കൊല്ലം: ദശാബ്ദങ്ങളുടെ കാത്തിരിപ്പിന് വിരാമമിട്ട് ഉത്സവാന്തരീക്ഷത്തില് സൈറണ് മുഴക്കി മുഖ്യമന്ത്രി ഉമ്മന്ചാണ്ടി പുനലൂര് പേപ്പര് മില്ല് നാടിന് സമര്പ്പിച്ചു. പുനലൂരിന്റെ പെരുമയിലേക്കുള്ള തിരിച്ചുവരവാണ് പുനലൂര് പേപ്പര്മില്ലിന്റെ ഉദ്ഘാടനത്തോടെ സാധ്യമാവുന്നതെന്ന് മുഖ്യമന്ത്രി പറഞ്ഞു. കൂട്ടായ്മയുടെ വിജയം, നാട് ആഗ്രഹിച്ചതെന്തോ അത് യാഥാര്ത്യമായെന്ന് മുഖ്യമന്ത്രി പറഞ്ഞു.
പുനലൂര് പേപ്പര് മില്ലിന്റെ ഭൂമിയില് താമസിക്കുന്നവരുടെ പ്രശ്നങ്ങള് മാനേജ്മെന്റും ജനപ്രതിനിധികളുമായുള്ള കൂടിയാലോചനയിലൂടെ എത്രയും പെട്ടെന്ന് പരിഹരിക്കുമെന്ന് മുഖ്യമന്ത്രി പറഞ്ഞു. പുനലൂര് തൂക്കുപാലവും നവീകരിച്ച് നാടിന് സമര്പ്പിക്കും. ഇത് നാടിന്റെ മറ്റൊരു ആഘോഷമായിരിക്കുമെന്നും മുഖ്യമന്ത്രി കൂട്ടിച്ചേര്ത്തു.
മന്ത്രി അടൂര്പ്രകാശ് അധ്യക്ഷത വഹിച്ചു. മന്ത്രി ഷിബു ബേബിജോണ്, എംപിമാരായ എന്.കെ.പ്രേമചന്ദ്രന്, കൊടിക്കുന്നില് സുരേഷ്, കെ.എന്.ബാലഗോപാല്, കെ.രാജു എംഎല്എ, ജില്ലാ പഞ്ചായത്ത് പ്രസിഡന്റ് എസ്.ജയമോഹന്, പുനലൂര് മുനിസിപ്പല് ചെയര്പേഴ്സണ് രാധാമണി വിജയാനന്ദ്, ജില്ലാ കളക്ടര് എ.ഷൈനാമോള്, എന് പീതാംബരക്കുറുപ്പ്, പി.എസ് സുപാല്, എ.യൂനുസ്കുഞ്ഞ് തുടങ്ങിയവര് പങ്കെടുത്തു. പേപ്പര്മില്ല് ചെയര്മാന് ടി.കെ.സുന്ദരേശന് റിപ്പോര്ട്ട് അവതരിപ്പിച്ചു. ഡയറക്ടര് നെല്സണ് സെബാസ്റ്റ്യന് സ്വാഗതവും അജയ് സുന്ദരേശ് നന്ദിയും പറഞ്ഞു.
