ന്യൂദല്ഹി: ദല്ഹി നിയമസഭാംഗങ്ങള്ക്ക് 400 ശതമാനം ശമ്പളം വര്ദ്ധിപ്പിച്ച് അരവിന്ദ് കേജ്രിവാള് സര്ക്കാര് ഉത്തരവിറക്കി. പ്രതിമാസം 2.1 ലക്ഷത്തിലധികം രൂപയാണ് ഇനിമുതല് ദല്ഹിയിലെ എംഎല്എമാര്ക്ക് ലഭിക്കുക. ശമ്പളവര്ദ്ധനവ് ശുപാര്ശ ചെയ്യുന്ന ബില്ലിന് ഇന്നലെ ദല്ഹി നിയമസഭ അംഗീകാരം നല്കി.
പ്രധാനമന്ത്രിക്ക് ലഭിക്കുന്നതിലും വളരെയധികം രൂപയാണ് ഇനിമുതല് ദല്ഹിയിലെ എംഎല്എമാര്ക്ക് ലഭിക്കുക. അടിസ്ഥാന ശമ്പളമായ 60,000 അടക്കം ആകെ 1.6 ലക്ഷം രൂപയാണ് പ്രധാനമന്ത്രിക്ക് ലഭിക്കുന്നത്. എന്നാല് ദല്ഹിയിലെ എംഎല്എയ്ക്ക് അടിസ്ഥാന ശമ്പളമായ 50,000 ഉള്പ്പെടെ 2.1 ലക്ഷത്തിലധികം രൂപ വരും മാസശമ്പളം. അടിസ്ഥാന ശമ്പളം 12,000 ആയിരുന്നതാണ് 50,000 ആക്കി ഉയര്ത്തിയത്. നിലവില് ലഭിച്ചിരുന്ന ആകെ ശമ്പളം 88,000 ആണ്. മണ്ഡല അലവന്സ് 18,000ത്തില് നിന്നും 50,000 ആക്കി ഉയര്ത്തിയിട്ടുണ്ട്. മറ്റ് അലവന്സുകളായി 70,000 രൂപയും ഓഫീസ് അസിസ്റ്റന്റിനായി 30,000 രൂപയും ലഭിക്കും. ഓഫീസിനായി 25000 രൂപയാണ് ലഭിക്കുക. നിയമസഭയില് ഒരു ദിവസം ഒപ്പിട്ടാല് 2000 രൂപവീതവും ലഭിക്കും.
ദല്ഹിയിലെ സംസ്ഥാന മന്ത്രിമാരുടെ ശമ്പളവും വന്തോതില് ഉയര്ത്തിയിട്ടുണ്ട്. 20,000 അടിസ്ഥാന ശമ്പളം ലഭിച്ചിരുന്ന മന്ത്രിമാര്ക്ക് ഇനി മുതല് 80,000 അടിസ്ഥാന ശമ്പളം ലഭിക്കും. അലവന്സുകള് ഉള്പ്പെടെ രണ്ടര ലക്ഷത്തോളം രൂപ ഇവര്ക്ക് ലഭിക്കും. ദല്ഹി നിയമസഭ പാസാക്കിയ ബില്ലിന് കേന്ദ്രസര്ക്കാരും രാഷ്ട്രപതിയും അംഗീകാരം നല്കിയാല് രാജ്യത്തെ ഏറ്റവും ഉയര്ന്ന ശമ്പള നിരക്കായിരിക്കും ആംആദ്മി പാര്ട്ടി എംഎല്എമാര്ക്കും മന്ത്രിമാര്ക്കും ലഭിക്കുക. 70 അംഗ നിയമസഭയില് 67 പേരും ആംആദ്മി പാര്ട്ടിക്കാരാണ്.
പ്രതിപക്ഷമായ ബിജെപി എംഎല്എമാര് ക്രമാതീതമായ ശമ്പളവര്ദ്ധനവിനെതിരെ രംഗത്തെത്തിയിട്ടുണ്ട്.
എംഎല്എ, മന്ത്രി. മുഖ്യമന്ത്രി എന്നിവരുടെയെല്ലാം ശമ്പളത്തില് രണ്ടര ഇരട്ടിയോളം വര്ദ്ധനവാണ് കേജ്രിവാള് സര്ക്കാര് ലക്ഷ്യമിടുന്നത്. എംഎല്എമാരും മന്ത്രിമാരും ജോലിയില് കൂടുതല് വ്യാപൃതരാകുന്നതിനായാണ് ശമ്പളം വര്ദ്ധിപ്പിക്കുന്നതെന്ന് ഉപമുഖ്യമന്ത്രി മനീഷ് സിസോദിയ ബില് അവതരിപ്പിച്ചുകൊണ്ട് നിയമസഭയില് വിശദീകരിച്ചു.
മുന് ലോക്സഭാ സെക്രട്ടറി ജനറല് പിഡിടി ആചാരി അധ്യക്ഷനായ മൂന്നംഗ സമിതിയുടെ ശുപാര്ശ അനുസരിച്ചാണ് ശമ്പളവര്ദ്ധന ബില് എഎപി സര്ക്കാര് സഭയില് അവതരിപ്പിച്ചത്. സമിതിയുടെ എല്ലാ ശുപാര്ശകളും സര്ക്കാര് അംഗീകരിക്കുകയായിരുന്നെന്ന് സിസോദിയ പറഞ്ഞു. നിരവധി ക്ഷേമപദ്ധതികളും വാഗ്ദാനങ്ങളും പ്രഖ്യാപിച്ച് അധികാരത്തിലെത്തിയ ആംആദ്മി പാര്ട്ടി സര്ക്കാര് ജനങ്ങള്ക്ക് നല്കിയ വാക്കു മറന്ന് സ്വന്തം ആനുകൂല്യങ്ങള് നേടിയെടുക്കാനുള്ള ശ്രമത്തിലാണ്. സാമൂഹ്യമാധ്യമങ്ങളില് അടക്കം കെജ്രിവാള് സര്ക്കാരിന്റെ ശമ്പളവര്ദ്ധന ബില്ലിനെതിരെ രൂക്ഷ വിമര്ശനമാണ് ഉയര്ന്നിരിക്കുന്നത്.
