പെഷവാര്‍: പാക്കിസ്ഥാനിലെ പെഷവാറിലുള്ള വ്യോമസേനാ താവളത്തില്‍ താലിബാന്റെ ഭീകരാക്രമണത്തില്‍ 42 പേര്‍ കൊല്ലപ്പെട്ടു.30 പേര്‍ക്ക് പരിക്കേറ്റു. കൊല്ലപ്പെട്ടവരില്‍ 13 പേര്‍ ആക്രമണം നടത്തിയ ഭീകരരാണ്. സേനാ താവളത്തിനുള്ളിലെ മുസ്ലിം പള്ളിയില്‍ വെള്ളിയാഴ്ച പ്രാര്‍ത്ഥനയ്‌ക്കെത്തിയവരാണ് കൊല്ലപ്പെട്ടവരിലധികവും. പരിക്കേറ്റവരില്‍ പലരുടേയും നില ഗുരുതരമാണ്. തെഹ്‌രീക് ഇ താലിബാന്‍ പാക്കിസ്ഥാന്‍ (ടിടിപി) ആക്രമണത്തിന്റെ ഉത്തരവാദിത്തം ഏറ്റിട്ടുണ്ട്.
പെഷവാറിലെ ബാഡാബേര്‍ വ്യോമ സേനാ താവളത്തിലായിരുന്നു താലിബാന്‍ ഭീകരരുടെ ആക്രമണം. എകെ 47തോക്കുകള്‍, ഗ്രനേഡുകള്‍, മറ്റു സ്‌ഫോടക വസ്തുക്കള്‍ എന്നിവ നിറച്ച ജാക്കറ്റ് ധരിച്ച ഭീകരര്‍ സേനാ താവളത്തിലേക്ക് ഇരച്ചുകയറുകയായിരുന്നു. സുരക്ഷാ ഉദ്യോഗസ്ഥര്‍ക്കു തടയാനാവും മുമ്പേ അവര്‍ അകത്തു കടന്നു. ഇവിടുത്തെ പള്ളിയില്‍ പ്രാര്‍ത്ഥനയ്‌ക്കു വന്നവരാണ് ഭീകരാക്രമണത്തില്‍ കൊല്ലപ്പെട്ടത്. സുരക്ഷാ സൈനികരുടെ തിരിച്ചടിയില്‍ 13 ഭീകരരും കൊല്ലപ്പെട്ടുവെന്ന് പാക് സൈനിക വക്താവ് മേജര്‍ ജനറല്‍ അസിം ബാജ്‌വ ട്വിറ്ററില്‍ അറിയിച്ചു.
ഭീകരര്‍ രണ്ടു വഴിയിലൂടെയാണ് അകത്തു കടന്നത്. അവര്‍ ഒന്നിച്ചു വന്ന് രണ്ടായി തിരിഞ്ഞ് പാക് സേനയോട് ഏറ്റുമുട്ടി. 22 പേര്‍ക്ക് സാരമായ പരിക്കു പറ്റി. അവരില്‍ എട്ടുപേര്‍ പാക് പട്ടാളക്കാരാണ്, രണ്ട് മുതിര്‍ന്ന സൈനികോദ്യോഗസ്ഥരുമുണ്ട്. പരിക്കേറ്റവരെ ആശുപത്രിയിലാക്കി.
