കൊച്ചി: ഗായകന് കെ.ജെ. യേശുദാസ് വര്ഷങ്ങള്ക്കു ശേഷം കൊച്ചിയില് ഒരു മുഴുനീള ശാസ്ത്രീയ സംഗീത വിരുന്നൊരുക്കുന്നു. കലൂര് ഗോകുലം കണ്വെന്ഷന് സെന്ററില് 29ന് വൈകീട്ട് 6 മണിക്കാണ് ‘രാഗസുധ’ സംഗീത സദസ്സ്. കാന്സര് രോഗികള്ക്കായി പ്രവര്ത്തിക്കുന്ന ക്യാന്ക്യൂര് ഫൗണ്ടേഷന് എന്ന സന്നദ്ധ സംഘടനയുടെ ധനശേഖരണത്തിനു വേണ്ടിയാണ് പരിപാടി. കഴിഞ്ഞ എട്ടു വര്ഷമായി 100 ല് പരം കാന്സര് രോഗികളെ സഹായിക്കുകയും നിരവധി കാന്സര് ബോധവല്ക്കരണ പരിപാടികള് സംഘടിപ്പിക്കുകയും ചെയ്തു വരുന്ന ക്യാന്ക്യൂര് ഫൗണ്ടേഷനെ സഹായിക്കാനാണ് യേശുദാസ് ഈ പരിപാടി ഏറ്റെടുത്തത്. വയലിന് – സമ്പത്ത്, മൃദംഗം – എന് ഹരി, ഘടം – തൃപ്പൂണിത്തുറ രാധാകൃഷ്ണന് എന്നിവര് കച്ചേരിക്ക് അകമ്പടിയേകും.
പരിപാടിയുടെ ലോഗോ അനാച്ഛാദനം കൊച്ചി മേയര് സൗമിനി ജെയിന് നിര്വഹിച്ചു. ചടങ്ങില് ക്യാന്ക്യൂര് പ്രസിഡന്റ് വിനു വര്ഗീസ്. സെക്രട്ടറി ആര് മാധവ് ചന്ദ്രന്, ട്രഷറര് മാത്യു ജോസഫ്, സംഘാടക സമിതി ചെയര്മാന് വിവേക് കൃഷ്ണ ഗോവിന്ദ് എന്നിവര് പങ്കെടുത്തു. പ്രമുഖ ഡോക്ടര്മാരായ ജുനൈദ് റഹ്മാന്, കാന്സര് സ്പെഷ്യലിസ്റ്റ് മോഹനന് നായര് എന്നിവരുടെ നേതൃത്വത്തില് എറണാകുളം ജനറല് ആശുപത്രിയുമായി ചേര്ന്ന് എല്ലാ ആഴ്ചയിലും ഓരോ കാന്സര് ക്യാമ്പുകള് സംഘടിപ്പിക്കുന്ന പദ്ധതി ചടങ്ങില് ഉദ്ഘാടനം ചെയ്യും. എറണാകുളം ജനറല് ആശുപത്രി, ഐ എം എ, റോട്ടറി ക്ലബ് എന്നിവരുമായി ചേര്ന്ന് എറണാകുളത്ത് ഒരു അത്യാധുനിക കാന്സര് സ്ക്രീനിംഗ് സെന്റര് തുടങ്ങാനുള്ള പരിപാടിക്കും തുടക്കം കുറിക്കും. പാവപ്പെട്ട രോഗികള്ക്ക് പൂര്ണമായും സൗജന്യമായി മാമ്മോഗ്രാം, അള്ട്രാസൗണ്ട് സ്കാന് എന്നിവയും മറ്റു കാന്സര് ടെസ്റ്റുകളും ചെയ്യാവുന്നതാണ്. 2 മിനിറ്റ് ദൈര്ഘ്യമുള്ള കാന്സര് ബോധവത്കരണ ഹ്രസ്വചിത്രങ്ങളും ചടങ്ങില് ആദ്യമായി അവതരിപ്പിക്കും.
രാഗസുധ സംഗീത സദസ്സിലേയ്ക്കുള്ള പ്രവേശനം പാസ് മൂലം നിയന്ത്രിക്കും. സംഗീതവിദ്യാര്ത്ഥികള്ക്ക് അവരുടെ വിദ്യാഭ്യാസസ്ഥാപനത്തിന്റെ തിരിച്ചറിയല് രേഖകളോടെ 7025003333 എന്ന നമ്പറില് പാസിനായി ബന്ധപ്പെടാവുന്നതാണ്. വിവരങ്ങള്ക്ക്: ആര് മാധവ് ചന്ദ്രന്, സെക്രട്ടറി, ക്യാന്ക്യൂര് ഫൗണ്ടേഷന് ഫോ: 9846031667.
