ഒക്ടോബര് 13ന് ‘ശാശ്വതീകാനന്ദയുടെ മരണം: ആരോപണങ്ങള് അന്വേഷിച്ചു തള്ളിയത്’ എന്ന ടി.എസ്. നീലാംബരന്റെ വാര്ത്ത വായിച്ചു. അതില് ശിവഗിരിമഠാധിപതി തന്നെയാണ് എസ്എന് ട്രസ്റ്റിന്റെ ചുമതലക്കാരന് എന്നും മറ്റുമുള്ള പരാമര്ശങ്ങള്ക്കു ഒരു വിശദീകരണം ആവശ്യമാണെന്ന് കരുതുന്നു. എസ്എന് ട്രസ്റ്റ് എന്ന പേരില് പ്രസിദ്ധമായിട്ടുള്ള സ്ഥാപനം ആര്. ശങ്കര് സ്ഥാപിച്ചതും ഇപ്പോള് വെള്ളാപ്പള്ളി നടേശന്റെ നേതൃത്വത്തില് നടന്നുവരുന്നതുമാണ്. കൊല്ലം എസ്എന്ഡിപി യോഗത്തിന്റേതെന്ന പേരില് അറിയപ്പെടുന്ന വിദ്യാഭ്യാസസ്ഥാപനങ്ങള് ഈ ട്രസ്റ്റിന്റെ കീഴിലാണ് പ്രവര്ത്തിക്കുന്നത്.
ശിവഗിരിമഠം ശ്രീനാരായണ ധര്മ്മസംഘം ട്രസ്റ്റിന്റെ കീഴിലാണ് പ്രവര്ത്തിക്കുന്നത്. ഇതിലെ അംഗങ്ങള് സന്യാസിമാര് മാത്രമാണ്. ഇതിന്റെ സ്ഥാപകന് ഗുരുതന്നെയാണ്. ഈ ട്രസ്റ്റിന്റെ അദ്ധ്യക്ഷനാണ് മഠത്തിന്റെ അദ്ധ്യക്ഷന്.
ആരംഭകാലത്ത് അദ്ധ്യക്ഷന്റെ ഔദ്യോഗികനാമം മഠാധിപതി എന്നായിരുന്നു. കോടതിവഴിയുള്ള ചില വ്യവഹാരങ്ങള്ക്കുശേഷം അതു പ്രസിഡന്റ് എന്നു രൂപാന്തരം പ്രാപിക്കുകയുണ്ടായി.
അവസാനത്തെ മഠാധിപതി ഗുരുവിന്റെ നേരിട്ടുള്ള ശിഷ്യനും സമാധിസ്ഥനുമായ ശങ്കരാനന്ദസ്വാമികളാണ്. ഇപ്പോഴുള്ളത് പ്രസിഡന്റാണ്. എസ്എന്ട്രസ്റ്റും എസ്എന്ഡിഎസ്സ് ട്രസ്റ്റും തമ്മില് തിരിച്ചറിയാതെപോയതു തിരുത്തുവാനാണ് ഈ കുറിപ്പെഴുതിയത്.
കെ.എന്.രവീന്ദ്രനാഥ്
കറുകച്ചാല്
