രണ്ട് വര്ഷത്തിനിടെ ബൈക്കപകടത്തില് മരണമടഞ്ഞത് എട്ട് യുവാക്കള്
തൊടുപുഴ: തൊടുപുഴ-കുമാരമംഗലം റോഡില് വാഹനാപകടങ്ങളില് കഴിഞ്ഞ രണ്ട് വര്ഷത്തിനിടെ മരിച്ചത് 8 യുവാക്കളാണ്. എല്ലാം ബൈക്ക് അപകടങ്ങള്. കഴിഞ്ഞ ദിവസം ഇവിടെ ബൈക്കില് പിക്ക്-അപ്പ് ജീപ്പ് ഇടിച്ചുണ്ടായ അപകടത്തില് നാഗപുഴ സ്വദേശിയായ യുവാവ് മരിച്ചതാണ് അവസാന സംഭവം. ചെറുതും വലുതുമായ നിരവധി അപകടങ്ങള് ഈ വഴിയില് നടക്കുമ്പോള് വേണ്ട നടപടികള് എടുക്കാന് അധികൃതര് തയ്യാറാകുന്നില്ല. മികച്ച രീതിയില് ടാര് ചെയ്ത റോഡുകളാണെങ്കിലും ആവശ്യത്തിന് വീതിയില്ലാത്തതാണ് അപകടങ്ങള് പെരുകുവാന് കാരണമാവുന്നത്. പല ഇടങ്ങളിലും റോഡിന് വീതി വളരെ കുറവാണ്. ശ്രദ്ധയില്ലാതെ ഓവര്ടേക്ക് ചെയ്ത് വരുന്ന വാഹനങ്ങളാണ് ഇവിടെ കൂടുതലായും അപകടങ്ങള് വരുത്തിവയ്ക്കുന്നത്. കഷ്ടിച്ച് രണ്ട് ബസുകള് മാത്രം കടന്നുപോകുന്നതിനുള്ള വീതി മാത്രമാണ് റോഡിനുള്ളത്. ഓട്ടോറിക്ഷയെ മറികടന്ന് ബസ് കയറിവന്നാല് പോലും എതിര്വശത്തുകൂടി ഒരു ബൈക്കിന് പോലും കടന്നുപോകാന് ബുദ്ധിമുട്ടാണ് ഈ റോഡില്. ഏറ്റവും അധികം അപകടങ്ങള് വരുത്തിവയ്ക്കുന്നത് ഈ റോഡിലെ വളവുകളാണ്. വളവുകളിലെ അശ്രദ്ധമായ ഓവര്ടേക്കിങ്ങാണ് അപകടങ്ങള് വര്ദ്ധിപ്പിക്കുന്നത്. ഒട്ടുമിക്ക വളവുകളിലും എതിര്വശം കാണുവാന് സാധിക്കുകയില്ല എന്നതും അപകടത്തിന്റെ തോത് കൂട്ടുന്നു. റോഡിന് വീതികൂട്ടുന്നതിനായുള്ള പ്രാരംഭ നടപടികള് ആരംഭിച്ചെങ്കിലും നടപടികള് എങ്ങുമെത്തിയിട്ടില്ല. നടപടികള് പേപ്പറില് മാത്രം ഒതുങ്ങുമ്പോള് റോഡില് പൊലിയുന്നത് നിരവധിപ്പേരുടെ സ്വപ്നങ്ങളാണ്. തൊടുപുഴയില് നിന്ന് ഊന്നുകല് വരെ 25 കീ.മി ദൂരമാണുള്ളത്. ഇതില് നഗരത്തില് നിന്ന് 6 കീ.മി. ദൂരം മാത്രം വരുന്ന ഭാഗങ്ങളിലാണ് കൂടുതലും അപകടങ്ങള് നടന്നിട്ടുള്ളത്. അടിയന്തിരമായി വേണ്ട നടപടികള് എടുത്ത് ഈ ഭാഗത്ത് റോഡില് വേണ്ട സുരക്ഷ സംവിധാനങ്ങള് ഒരുക്കണമെന്നാണ് നാട്ടുകാരുടെയും യാത്രക്കാരുടെയും ആവിശ്യം.
