കോഴിക്കോട്: കേന്ദ്ര വനംപരിസ്ഥിതി മന്ത്രാലയത്തിന്റെ ദേശീയപരിസ്ഥിതി ബോധവല്ക്കരണ പരിപാടിയുടെ ഭാഗമായി കാളാണ്ടിതാഴം ദര്ശനം സാംസ്കാരികവേദി ചെലവൂര് വിരുപ്പില് കാവില്ലത്ത് അയ്യപ്പന്കാവിന് ജൈവവേലി നിര്മ്മിച്ചു.
മലബാര് ബോട്ടാണിക്കല് ഗാര്ഡന് ആന്റ് ഇന്സ്റ്റിറ്റിയൂട്ട് ഫോര് പ്ലാന്റ് സയന്സസ്സ് നിര്ദ്ദേശിച്ച 16 ഇനം തൈകള് ഉപയോഗിച്ചുള്ള ജൈവവേലി നിര്മ്മാണം സംസ്ഥാന സര്ക്കാറിന്റെ കാവ് സംരക്ഷണ വിദഗ്ധസമിതി അംഗം പ്രൊഫ.ടി.ശോഭീന്ദ്രന് ഉദ്ഘാടനം ചെയ്തു.
രാമകൃഷ്ണമിഷന് സ്കൂളിലെ പൃഥ്വി പരിസ്ഥിതി കൂട്ടായ്മയിലെ കുട്ടികളും പരിസ്ഥിതി പ്രവര്ത്തകരും ചേര്ന്നാണ് ജൈവവേലി നിര്മ്മാണം പൂര്ത്തിയാക്കിയത്. ഔഷധവൃക്ഷമായ വെള്ളമന്ദാരം പ്രൊഫ.ശോഭീന്ദ്രന് കാവില് നട്ടുപിടിപ്പിച്ചു.
പാറക്കല്ലും വെട്ടുകല്ലും മണലും ഉപയോഗിച്ച് വലിയ മതിലുകള് നിര്മ്മിക്കുമ്പോള് ഉണ്ടാകുന്ന പരിസ്ഥിതി നാശം കുറയ്ക്കാന് ജൈവവേലി ഉപകരിക്കും. കാവ് സംരക്ഷിക്കപ്പെടും എന്നതിനാല് അതിനൊപ്പം ഔഷധവൃക്ഷങ്ങളും നിലനില്ക്കും. മണ്ണിന്റെ ജൈവഘടന സംരക്ഷിക്കപ്പെടുകയും ചെയ്യും. ദര്ശനം ഗ്രന്ഥശാല പ്രസിഡണ്ട് അ.വിഷ്ണുനമ്പൂതിരി അദ്ധ്യക്ഷത വഹിച്ചു. ചെലവൂര് ശ്രീ കരുമകന് കാവ് പ്രസിഡണ്ട് ചെറോട്ട് ഗോപാലന്നായര്, കെ.ജി. രഞ്ജിത്ത് രാജ്, കെ.പി. ജഗന്നാഥന്, കെ. മനുരാജ്, കെ.എന്.ഗോപാലന്കുട്ടി നായര്, പി. ഗോപിനാഥമേനോന്, ദര്ശനം ജനറല് സെക്രട്ടറി കെ.കെ.സുകുമാരന് എന്നിവര് നേതൃത്വം നല്കി.
വിരുപ്പില് കാവില്ലത്ത് അയ്യപ്പന്കാവിലെ ജൈവവേലി നിര്മ്മാണം വെള്ളമന്ദാരം
നട്ട് പ്രൊഫ.ശോഭീന്ദ്രന് ഉദ്ഘാടനം ചെയ്യുന്നു.
