കോഴിക്കോട്: ഏഷ്യയിലെ ഏറ്റവും മികച്ച കരകൗശല മേളയ്‌ക്കായി ഇരിങ്ങല്‍ ക്രാഫ്റ്റ് വില്ലേജ് – സര്‍ഗാലയ ഒരുങ്ങുന്നു. ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിയും ടൂറിസം വകുപ്പും ചേര്‍ന്നൊരുക്കുന്ന അഞ്ചാമത് അന്താരാഷ്ട്ര കരകൗശലമേളയ്‌ക്കാണ് കോഴിക്കോട് ഇരിങ്ങല്‍ ക്രാഫ്റ്റ് വില്ലേജ് വേദിയാവുന്നത്. ഈ മാസം 20 മുതല്‍ ജനുവരി അഞ്ചുവരെയാണ് കരകൗശലമേള.
വിവിധ സംസ്ഥാനങ്ങളിലെ 300 കലാകാരന്മാരുടെ സ്റ്റാളുകളാണ് മേളയില്‍ സജ്ജമാക്കുന്നത്. ദേശീയ അംഗീകാരം നേടിയ 50 കലാകാരന്മാരുടെ സാന്നിദ്ധ്യവും ഇവിടെ ഉണ്ടാവും. കേരളത്തിലെ കരകൗശല വിദഗ്ധര്‍ക്ക് പുറമെ ഡല്‍ഹി, മഹാരാഷ്‌ട്ര, ഉത്തര്‍പ്രദേശ്, ബീഹാര്‍, വെസ്റ്റ്ബംഗാള്‍, ഒഡീഷ, ജമ്മുകാശ്മീര്‍, ആന്ധ്രാപ്രദേശ്, തെലുങ്കാന, കര്‍ണാടക, തമിഴ്‌നാട്, ചത്തീസ്ഗഡ്, ഹരിയാന, ചണ്ഡിനഗര്‍, രാജസ്ഥാന്‍, പുതുച്ചേരി, പഞ്ചാബ്, ഗുജറാത്ത്, മധ്യപ്രദേശ്, ആസ്സാം, ഝാര്‍ഖണ്ഡ് തുടങ്ങിയ സംസ്ഥാനങ്ങളിലെ പരമ്പരാഗത ഗോത്രവര്‍ഗ കലാകാരന്മാര്‍ മേളയ്ക്ക് എത്തും. തഞ്ചാവൂര്‍, മധുബനി, വാര്‍ളി, പിച്ച് വായ്, മിഥില, ഗോദന, കവാദ്, ഗോണ്ട്, ബാര്‍ത്തിക്ക്, ചിത്തര, പാടചിത്ര ചിത്രകലാ സങ്കേതങ്ങള്‍ പരിചയപ്പെടുത്തുന്ന പരമ്പരാഗത ചിത്രകലാകാരന്മാരും ചുമര്‍ചിത്രകലാകാരന്മാരും ദാരുശില്‍പ്പികളും മുഖ്യആകര്‍ഷണമാവും. വിവിധ തോല്‍ ഉല്‍പ്പന്നങ്ങള്‍, വ്യത്യസ്ത ദേശങ്ങളിലെ പരമ്പരാഗത ആഭരണങ്ങള്‍, ലോഹ ശില്‍പ്പങ്ങള്‍, വാഴനാര്, ചകിരി, പനനാര് തുടങ്ങിയവ ഉപയോഗിച്ചുള്ള ഉല്‍പ്പന്നങ്ങള്‍, ചിത്രകമ്പല കാര്‍പ്പറ്റുകള്‍, കളിമണ്‍ശില്‍പ്പങ്ങള്‍, മണ്‍പാത്രങ്ങള്‍ തുടങ്ങി സാംസ്‌കാരിക പാരമ്പര്യത്തിന്റെ അടയാളപ്പെടുത്തലുകളും മേളയെ സജീവമാക്കും. വെസ്റ്റ് ബംഗാളില്‍ നിന്നുള്ള ചിക്കന്‍കാരി, പഞ്ചാബിന്റെ ഫുല്‍ക്കാരി, രാജസ്ഥാനിലെ ബാന്ദേജ്, ഉത്തര്‍പ്രദേശിലെ ബാന്തിക്, മധ്യപ്രദേശിലെ പിച്ച് വായ് എംമ്പ്രോയിഡറികളും വസ്ത്രശേഖരവും രാജസ്ഥാന്‍ ബ്ലൂപോട്ടറി, ഗുജറാത്തിലെ കാമല്‍ ബെല്‍റ്റ് കാര്‍പ്പറ്റ്, ആസ്സാമിലെ ചൂരല്‍ ഉല്‍പ്പന്നങ്ങള്‍, ഝാര്‍ഖണ്ഡിന്റെ സിറാമിക് ഉല്‍പ്പന്നങ്ങള്‍, കര്‍ണാടകയിലെ ചന്നപട്‌ന കളിപ്പാട്ടങ്ങള്‍, ഗ്ലാസ് ഉല്‍പ്പന്നങ്ങള്‍, മഹാരാഷ്‌ട്രയിലെ മിനാകാരി ലോഹശില്‍പ്പങ്ങള്‍, വെസ്റ്റ് ബംഗാളിന്റെ ചണം ഉല്‍പ്പന്നങ്ങള്‍ എന്നിവയും കാഴ്ചകാര്‍ക്ക് അവിസ്മരണീയാനുഭവം നല്‍കും.
