കൊല്ലം: ആദ്യഭാര്യ രശ്മിയെ കൊലപ്പെടുത്തിയ കേസില് ജഡ്ജിക്ക് 25ലക്ഷം കോഴ കൊടുത്താണ് തനിക്ക് ശിക്ഷ വാങ്ങിത്തന്നതെന്ന ബിജുരാധാകൃഷ്ണന്റെ ആരോപണത്തിനെതിരെ കോടതി അലക്ഷ്യ കേസ് നല്കുമെന്ന് രശ്മിയുടെ പിതാവ് പൊയിലക്കട കെ. പരമേശ്വരന്പിള്ള പറഞ്ഞു. ബിജുരാധാകൃഷ്ണന്റെ മാതാവിന് കൊട്ടാരക്കരയിലെ ഒരു ഉയര്ന്ന നേതാവുമായി അടുത്ത ബന്ധമുണ്ട്. രശ്മി വധക്കേസിന്റെ എല്ലാ ഘട്ടങ്ങളിലും പോലീസിനെ സ്വാധീനിക്കാന് ഈ നേതാവ് ശ്രമിച്ചിരുന്നുവെന്നും അദ്ദേഹം ആരോപിച്ചു.
2006 ഫെബ്രുവരി നാലിനാണ് രശ്മി കൊല്ലപ്പെടുന്നത്. അത് ആദ്യം ആത്മഹത്യയാക്കി മാറ്റുകയായിരുന്നു. ഇന്നത്തെ കൊല്ലം മേയര് രാജേന്ദ്രബാബുവുമായി താന് അന്ന് ആഭ്യന്തര മന്ത്രിയായിരുന്ന കോടിയേരിയെ പോയിക്കണ്ടു. ക്രൈംബ്രാഞ്ചിന് കേസ് വിട്ടു എന്നതൊഴിച്ചാല് ഒരു അന്വേഷണവും നടന്നിരുന്നില്ലെന്നും പരമേശ്വരന്പിള്ള പറഞ്ഞു. സ്പെഷ്യല് പ്രോസിക്യൂട്ടറായി അഡ്വ. മോഹന്രാജിനെ നിയമിച്ചത് തന്റെ അപേക്ഷ പ്രകാരമായിരുന്നുവെന്ന് പരമേശ്വരന് പിള്ള പറഞ്ഞു.
രശ്മി കൊലക്കേസും സോളാര് കേസും തമ്മില് ഒരു ബന്ധവും ഇല്ല. ഇത് കൂട്ടിക്കുഴക്കാന് അയാള് ശ്രമിക്കുന്നത് വലിയ ലക്ഷ്യം വച്ചാണ്. സോളാര് കേസിന്റെ പരിധിയില് വരാത്ത രശ്മി വധക്കേസിനെ സംബന്ധിച്ച് പരാമര്ശം അനുവദിക്കാന് പാടില്ലാത്തതായിരുന്നു. ഈ കൊലപാതകം ആത്മഹത്യ ആക്കാന് ശ്രമിച്ച രാഷ്ട്രീയക്കാരും പോലീസ് ഉദ്യോഗസ്ഥരും ഉള്പ്പെടെയുള്ള താല്പര്യക്കാര് ഇതിന്റെ പിന്നിലുണ്ട്. കേസില് നിന്ന് ഊരാന് കഴിയും എന്ന തെറ്റായ ധാരണയും അയാള്ക്ക് ഉണ്ടാകാമെന്നും പരമേശ്വരന് പിള്ള പറഞ്ഞു. രാഷ്ട്രീയ കാര്യങ്ങളില് എനിക്ക് താല്പര്യമില്ലെന്നും അദ്ദേഹം പറഞ്ഞു.
