തലശ്ശേരി: പയ്യന്നൂര് മേഖലാ വിഎച്ച്എസ്സിയുടെ ആഭിമുഖ്യത്തില് നാളെ തലശ്ശേരിയില് നടക്കുന്ന വൊക്കേഷണല് എക്സ്പോയുടെ ഉദ്ഘാടനച്ചടങ്ങില് അധ്യക്ഷത വഹിക്കുന്നത് ഫസല് വധക്കേസിലെ പ്രതിയും കോടതി അനുമതിയില്ലാതെ കണ്ണൂര് ജില്ലയില് പ്രവേശിക്കാന് പോലുമാകാത്ത നഗരസഭാ കൗണ്സിലര് കാരായി ചന്ദ്രശേഖരന്.
മേള നടക്കുന്ന ചിറക്കര വൊക്കേഷണല് ഹയര് സെക്കന്ററി സ്കൂള് ഉള്പ്പെടുന്ന വാര്ഡിലെ കൗണ്സിലര് സിപിഐയിലെ വാഴയില് ലക്ഷ്മിയാണ്. അതുകൊണ്ടുതന്നെ മുനിസിപ്പല് കൗണ്സിലര് എന്ന നിലയിലാണ് സിപിഎമ്മിലെ കാരായി ചന്ദ്രശേഖരന് അധ്യക്ഷത വഹിക്കുന്നതെന്ന വാദവും ഇവിടെ വിലപ്പോവില്ല. കാരായി ചന്ദ്രശേഖരന് ജയിച്ച വാര്ഡ് ചെള്ളക്കരയാണ്. അത് മേള നടക്കുന്ന സ്കൂളില് നിന്ന് ഏറെ അകലെയാണ്. മേള നടത്തിപ്പുകാരുടെ രാഷ്ട്രീയ താത്പര്യമാണ് ജില്ലയില് പ്രവേശിക്കാന് പോലും അനുവാദം ആവശ്യമുള്ള കൊലക്കേസ് പ്രതിയെ അധ്യക്ഷനാക്കിയതിന് പിന്നിലെന്ന് നാട്ടുകാര് പറയുന്നു. തലശ്ശേരി സബ് കലക്ടര് ഉദ്ഘാടന കര്മ്മം നിര്വഹിക്കുന്ന ചടങ്ങില് ഇത്തരമൊരാളെ സംഘാടകര് അധ്യക്ഷനായി നിശ്ചയിച്ചത് വരുംനാളുകളില് വിവാദമാകുന്നത് മേളയുടെ ഉദ്ദേശ ശുദ്ധിയെത്തന്നെ ചോദ്യം ചെയ്യുമെന്ന കാര്യത്തില് സംശയമില്ല.
