കാഞ്ഞിരപ്പള്ളി: തീര്ഥാടനകാലത്ത് ഗതാഗത തിരക്കിനാല് വീര്പ്പുമുട്ടുന്ന കാഞ്ഞിരപ്പള്ളി പട്ടണത്തില് ഗതാഗത പരിഷ്ക്കാരം നടപ്പിലാക്കണമെന്ന് താലൂക്ക് വികസന സമിതി യോഗത്തില് ആവശ്യം. പൊതുപ്രവര്ത്തകനായ ജോസ് പ്രകാശ് കിടങ്ങന് നല്കിയ പരാതിയിലാണ് യോഗത്തില് വിഷയം ചര്ച്ച ചെയ്തത്. തിരക്ക് ദിനംതോറും കൂടുന്ന സാഹചര്യത്തില് ടൗണില് പ്രവേശിക്കാതെ വാഹനങ്ങള് വഴിതിരിച്ച് വിടണമെന്നാണ് അഭിപ്രായമുയര്ന്നത്.
കാഞ്ഞിരപ്പള്ളി പോലീസ് സ്റ്റേഷനു വേണ്ടിയുള്ള സ്ഥലം ആഭ്യന്തരവകുപ്പിന് കൈമാറുമെന്നുള്ള തീരുമാനം നടപ്പായില്ലെന്ന് പരാതിയുയര്ന്നു. റവന്യൂ വകുപ്പിന്റെ കീഴിലുള്ള 11 സെന്റ് സ്ഥലം ആഭ്യന്തരവകുപ്പിന് കൈമാറുമെന്ന് കഴിഞ്ഞ ജനുവരിയില് നടന്ന ജനസമ്പര്ക്ക പരിപാടിയില് മുന് ഗ്രാമപഞ്ചായത്ത് പ്രസിഡന്റ് പി. എ. ഷെമീറിന് ഉറപ്പ് നല്കിയിരുന്നു.
പാലാ റോഡിലെ ഒന്നാംമൈലില് നിന്നാരംഭിക്കുന്ന തോപ്പില്പടി, താന്നിമൂട് റോഡ് ഒരു മാസത്തിനകം സഞ്ചാരയോഗ്യമാക്കുമെന്ന് കഴിഞ്ഞ ഫെബ്രുവരിയില് നടത്തിയ വികസനസമിതി യോഗത്തില് ഉറപ്പ് നല്കിയെങ്കിലും പാലിച്ചില്ല. 13 പരാതികളാണ് ജില്ലാ പഞ്ചായത്തംഗം സെബാസ്റ്റിയന് കുളത്തുങ്കലിന്റെ അധ്യക്ഷതയില് ചേര്ന്ന യോഗത്തില് ലഭിച്ചത്. ഡെപ്യൂട്ടി തഹസീല്ദാര്മാരായ ജി. അജിത്കുമാര്, സുനില്കുമാര് പി. എസ്, കോരുത്തോട് പഞ്ചായത്ത് പ്രസിഡന്റ് പി. കെ. സുധീര്, കൂട്ടിക്കല് പഞ്ചായത്ത് പ്രസിഡന്റ് ബിന്ദു രവീന്ദ്രന്, മോളിക്കുട്ടി തോമസ്, മാത്യു ആനിത്തോട്ടം, പാപ്പച്ചന് പറമ്പില് തുടങ്ങിയവര് പങ്കെടുത്തു.