ബിഹുഡാന്‍സ്(ആസാം),ഗര്‍ഭഡാന്‍സ്(ഗുജറാത്ത്), ഡമ്മിഹോഴ്‌സ്, കരക-കാവടി നൃത്തം(തമിഴ്‌നാട്), റൗഫ് ഡാന്‍സ്(ജമ്മുകാശ്മീര്‍), മാഥുരി(തെലുങ്കാന), ബൊണാലു ആന്റ് ഹാര്‍വസ്റ്റ്, ചാര്‍കുള, ഹോളി, മയുഖനൃത്തം(ഉത്തര്‍പ്രദേശ്), തഡിയാചാഫഌ ചോളിയ ഡാന്‍സ്(ഉത്തരാഖണ്ഡ്) തുടങ്ങിയ കലാരൂപങ്ങള്‍ക്ക് പുറമെ കിര്‍ത്താഡ്‌സിന്റെ ആഭിമുഖ്യത്തിലുള്ള ഗോത്രവര്‍ഗ കലകളും തനത് കേരളീയ കലാരൂപങ്ങളും മേളയെ സജീവമാക്കും.
കരകൗശലവിദഗ്ധരുടെ ഉല്‍പ്പന്നങ്ങള്‍ക്ക് രാജ്യാന്തരവിപണി കണ്ടെത്തുക എന്ന ലക്ഷ്യത്തോടെയാണ് മേള സംഘടിപ്പിക്കുന്നത്. കൂടുതല്‍ പേര്‍ ഈ മേഖലയില്‍ ജോലി ചെയ്യുന്നുണ്ടെന്നുള്ളതും പരിസ്ഥിതിക്ക് ഇണങ്ങിയ രീതിയില്‍ കുറഞ്ഞ ചെലവിലാണ് കരകൗശലവസ്തുക്കള്‍ നിര്‍മിക്കുന്നതെന്നതും മറ്റൊരു സവിശേഷതയാണ്.
22ന് രാവിലെ പത്തിന് മന്ത്രി എ.പി. അനില്‍കുമാറിന്റെ അദ്ധ്യക്ഷതയില്‍ കേരള ഗവര്‍ണര്‍ റിട്ട. ജസ്റ്റിസ് പി. സദാശിവം കരകൗശലമേള ഉദ്ഘാടനം ചെയ്യും.
23,29,ജനുവരി നാല് തിയ്യതികളില്‍ കരകൗശല രംഗത്തെ പ്രശ്‌നങ്ങള്‍, ഉല്‍പ്പന്നങ്ങളുടെ വിപണനം എന്നീ വിഷയങ്ങളില്‍ സെമിനാര്‍ നടക്കും.
യുഎല്‍സിസി സിഇഒ രമേശന്‍ പാലേരി, സര്‍ഗാലയ സിഇഒ പി.ടി. ഭാസ്‌കരന്‍, ജനറല്‍ മാനേജര്‍ ടി.കെ. രാജേഷ്, എസ്. ഷാജി, ലൈസണ്‍ ഓഫീസര്‍ എം.ടി. സുരേഷ്, കമാല്‍വരദൂര്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
