സ്വന്തം ലേഖകന്‍
കണ്ണൂര്‍: ഉത്തര മലബാറിന്റെ വികസന കുതിപ്പില്‍ പുതിയൊരധ്യായം കുറിക്കാന്‍ ഉതകുന്ന പൊതുമേഖല-സ്വകാര്യ പങ്കാളിത്തതോടെ യാഥാര്‍ത്ഥ്യമാകുന്ന രാജ്യത്തെ രണ്ടാമത്തെ ഗ്രീന്‍ഫീല്‍ഡ് വിമാനത്താവളമായ കണ്ണൂര്‍ വിമാനത്താവളം പരീക്ഷണ പറക്കല്‍ വൈകുമെന്ന് സൂചന. ഈ മാസം 31 ന് പരീക്ഷണപ്പറക്കല്‍ നടത്താനായിരുന്നു ആദ്യ തീരുമാനം. ഇതിനായി നിര്‍മ്മാണ പ്രവര്‍ത്തനങ്ങള്‍ വളരെ വേഗത്തില്‍ പുരോഗമിച്ചു വരികയായിരുന്നു. എന്നാല്‍ ഇടയ്‌ക്ക് പെയ്ത മഴ നിര്‍മ്മാണ പ്രവര്‍ത്തനങ്ങളെ തടസ്സപ്പെടുത്തിയത് പ്രതീക്ഷകളെ തകിടം മറിക്കുകയായിരുന്നു. വാണിജ്യാടിസ്ഥാനത്തില്‍ വിമാനസര്‍വ്വീസിന് അടുത്ത മേയില്‍ തന്നെ തുടക്കം കുറിക്കാനാണ് കിയാലും നിര്‍മ്മാണകമ്പനിയായ എല്‍ ആന്‍ഡ് ടിയും ലക്ഷ്യമിട്ടിരുന്നതെങ്കിലും അതും 2016 ഡിസംബര്‍ അവസാനം മാത്രമേ പ്രവര്‍ത്തന സജ്ജമാകൂ.
മട്ടന്നൂര്‍ മൂര്‍ഖന്‍പറമ്പില്‍ നിര്‍മ്മാണം പുരോഗമിക്കുന്ന കണ്ണൂര്‍ വിമാനത്താവളത്തിന്റെ റണ്‍വേ 3400 മീറ്ററാണ് ഉദ്ദേശിച്ചിരുന്നതെങ്കിലും നിലവില്‍ 3050 മീറ്റര്‍ റണ്‍വേ നിര്‍മ്മാണമാണ് പുരോഗമിക്കുന്നത്. ടെര്‍മിനല്‍ കെട്ടിടം, അനുബന്ധകെട്ടിടങ്ങള്‍ എന്നിവയുടെ പ്രവൃത്തിയും നടന്നു വരുന്നുണ്ട്.വിമാനങ്ങല്‍ നിര്‍ത്തിയിടാനുളള ഏപ്രണ്‍ മേഖലയുടെ നിര്‍മ്മാണവും പുരോഗമിക്കുകയാണ്.പാസിഞ്ചര്‍ ടെര്‍മിനല്‍,എയര്‍ട്രാഫിക് കണ്‍ട്രോളര്‍ കെട്ടിടം തുടങ്ങിയവയുടെ നിര്‍മ്മാണവും പുരോഗമിക്കുകയാണ്. 80.000 ചതുരശ്ര മീറ്റര്‍ വിസ്തീര്‍ണ്ണത്തിലാണ് ടെര്‍മിനല്‍ നിര്‍മ്മാണം പുരോഗമിക്കുന്നത്. എയര്‍ട്രാഫിക് കണ്‍ട്രോളര്‍ കെട്ടിടത്തിന് 1200 ചതുരശ്ര അടിയാണുളളത്.
ചെറുവിമാനങ്ങള്‍ പറന്നിറങ്ങുവാന്‍ പാകത്തില്‍ റണ്‍വേയുടെ 2150 മീറ്റര്‍ ടാറിംഗും കോണ്‍ക്രീറ്റ് പ്രവൃത്തിയും ഇതിനകം പൂര്‍ത്തിയായി. വിവിധ രാജ്യങ്ങളിലേക്കുള്ള സര്‍വീസിന് സാദ്ധ്യതയുണ്ടെന്നിരിക്കെ, ടെര്‍മിനല്‍ കെട്ടിടങ്ങളുടെ സൗകര്യവും അതിനനുസരിച്ച് വിപുലീകരിക്കാനുളള ഒരുക്കത്തിലാണ് അധികൃതര്‍.
ഉത്തരമലബാറുകാരുടെ ചിരകാല ആവശ്യത്തിനൊടുവില്‍ 2008 ഫിബ്രവരി മാസത്തിലാണ് വ്യോമയാന മന്ത്രാലയം കണ്ണൂര്‍ വിമാനത്താവളത്തിന്റെ പ്രൊജക്ടിന് അനുമതി നല്‍കിയത്. 2010 ഡിസംബര്‍ 17ന് വിമാനത്താവളത്തിന്റെ ശിലാസ്ഥാപനം നടത്തുകയും ചെയ്തു. 2014 ഫിബ്രവരി 2ന് റണ്‍വെയുടെ നിര്‍മ്മാണം ആരംഭിച്ചു. മൊത്തം 2165 ഏക്കര്‍ സ്ഥലം വിമാനത്താവളം യാഥാര്‍ത്ഥ്യമാകുന്നതോടെ ഇതിന്റെ ഭാഗമായിമാറും. വര്‍ഷത്തില്‍ 4.67 മില്ല്യന്‍ യാത്രക്കാരെ പ്രതീക്ഷിക്കുന്ന വിമാനത്താവളത്തില്‍ 60758 ടണ്‍ കാര്‍ഗോ വര്‍ഷത്തില്‍ എത്തിച്ചേരുമെന്നാണ് പ്രതീക്ഷ. എപ്രണ്‍, ചുറ്റുമതില്‍ എന്നിവയുടെ പ്രവര്‍ത്തി 60 ശതമാനത്തോളം പൂര്‍ത്തിയായിട്ടുണ്ട്. വിമാനത്താവളം യാഥാര്‍ത്ഥ്യമാകുന്നതോടെ കണ്ണൂര്‍, വയനാട്, കാസര്‍ ഗോഡ് ജില്ലകളില്‍ നിന്നുള്ള യാത്രക്കാര്‍ക്കും, വീരാജ്‌പേട്ട തുടങ്ങിയ പ്രദേശങ്ങളിലുള്ളവര്‍ക്കും വിദേശയാത്രകളള്‍ക്കും ആഭ്യന്തര യാത്രകള്‍ക്കും ഏറെ സഹായകരമാകും.
