കൊല്ലം: കഴിഞ്ഞദിവസം പീരങ്കി മൈതാനത്ത് ബിജെപി സംഘടിപ്പിച്ച നവോത്ഥാന സംഗമത്തില് വിറളി പൂണ്ട് സിപിഎം നേതൃത്വം. ഇന്നലെ കൊല്ലത്ത് എസ്എഫ്ഐ ക്രിമിനലുകളെ അഴിച്ച്വിട്ട് സിപിഎം കലാപത്തിന് ശ്രമിച്ചു.
എസ്എന് കോളേജിലെ നാല്പതോളം വരുന്ന എസ്എഫ്ഐ ക്രിമിനലുകളാണ് നഗരത്തില് പട്ടാപകല് അക്രമണം നടത്തി ഭീകാരന്തരീക്ഷം സൃഷ്ടിച്ചത്.
കഴിഞ്ഞദിവസം എസ്എന് കോളേജിനുള്ളിലുള്ള കൊടിമരം നശിപ്പിച്ചുവെന്നാരോപിച്ച് നടത്തിയ പ്രകടനത്തിനിടെയാണ് പ്രവര്ത്തകരായ ക്രിമിനല്സംഘം അക്രമണം നടത്തിയത്. രാവിലെ കോളേജിന് മുന്നില് നിന്നുമാരംഭിച്ച പ്രകടനം കടന്നു വന്ന വഴികളിലെ സംഘപരിവാര് സംഘടനകളുടെ കൊടിതോരണങ്ങളും ഫഌക്സ് ബോര്ഡുകളും തകര്ത്തു. കൊല്ലം പുതിയകാവ് ക്ഷേത്രത്തിന് മുന്നില് സ്ഥാപിച്ചിരുന്ന ഹിന്ദുഐക്യവേദി സംസ്ഥാന ജനറല് സെക്രട്ടറി കെ.പി.ശശികലടീച്ചറുടെ ചിത്രം ആലേഖനം ചെയ്തിരുന്ന ഫഌക്സ് ബോര്ഡുകള് തകര്ത്ത അക്രമിസംഘം തൊട്ടടുത്ത് സ്ഥാപിച്ചിരുന്ന കൊടിമരത്തിലെ കൊടിയും നശിപ്പിച്ചു. പോലീസ് ഇടപെട്ടെങ്കിലും അക്രമം തുടരാന് ശ്രമിച്ച എസ്എഫ്ഐ പ്രവര്ത്തകരെ പോലീസ് വിരട്ടിയോടിച്ചു. ചിതറിയോടിയ പ്രവര്ത്തകര് കൂട്ടമായെത്തി റെയില്വേ സ്റ്റേഷന് മുന്നിലുള്ള റോഡ് ഉപരോധിച്ചു. തുടര്ന്ന് പോലീസ് ഇവരോട് പിരിഞ്ഞ പോകണമെന്ന് ആവശ്യപ്പെട്ടു. ഇല്ലെങ്കില് അറസ്റ്റ് ചെയ്യുമെന്നറിയിച്ചതോടെ എസ്എഫ്ഐ ക്രിമിനല് സംഘം പിന്തിരിയുകയായിരുന്നു. അക്രമം നടത്തിയ രണ്ടുപേരെ അപ്പോള് തന്നെ ഈസ്റ്റ് പോലീസ് അറസ്റ്റ് ചെയ്തു. എസ്എന് കേളേജിനുള്ളില് എസ്എഫ്ഐ വളര്ത്തുന്ന ഈ ക്രിമിനല് സംഘത്തിനെതിരെ അമ്പതോളം കേസുകളാണ് വിവിധ സ്റ്റേഷനുകളില് രജിസ്റ്റര് ചെയ്തിരിക്കുന്നത്. ഈ സംഘം ഇന്നലെ നടത്തിയ അക്രമത്തില് പോലീസ് ശക്തമായ നടപടി സ്വീകരിച്ചതുകൊണ്ടാണ് നഗരത്തില് വന്സംഘര്ഷം ഒഴിവായത്. സംഭവം ഗൗരവത്തോടെയാണ് രഹസ്യാേന്വഷണ വിഭാഗം നോക്കികാണുന്നത്. എസ്എന് കോളേജിലെ നിരന്തരം ക്രമിനലുകളായ പത്തോളം പേര്ക്കെതിരെ 107 വകുപ്പ് പോലീസ് ചാര്ജ്ജ് ചെയ്തിരുന്നു. കോളേജിനുള്ളില് മയക്കുമരുന്നും, കഞ്ചാവും, മദ്യവും ഉപയോഗിക്കുന്ന ഈ സംഘത്തിന് സഹായം ചെയ്യുന്നത് കോളേജ് പ്രിന്സിപ്പാള് ഉള്പ്പെടുന്ന സംഘമാണെന്ന ആരോപണം ശക്തമാണ്. കഴിഞ്ഞ രണ്ട് വര്ഷമായി കോളേജിന്റെ സ്ഥാപനങ്ങളും ഈ സംഘങ്ങള് അക്രമിച്ചിരുന്നു. എന്നിട്ടും ഇവര്ക്കെതിരെ നടപടി സ്വീകരിക്കുവാന് പ്രിന്സിപ്പാളിന് കഴിഞ്ഞിട്ടില്ല. സംഭവത്തില് ബിജെപി ദക്ഷിണമേഖലാ ജനറല് സെക്രട്ടറി എംഎസ് ശ്യാംകുമാര് പ്രതിഷേധിച്ചു.
