പൈപ്പ് പൊട്ടി ജലവിതരണം നിലച്ചു

ചങ്ങനാശ്ശേരി: ചെറുകരകുന്നിലെ പ്രധാന ശുദ്ധജല വിതരണ കുഴല്‍പ്പൊട്ടി. ഞായറാഴ്ച വെളുപ്പിനെയാണ് കുഴല്‍ പൊട്ടിയത്. രണ്ടുമാസം മുന്‍പും ഇതുപോലെ വിതരണകുഴല്‍പൊട്ടി ജലവിതരണം നടത്താന്‍ കഴിയാതെ വന്നിരുന്നു. 40 വര്‍ഷം പഴക്കമുള്ള 700 എംഎം പ്രീമോ പൈപ്പാണ് ഇവിടെ ഉള്ളത്. കാലപ്പഴക്കവും കുഴലിലെ ജലത്തിന്റെ സമ്മര്‍ദ്ദവും മൂലമാണ് കുഴല്‍പൊട്ടുന്നത്. ആറുമാസം മുന്‍പ് പഴയ പ്രിമോ പൈപ്പ് മാറ്റി കാസ്റ്റ് അയണ്‍ പൈപ്പ് ഇടുന്നതിനുള്ള നടപടികള്‍ പുരോഗമിച്ചിരുന്നു. എന്നാല്‍ കഴിഞ്ഞ ആഴ്ച പണികള്‍ ചെയ്യുന്നതിനുള്ള നിരക്കുകള്‍ പുതുക്കിയിരുന്നു. അതിനാല്‍ പുതിയ നിരക്കിലുള്ള തുകവച്ച് ടെന്‍ഡര്‍ വിളിക്കുന്നതിനാല്‍ പണികള്‍ വീണ്ടും നീളും. നഗരത്തിന്റെ പ്രധാന ആവശ്യമെന്ന നിലയില്‍ അടിയന്തിര പ്രാധാന്യത്തോടെ നടപടികള്‍ സ്വീകരിച്ചില്ലെങ്കില്‍ നഗരത്തില്‍ ജലവിതരണം തടസ്സപ്പെടുകയും ജനങ്ങള്‍ വലിയ ബുദ്ധിമുട്ടിലാകുകയും ചെയ്യും. മന്ത്രിതലത്തില്‍ വേണ്ട നടപടികള്‍ സ്വീകരിച്ച് പ്രശ്‌നത്തിനു പരിഹാരം കാണാനുള്ള നടപടികളുമായി ജനപ്രതിനിധികള്‍ മുന്നോട്ടുവരണമെന്ന് നാട്ടുകാര്‍ ആവശ്യപ്പെട്ടു.