ചെങ്ങന്നൂര്‍: തദ്ദേശസ്വയംഭരണ സ്ഥാപനങ്ങളിലേക്ക് തെരഞ്ഞെടുപ്പിന് കേളി കൊട്ടുയര്‍ന്നിരിക്കെ ഇരുമുന്നണികളും ബിജെപിയും പടപ്പുറപ്പാടിന് തയ്യാറായി കഴിഞ്ഞു. സമരങ്ങളും പ്രാദേശിക യോഗങ്ങളും നടത്തി അണികളെ കര്‍മനിരതരാക്കി നിര്‍ത്തിയിരിക്കുകയാണ് മുന്നണികള്‍.
കഴിഞ്ഞ അഞ്ചുവര്‍ഷം യുഡിഎഫ് ഭരിച്ചിരുന്ന ചെങ്ങന്നൂര്‍ നഗരസഭയില്‍ നാല് തവണയാണ് ചെയര്‍പേഴ്‌സണ്‍ സ്ഥാനം മാറിയത്. ഇതു മൂലം വികസനം നടന്നിട്ടില്ലെന്നു തന്നെയാണ് പൊതുജനങ്ങളുടെ വിലയിരുത്തല്‍.
ധാരണയുടെ അടിസ്ഥാനത്തില്‍ കോണ്‍ഗ്രസ് (ഐ)യുടെയും, മാണി വിഭാഗത്തിലേയും അംഗങ്ങളാണ് ചെയര്‍പേഴ്‌സണ്‍ സ്ഥാനം വഹിച്ചത്. സ്ഥാനത്തെച്ചൊല്ലി ഇരുകൂട്ടരും തമ്മിലുളള പടലപിണക്കങ്ങള്‍ വികസനത്തെപ്പോലും പിന്നോട്ട് തള്ളുകയാണ് ചെയ്തത്. ഇവരുടെ എല്ലാ ബജറ്റുകളിലും നിരവധി പ്രഖ്യാപനങ്ങള്‍ ഉള്‍പ്പെടുത്താറുണ്ടെങ്കിലും ഇവയൊന്നും പ്രാബല്യത്തില്‍ വരാറില്ല.
അതില്‍ പ്രധാനപ്പെട്ടത് പൊതു ശ്മശാനം യാഥാര്‍ത്ഥ്യമാക്കും എന്നതാണ്. എന്നാല്‍ നാളിതുവരെ പ്രരംഭ നടപടികള്‍ പോലും ആരംഭിക്കാന്‍ കഴിഞ്ഞില്ല. ഇതുമൂലം അടക്കാന്‍ സ്ഥലമില്ലാത്തതിനാല്‍ പട്ടികജാതിയില്‍പ്പെട്ട ആളുടെ മൃതദേഹം റോഡില്‍ സംസ്‌ക്കരിക്കേണ്ട ഗതികേടും ഈ നഗരസഭാ പരിധിയില്‍ തന്നെയാണെന്നുളളത്.
വാഗ്ദാന ലംഘനങ്ങളുടെ നേര്‍ക്കാഴ്ചയാണ് നഗരസഭയിലെ പല പ്രഖ്യാപനങ്ങളും. നഗരത്തില്‍ നേരിടുന്ന ശുദ്ധജലക്ഷാമം, തകര്‍ന്ന റോഡുകള്‍, തെളിയാത്ത തെരുവുവിളക്കുകള്‍, പെരുങ്കുളം പാടശേഖരത്തെ മാലിന്യ നിക്ഷേപം, മാലിന്യ സംസ്‌ക്കരണ പ്ലാന്റ, ശബരിമല മുന്നൊരുക്കങ്ങളില്‍ തുടരുന്ന അനാസ്ഥ എന്നിവ ഇവയില്‍ ചിലതുമാത്രം. തെരഞ്ഞെടുപ്പ് തീയതി പ്രഖ്യാപിച്ച് ദിവസങ്ങള്‍ പിന്നിട്ടും സ്ഥാനാര്‍ത്ഥികളെ നിശ്ചയിക്കാന്‍ ഘടകക്ഷികള്‍ തമ്മിലുളള തര്‍ക്കം മൂലം യുഡിഎഫിന് ആയിട്ടില്ല. എല്‍ഡിഎഫിന്റെയും സ്ഥിതി മറിച്ചല്ല.
എന്നാല്‍ ഇതില്‍ നിന്നെല്ലാം വിത്യസ്ഥമായിരിക്കുകയാണ് ബിജെപി. എല്ലാ വാര്‍ഡുകളിലും ബിജെപി സ്ഥാനാര്‍ത്ഥികളെ നിശ്ചയിക്കുകയും, ഇവര്‍ പ്രാരംഭ നടപടികള്‍ ആരംഭിക്കുകയും ചെയ്തു. കഴിഞ്ഞ തെരെ ഞ്ഞെടുപ്പില്‍ ബിജെപിക്ക് ഒരംഗം മാത്രമായിരുന്നു നഗരസഭയില്‍ ഉണ്ടായിരുന്നത്. എന്നാല്‍ പിന്നീട് മുന്‍ചെയര്‍പേഴ്‌സണും നിലവില്‍ സ്വതന്ത്ര സ്ഥാനാര്‍ത്ഥിയായി വിജയിച്ച് യുഡിഎഫിനെ പിന്‍തുണക്കുകയും ചെയ്ത ശ്രീദേവി ബാലക്യഷ്ണന്‍ പാര്‍ട്ടിയുമായി പിണങ്ങി ബിജെപിയില്‍ ചേരുകയും ചെയ്തതോടെ അംഗങ്ങളുടെ എണ്ണം രണ്ടായി.
യുഡിഎഫിന്റെ ഔദ്യോഗിക സ്ഥാനാര്‍ത്ഥിയായി ശ്രീദേവിക്കെതിരെ തെരഞ്ഞെടുപ്പില്‍ മത്സരിച്ച കോണ്‍ഗ്രസ്സിലെ ഓമന നായര്‍ ബിജെപിയില്‍ അംഗമായതും യുഡിഎഫിന് കനത്തതിരിച്ചടിയാണ് നല്‍കിയത്. 27 അംഗ കൗണ്‍സിലില്‍ ബിജെപി-2, യുഡിഎഫ്-14, എല്‍ഡിഎഫ്-10, സ്വതന്ത്രര്‍-1 എന്നിങ്ങനെയാണ് കക്ഷിനില.
