ന്യൂദല്ഹി:മലിനീകരണം തടയുന്നതിന്റെ ഭാഗമായി, പത്തുവര്ഷം പഴക്കമുള്ള സ്വകാര്യേതര വാഹനങ്ങള് റോഡില്നിന്ന് ഒഴിവാക്കുന്ന സമഗ്രപദ്ധതി നയം അവതരിപ്പിക്കാന് കേന്ദ്ര സര്ക്കാര്. വാണിജ്യാവശ്യങ്ങള്ക്കുപയോഗിക്കുന്ന വാഹനങ്ങള് പത്തുവര്ഷം കഴിഞ്ഞാല് നിരത്തിലിറക്കാന് അനുവദിക്കില്ല. പകരം പുതിയ വാഹനം വാങ്ങാന് 10 ലക്ഷത്തിന് 2.5 ലക്ഷം രൂപവരെ വിവിധ തരത്തിലുള്ള ആനുകൂല്യങ്ങള് നല്കുന്ന വ്യവസ്ഥകള് ഉള്പ്പെടുന്ന നയമായിരിക്കും അവതരിപ്പിക്കുകയെന്ന് കേന്ദ്ര ഗതാഗത മന്ത്രി നിതിന് ഗഡ്കരി പറഞ്ഞു. എന്നാല്, 15 വര്ഷംവരെ പഴക്കമുള്ള ട്രക്കുകളോ ബസ്സുകളോ ഉടന് നിരോധിക്കാന് ആലോചനയില്ല.
പത്തുവര്ഷത്തിനുമേല് പഴക്കമുള്ള പൊതുവാഹനങ്ങള് നശിപ്പിച്ചുകളയും. അവയ്ക്ക് യഥാര്ത്ഥ വിലയുടെ 10 മുതല് 15 ശതമാനം വരെ വില ലഭ്യമാക്കും. പത്തുലക്ഷമാണ് യഥാര്ത്ഥ വാഹന വിലയെങ്കില് അതിന്റെ 10 ശതമാനം വില കിട്ടും. വാങ്ങിയ കാലത്തെ വിലയായിരിക്കും കണക്കാക്കുക.
നിര്മ്മാതാവിനും സര്ക്കാരിനും നഷ്ടമുണ്ടാകാത്ത തരത്തില് വിവിധ നികുതിയിളവുകള് അനുവദിക്കും. സര്ക്കാര് അരലക്ഷം മുതല് 60,000 രൂപവരെ പുതിയ വണ്ടിയില് ഇളവുനല്കും. പുതിയ വണ്ടി വാങ്ങാന് പഴയവണ്ടി കൊടുക്കുമ്പോള് അരലക്ഷം മുതല് ഒരു ലക്ഷം വരെ കമ്പനികളില്നിന്ന് ഇളവു കൊടുക്കാന് സംവിധാനം ഉണ്ടാക്കും. അങ്ങനെ ആകെക്കൂടി രണ്ടര ലക്ഷം രൂപവരെ പുതിയ വണ്ടിവാങ്ങുന്നവര്ക്കു ലഭ്യമാക്കും.
പുതിയ വാഹനങ്ങള് മലിനീകരണം കുറയ്ക്കും. പുതിയ വാഹനങ്ങള് വിപണിയിലെത്തുന്നത് നിര്മ്മാണ മേഖലയിലും മേക്ക് ഇന്ത്യാ പദ്ധതിയിലും വലിയ നേട്ടങ്ങള് ഉണ്ടാക്കും. പാരീസില് നടന്ന ആഗോള താപന നിയന്ത്രണത്തിനുള്ള കാലാവസ്ഥാ വ്യതിയാന സമ്മേളനത്തിലെ തീരുമാനങ്ങള് ഭാരതത്തില് നടപ്പാക്കുന്നതിനു വേഗത കൂട്ടാനാകും. പുതിയ വാഹന നയം വിവിധ തരത്തില് രാജ്യത്തിനു നേട്ടമുണ്ടാക്കും.
