന്നവേഷന് ഇന് സയന്സ് ആന്റ് സോഷ്യല് ആക്ഷന് (സിസ്സ) ജനറല് സെക്രട്ടറി ഡോ.സി.സുരേഷ് കുമാറിന്റെ അദ്ധ്യക്ഷതയില് ചേര്ന്ന ചടങ്ങില് പ്രൊഫ.എം.കെ.പ്രസാദ് അനുഗ്രഹ പ്രഭാഷണം നടത്തി. ഫാം ഇന്ഫര്മേഷന് ബ്യൂറോ ഉപദേശക സമിതി അംഗം കെ.പി.രമേഷ് ബാബു, ഓര്ഗാനിക് കേരളയെ പ്രതിനിധീകരിച്ച് ഫാദര് പ്രശാന്ത്, അബ്ബാസ് എന്നിവര് സംസാരിച്ചു. സിസ്സ പ്രസിദ്ധീകരണ മേധാവി കെ.പി.ശിവകുമാര് സ്വാഗതവും ശ്രേഷ്ഠകൃഷി പ്രചാരകന് ശ്രീകുമാര് നന്ദിയും പറഞ്ഞു.
ജൈവകര്ഷക സംഗമത്തില് ആശങ്കകളും ആഹ്ലാദവും പങ്കിട്ട് കര്ഷകര്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.