ന്യൂദല്ഹി: ആണ്പെണ് വത്യാസമില്ലാതെ ദേശീയ സ്കൂള് കായികമേള ഒന്നിച്ചു നടത്തണമെന്ന് കേന്ദ്രസര്ക്കാര് നിര്ദ്ദേശിച്ചു. ഇതുസംബന്ധിച്ച് ദേശീയ സ്കൂള് ഗെയിംസ് ഫെഡറേഷന് നിര്ദ്ദേശം നല്കുമെന്ന് കേന്ദ്രകായിക സെക്രട്ടറി രാജീവ് യാദവ് അറിയിച്ചു.
മഹാരാഷ്ട്രയില് ഗെയിംസ് നടത്താനാവില്ലെങ്കില് കേരളം വേദിയാക്കുന്നത് സര്ക്കാര് പരിഗണിക്കുമെന്നും കായിക സെക്രട്ടറി പറഞ്ഞു. ദേശീയ സ്കൂള് കായികമേള ആണ്കുട്ടികള്ക്കും പെണ്കുട്ടികള്ക്കും വെവ്വേറെയായി നടത്തുന്നതിന് ഗെയിംസ് ഫെഡറേഷന് തീരുമാനിച്ചിരുന്നു.
എന്നാല് കേന്ദ്രസര്ക്കാര് ഇതിനെ ശക്തമായി എതിര്ത്തു. വര്ഷങ്ങളായി കേരളം ഓവറോള് ചാമ്പ്യന്മാരാണ്. ഇത് തടയുന്നതിനായാണ് ദേശീയ ഫെഡറേഷനെ സ്വാധീനിച്ച് വടക്കന് സംസ്ഥാനങ്ങള് ആണ്കുട്ടികള്ക്കും പെണ്കുട്ടികള്ക്കും വത്യസ്ത മേള നടത്താമെന്ന ശുപാര്ശ അംഗീകരിപ്പിച്ചത്. എന്നാല് കേരളം അടക്കമുള്ള സംസ്ഥാനങ്ങള് ഇതിനെതിരെ രംഗത്തെത്തി. കേന്ദ്രസര്ക്കാരും ഇതിനെതിരായ നിലപാടാണ് സ്വീകരിച്ചത്.
മഹാരാഷ്ട്രയിലെ പൂനയില് ആണ്കുട്ടികള്ക്കുള്ള മേള ഡിസംബര് അവസാന വാരവും പെണ്കുട്ടികള്ക്കുള്ള മത്സരങ്ങള് ജനുവരിയില് നാസിക്കിലും നടത്താനായിരുന്നു ഫെഡറേഷന്റെ തീരുമാനം. കേന്ദ്രകായികമന്ത്രാലയത്തിന്റെ ഇടപെടല് ഉണ്ടായതോടെ ആണ് പെണ് വത്യാസമില്ലാതെ മേള നടത്താനുള്ള വേദി കണ്ടുപിടിക്കേണ്ടിവരും. ഇല്ലെങ്കില് മേള കേരളത്തിലേക്ക് മാറ്റിയേക്കുമെന്നും സൂചനയുണ്ട്.
