കൊട്ടാരക്കര: കരീപ്രയിലെ ബിജെപിയുടെ വിജയത്തിന് പൊന്തിളക്കം. സിപിഎം കണ്ണൂര് എന്ന് വീമ്പിളക്കുന്ന കരീപ്ര കാവിയിലേക്ക് വഴിമാറുന്ന കാഴ്ചയാണ് ത്രിതലതെരഞ്ഞെടുപ്പ് ഫലം നല്കുന്ന സൂചന.
ബോംബ് രാഷ്ട്രീയത്തിലൂടെ ആര്എസ്എസിന്റെ പ്രവര്ത്തനം ഇല്ലാതാക്കാന് സിപിഎം കണ്ണൂര്മോഡല് പ്രയോഗിച്ച ജില്ലയിലെ ഏകസ്ഥലമാണ് കരീപ്ര. ഇവിടെ ഇന്ന് ചുവപ്പിനോട് വിടപറഞ്ഞ് കാവിയണിയുന്നവരുടെ എണ്ണം കൂടിവരികയാണ്. സിപിഎമ്മിന്റെ മുന്ബ്രാഞ്ച് സെക്രട്ടറി കൂടിയായിരുന്ന പ്രദീപ്കുമാര് വാക്കനാട് നിന്ന് താമരചിഹ്നത്തില് വിജയിച്ചത് ഇതിന് ഉദാഹരണമാണ്.
പ്രദീപിനെ പരാജയപ്പെടുത്താന് സിപിഎം ഇവിടെ പഠിച്ച പണി പതിനെട്ടും നോക്കിയിട്ടും രണ്ടുവോട്ടുകള്ക്ക് വിജയിച്ചുവെന്നത് ചെറുത്തുനില്പ്പിന്റേയും സഹനത്തിന്റെയും തെളിവാണ്. കഴിഞ്ഞ തെരഞ്ഞെടുപ്പില് പ്ലാക്കോട് നിന്ന് വിജയിച്ച് ഗീതാമണി തുടക്കമിട്ട വിജയരഥമാണ് ഇത്തവണ രണ്ടുപേരെ വിജയിപ്പിക്കാനും അഞ്ചിടത്ത് രണ്ടാംസ്ഥാനത്ത് എത്തി നിര്ണ്ണായക ശക്തിയാകാനും പാര്ട്ടിക്ക് കരുത്തായത്. വികസനം എങ്ങനെയായായിരിക്കണമെന്ന് ഗീതാമണി കരീപ്രക്ക് മുന്നില് അവതരിപ്പിച്ചു. കഴിഞ്ഞതവണ വിജയം 32 വോട്ടിനായിരുന്നുവെങ്കില് ശക്തമായ മത്സരത്തില് ഒത്തുതീര്പ്പ് രാഷ്ട്രീയത്തിലൂടെ പരാജയപെടുത്താന് മുന്നണികള് ശ്രമിച്ചിട്ടും 102 വോട്ട് നേടി വിജയിക്കാന് കഴിഞ്ഞത് അതുകൊണ്ടാണ്. 18 വാര്ഡുകളുള്ള പഞ്ചായത്തില 3841 വോട്ട് നേടി കോണ്ഗ്രസിനെ ബഹുദൂരം പിന്നിലാക്കിയിരിക്കുകയാണ് ബിജെപി.
കരീപ്ര പഞ്ചായത്തില് നേടിയ ഈ മിന്നുന്ന വിജയം ആവര്ത്തിക്കാന് സംഘടനാസംവിധാനം ശക്തിപ്പെടുത്തി ബിജെപി മുന്നോട്ട് പോകുകയാണന്ന് പ്രവര്ത്തനങ്ങള്ക്ക് ചുക്കാന് പിടിച്ച സി.വിജയകുമാര് പറഞ്ഞു.
