കൊട്ടാരക്കര: പെരുംകുളം സ്കൂളിന് സമീപം റോഡിന്റെ ഇരുവശങ്ങളും സ്വകാര്യവ്യക്തികള് മതില്കെട്ടി തിരിച്ചപ്പോള് സ്കൂള് കുട്ടികള്ക്കും കാല്നടയാത്രികര്ക്കും വാഹനങ്ങള്ക്കും കടന്നു പോകാനാവാത്തവിധം റോഡില് വെള്ളക്കെട്ടായി. പൂവറ്റൂര്-കൊട്ടാരക്കര റോഡില് പെരുങ്കുളം പിവി ഹൈസ്കൂളിന് സമീപമാണ് റോഡ് തോടായത്. നാട്ടുകാര് പരാതിപ്പെട്ടിട്ടും പൊതുമരാമത്ത് അധികൃതര്ക്ക് അനക്കമില്ല. സ്കൂള് കുട്ടികളുടെ അവസ്ഥയാണു ഏറെ കഷ്ടം. യൂണിഫോം നനയാതെയും ചെളിവെള്ളത്തില് കുളിക്കാതെയും സ്കൂളിലേക്കും തിരികെ വീട്ടിലേക്കും പോകാന് കഴിയാത്ത അവസ്ഥയാണ്. ശക്തമായ മഴപെയ്യുന്ന ദിവസം യാത്ര ചെയ്യാന് കഴിയില്ല. എംഎല്എ ഉള്പ്പടെയുള്ളവര് വസ്തു ഉടമകളോടു സംസാരിച്ചിട്ടും റോഡിലെ വെള്ളക്കെട്ട് ഒഴിവാക്കാന് നടപടിയില്ല.
റോഡിന്റെ ഇടതുവശത്ത് താഴ്ചയിലുള്ള ഏലായിലേക്കാണ് മഴവെള്ളം ഒഴുകിയിരുന്നത്. ഇവിടെ കലുങ്കും ഉണ്ടായിരുന്നു. വസ്തുഉടമ റോഡരികില് മതില്കെട്ടുകയും വസ്തു മണ്ണിട്ടുയര്ത്തുകയും ചെയ്തതോടെ വെള്ളം ഒഴുകിപ്പോകാന് ഇടമില്ലാതായി. വെള്ളക്കെട്ടില് വീഴാതെ കടന്നുപോകാന് ചെറിയ നടവഴി പോലും ഇവിടെയില്ല. മതില്കെട്ടുന്ന വേളയില് തന്നെ നാട്ടുകാര് പൊതുമരാമത്ത് ഉദ്യോഗസ്ഥരെ വിവരം അറിയിച്ചിരുന്നു. ഉദ്യോഗസ്ഥരുടെ നിസംഗത റോഡിലൂടെ കടന്നു പോകുന്നവര്ക്കെല്ലാം ദുരിതയാത്ര സമ്മാനിക്കുന്നു.
അടിയന്തര നടപടിയുണ്ടായില്ലെങ്കില് റോഡുപരോധമുള്പ്പടെയുള്ള സമരത്തിനു തയ്യാറെടുക്കുകയാണ് നാട്ടുകാര്. വെള്ളക്കെട്ട് ഒഴിവാക്കിയില്ലങ്കില് കോടികള് ചെലവഴിച്ചു മികച്ച ഗുണനിലവാരത്തില് പുനര്നിര്മ്മിച്ച റോഡിന്റെ തകര്ച്ചയ്ക്കും വെള്ളക്കെട്ട് കാരണമാകുന്നു.
