കൊല്ലം: സാമൂഹ്യനീതിയുടെ സന്ദേശവുമായി എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് നയിക്കുന്ന സമത്വമുന്നേറ്റയാത്രയെ വരവേല്ക്കാന് നാടും നഗരവും അണിഞ്ഞൊരുങ്ങി. നാളെ വൈകിട്ട് മൂന്നിന് ജില്ലാ അതിര്ത്തിയില് പ്രവേശിക്കുന്ന യാത്ര നാലിന് ക്യുഎസി മൈതാനത്തെത്തും. ഇവിടെയാണ് പൊതുസമ്മേളനം നടക്കുന്നത്.
ജില്ലയിലെ പത്ത് യൂണിയനുകളില് നിന്നുമായി പതിനായിരം പേര് പങ്കെടുക്കുന്ന സമ്മേളനമാണ് സംഘടിപ്പിക്കുന്നത്. ഇത്രയും പേര്ക്ക് ഇരിക്കാവുന്ന കൂറ്റന് പന്തലിന്റെ അവസാനഘട്ടപണികള് പൂര്ത്തിയായിവരികയാണ്. നൂറ് പേര്ക്ക് ഇരിപ്പിടമുള്ള വേദിയാണ് തയ്യാറാക്കുന്നത്. യാത്രയുടെ പ്രചാരണഭാഗമായി ശക്തികുളങ്ങര മുതല് പാരിപ്പള്ളി വരെയുള്ള പാതകളില് ഉള്പ്പെടുന്ന എല്ലാ പാലങ്ങളിലും എസ്എന്ഡിപിയുടെതടക്കം യാത്രയില് പങ്കാളിത്തമുള്ള സംഘടനകളുടെ കൊടിതോരണങ്ങള് സ്ഥാപിച്ചിട്ടുണ്ട്.
നഗരത്തില് വര്ണാഭമായ ഒരുക്കങ്ങളാണ് സജ്ജമാക്കിയിട്ടുള്ളത്. നൂറ് ഫഌക്സ് ബോര്ഡുകളാണ് പ്രചരണഭാഗമായി പലയിടങ്ങളിലായി സ്ഥാപിച്ചിരിക്കുന്നത്. യാത്രാവിജയം കാംക്ഷിക്കുന്ന സുമനസുകളുടെ സഹായത്തോടെ സ്ഥാപിച്ച കൂറ്റന് ഹോര്ഡിംഗുകള് ഇതിനോടകം ശ്രദ്ധേയമായിട്ടുണ്ട്. പത്തനംതിട്ടയില് നിന്നുമാണ് യാത്ര കൊല്ലത്തേക്ക് പ്രവേശിക്കുന്നത്. അഞ്ചിന് തിരുവനന്തപുരം ശംഖുമുഖത്താണ് സമാപനസമ്മേളനം. ഭൂരിപക്ഷസമുദായങ്ങളുടെ ഐക്യം കാലഘട്ടത്തിന്റെ ആവശ്യമാണെന്ന വിളംബരത്തോടെയാണ് ജില്ലയിലെ സ്വീകരണചടങ്ങുകള്ക്ക് ഒരുക്കങ്ങള് നടത്തിയിട്ടുള്ളതെന്ന് എസ്എന്ഡിപി യോഗം കൊല്ലം താലൂക്ക് യൂണിയന് ജനറല് സെക്രട്ടറി എന്.രാജേന്ദ്രന് അറിയിച്ചു.
