ന്യൂദല്ഹി: ഒറ്റ-ഇരട്ട അക്കനമ്പറുകളുള്ള വാഹനങ്ങള്ക്ക് ജനുവരി ഒന്നു മുതല് ഒരുമിച്ച് ദല്ഹി നഗരത്തില് പ്രവേശിക്കാനാകില്ല. നഗരത്തിലെ അന്തരീക്ഷ മലിനീകരണം കുറയ്ക്കുന്നതിനായി കേജ്രിവാള് സര്ക്കാരാണ് വിചിത്രമായ തീരുമാനം സ്വീകരിച്ചിരിക്കുന്നത്. സ്വകാര്യ വാഹനങ്ങള്ക്കാണ് നിയന്ത്രണം. പൊതുമേഖലാ-സര്ക്കാര് വാഹനങ്ങളെ നിരോധനത്തില് നിന്നും ഒഴിവാക്കിയിട്ടുണ്ട്.
ഏറ്റവും അന്തരീക്ഷ മലിനീകരണമുള്ള നഗരമായി മാറിയ ദല്ഹിയില് പഴയ വാഹനങ്ങള് നിരോധിക്കുന്നതടക്കമുള്ള കാര്യങ്ങള് ഹൈക്കോടതി പരിഗണിക്കുന്നതിനിടെയാണ് ഒരു വിഭാഗം വാഹനങ്ങള് തന്നെ നിരോധിച്ച് സംസ്ഥാന സര്ക്കാര് രംഗത്തെത്തിയത്. ഒറ്റ അക്ക നമ്പരുകളുള്ള വാഹനങ്ങള് നഗരത്തില് ഓടിക്കുന്ന ദിവസം ഇരട്ട അക്ക നമ്പറുകളുള്ള വാഹനങ്ങള് ഓടിക്കാന് പാടില്ല എന്നതാണ് പുതിയ തീരുമാനം. ദല്ഹി നഗരത്തിലെ വാഹനങ്ങള്ക്ക് മാത്രമല്ല, നഗരത്തിന് പുറത്തുനിന്നും വരുന്ന വാഹനങ്ങള്ക്കും നിരോധനം ബാധകമാണ്. പുതിയ തീരുമാനത്തിലൂടെ നഗരത്തില് വാഹനങ്ങളുണ്ടാക്കുന്ന മലിനീകരണം പകുതിയായി കുറയ്ക്കാനാവുമെന്നാണ് സര്ക്കാര് പ്രതീക്ഷ.
കല്ക്കരി ഉപയോഗിച്ച് പ്രവര്ത്തിക്കുന്ന ദല്ഹി ബദര്പൂരിലെ വൈദ്യുതനിലയവും സംസ്ഥാന സര്ക്കാര് അടച്ചു പൂട്ടിയിട്ടുണ്ട്.
ദിവസവും ആയിരത്തോളം പുതിയ കാറുകളാണ് ദല്ഹിയിലെ നിരത്തുകളില് ഇറങ്ങുന്നതെന്നാണ് കണക്ക്. മുംബൈ, കല്്കത്ത, ചെന്നൈ എന്നീ നഗരങ്ങളിലേക്കാള് കാറുകളാണ് ദല്ഹിയിലുള്ളതെന്നാണ് കണക്ക്. എന്നാല് ആംആദ്മി പാര്ട്ടി സര്ക്കാരിന്റെ തീരുമാനം ഇടത്തരക്കാരായ ജനങ്ങളെ കാര്യമായി ബാധിക്കും. സമ്പന്നര് മറ്റൊരു നമ്പറിലുള്ള വാഹനം കൂടി വാങ്ങി നിലവിലുള്ള വാഹനങ്ങളുടെ എണ്ണം ഇനിയും വര്ദ്ധിപ്പിക്കാനും സാധ്യതയുണ്ട്.
എന്നാല് ആംആദ്മി പാര്ട്ടി സര്ക്കാരിന്റെ തീരുമാനത്തിനെതിരെ ദല്ഹി പോലീസ് രംഗത്തെത്തിയിട്ടുണ്ട്. ഇത്തരത്തിലൊരു തീരുമാനം എടുക്കുന്നതിന് മുമ്പ് ഗതാഗതം കൈകാര്യം ചെയ്യുന്ന വകുപ്പെന്ന നിലയില് പോലീസിനോട് ആലോചിച്ചിട്ടു പോലുമില്ലെന്ന് ദല്ഹി പോലീസ് കമ്മീഷണര് ബി.എസ്. ബാസി പറഞ്ഞു. ഒറ്റ-ഇരട്ട അക്ക നമ്പറുകള് പരിശോധിക്കുകയെന്നത് അസാധ്യമായ കാര്യമാണെന്നും തീരുമാനം എടുക്കും മുമ്പ് ട്രാഫിക്ക് വിഭാഗത്തിന് ഉത്തരവ് നല്കേണ്ടതാണെന്നും കമ്മീഷണര് പറഞ്ഞു. ശാസ്ത്രീയമായി രൂപകല്പ്പന ചെയ്യാത്ത റോഡുകളാണ് നഗരത്തിലുള്ളത്. ഇത്തരത്തിലുള്ള തീരുമാനങ്ങള് നടപ്പിലാക്കുക അസാധ്യമാണ്, കമ്മീഷണര് കൂട്ടിച്ചേര്ത്തു.
