പത്തനാപുരം: കേരളത്തില് ഗ്രാമപഞ്ചായത്ത് തെരഞ്ഞെടുപ്പുകളുടെ പ്രഖ്യാപനം നടക്കാനുള്ള ഒരുക്കത്തിലാണ്. എന്നാല് അതിനും മുന്പായി ലോകത്തിലെ ആദ്യ സാങ്കല്പ്പിക പഞ്ചായത്ത് ഗാന്ധിഭവന് സ്നേഹഗ്രാമം പഞ്ചായത്തില് തെരഞ്ഞെടുപ്പ് നടന്നു. ഭരണസമിതിയുടെ കാലാവധി ഒരു വര്ഷമാണ്. ആയിരത്തിഒരുന്നൂറിലധികം അഗതികള് വസിക്കുന്ന ഗാന്ധിഭവനില് 812 പേര്ക്കാണ് വോട്ടവകാശം. ബാക്കിയുള്ളവര് കിടപ്പുരോഗികളും കുട്ടികളുമാണ്. ഒന്പത് വാര്ഡുകളിലായി ആകെ പതിനേഴ് സ്ഥാനാര്ത്ഥികളാണ് മത്സരിച്ചത്.
കോട്ടയത്ത് പത്രപ്രവര്ത്തകനായിരുന്ന വി. ഗാനപ്രിയന് എട്ടു വാര്ഡുകളിലും സ്വതന്ത്രനായി മത്സരിച്ചു. ഒരിടത്തുമാത്രം ജയിച്ചു. മക്കളില്ലാത്ത അദ്ദേഹത്തിന്റെ ഭാര്യ മരണപ്പെടും മുന്പ് സ്വത്തുക്കള് സഹോദരിയുടെ മകന്റെ പേരില് അവര് എഴുതിവച്ചു. അതോടെ നിരാശനായ 80 കാരന് 8 വര്ഷം മുന്പ് ഗാന്ധിഭവനില് അഭയം തേടിയെത്തി. 88 ശതമാനം വോട്ടിംഗ് നടന്നു. 108 വയസ്സുള്ള ഇബ്രാഹിംകുട്ടിയും 99 വയസ്സുള്ള മന്ന നാരായണനും ഉള്പ്പെടെയുള്ളവര് നീണ്ട ക്യൂവില് നിന്നു വോട്ടു ചെയ്യുവാന് കാണിച്ച അവേശം ശ്രദ്ധേയമായി. കഴിഞ്ഞ തെരഞ്ഞെടുപ്പുകളില് ഗാന്ധിഭവന് അന്തേവാസികളായിരുന്ന മുന് എംഎല്എ എം.കെ.ദിവാകരന്, മുന് ഗ്രാമപഞ്ചായത്ത് അംഗങ്ങളായിരുന്ന പെരുമ്പുഴ ചെല്ലപ്പന്, ദിവാകരന്, ആദ്യകാല നടി പാലാ തങ്കം എന്നിവരും ഭ രണാധികാരികളായിരുന്നു.
വിജയിച്ച ജനകീയ മുന്നണിക്ക് നേതൃത്വം നല്കുന്ന വിജയലക്ഷ്മി ഇത് നാലാം തവണയാണ് തെരഞ്ഞെടുക്കപ്പെട്ടത്. കഴിഞ്ഞ മൂന്നു വര്ഷമായി ഈ പഞ്ചായത്തിന്റെ പ്രസിഡന്റായി തുടരുകയാണ്. 90 ശതമാനം ശാരീരിക വൈകല്യമുള്ള തൃശൂരിലെ വിഷ്ണു, സ്വത്തുക്കള് മക്കളിലെത്തിയപ്പോള് ഉപേക്ഷിക്കപ്പെട്ട ഇടുക്കിയിലെ പങ്കജാക്ഷിയമ്മ, കോഴിക്കോട്ടെ നിര്മ്മല രാധാകൃഷ്ണന്, കോട്ടയം സ്വദേശി ജയജിത്ത്, കരുനാഗപ്പള്ളിയിലെ പ്രസന്ന, തിരുവനന്തപുരത്തെ ചിത്ര, കന്യാകുമാരിയിലെ റഹിയാനത്ത് എന്നിവരാണ് വിജയിച്ച മറ്റ് അംഗങ്ങള്.
അംഗങ്ങളില് നിന്നും പ്രസിഡന്റായി വീണ്ടും തെരഞ്ഞെടുക്കപ്പെട്ട മറുനാടന് മലയാളിയായ വിജയലക്ഷ്മി ഭര്തൃപീഡനം സഹിക്കാനാവാതെ ആറുവര്ഷം മുമ്പാണ് ഗാന്ധിഭവനിലെത്തിയത്. വൈസ്പ്രസിഡന്റായി ജയജിത്തിനെയും, ക്ഷേമകാര്യ ചെയര്പേഴ്സണായി പ്രസന്നയേയും തെരഞ്ഞെടുത്തു. നാളെ ഗാന്ധിജയന്തി ദിനത്തിലാണ് ഭാരവാഹികളുടെ സ്ഥാനാരോഹണം.
