ദുബായ്: ഇന്ത്യന് ടെസ്റ്റ് ക്രിക്കറ്റ് ടീം ക്യാപ്റ്റന് വിരാട് കോഹ്ലി ടെന്നീസ് ഇതിഹാസം സ്വിറ്റ്സര്ലന്ഡിന്റെ റോജര് ഫെഡറര് ബോസ്. ഇന്റര്നാഷണല് പ്രീമിയര് ടെന്നീസ് ലീഗില് റോജര് ഫെഡററുടെ ടീമായ യുഎഇ റോയല്സിന്റെ സഹഉടമസ്ഥാവകാശം നേടിയതോടെയാണ് രണ്ട് സൂപ്പര് താരസംഗമത്തിന് വഴിയൊരുങ്ങിയത്. ഡിസംബര് രണ്ടു മുതല് 20 വരെയാണ് ഐപിടിഎല്.
ടെന്നീസിന്റെ വലിയ ആരാധകനാണ് ഞാന്. ആ സ്നേഹമാണ് ഇത്തവണ ടീമിന്റെ ഉടമസ്ഥരിലൊരാളാവാനുള്ള പ്രചോദനം. ഫെഡററെ ഇതുവരെയായി രണ്ട് തവണ മാത്രമേ കാണാനായിട്ടുള്ളു. ഫെഡറര് കൂടി ചേരുന്നതോടെ യുഎഇ റോയല്സ് ഇത്തവണ ഏറെ മുന്നേറും ടീമിനെ പ്രഖ്യാപിച്ചുകൊണ്ട് വിരാട് കോഹ്ലി അറിയിച്ചു. ഇന്ത്യന് ക്രിക്കറ്റ് ടീം ഡയറക്ടര് രവിശാസ്ത്രിയും ചടങ്ങില് സംബന്ധിച്ചു. ശാസ്ത്രി ടീമിന്റെ ഉപദേശകനും മാര്ഗദര്ശിയുമാണ്.
2001ലെ വിംബിള്ഡണ് ചാമ്പ്യന് ഗൊരാന് ഇവാനിസെവിച്ച്, 2008ലെ വനിതാ വിഭാഗം ഫ്രഞ്ച് ഓപ്പണ് ചാമ്പ്യന് അന്ന ഇവാനോവിച്ച്, 2014ലെ യുഎസ് ഓപ്പണ് ജേതാവ് മാരിന് സിലിച്ച്, ചെക്ക് റിപ്പബ്ലിക്കിന്റെ തോമസ് ബര്ഡിച്ച്, കനേഡിയന് താരം ഡാനിയേല് നെസ്റ്റര്, ഫ്രഞ്ച് താരം ക്രിസ്റ്റിന മഡനോവിച്ച് എന്നിവരാണ് ഫെഡറര്ക്കൊപ്പം യുഎഇ റോയല്സ് ടീമിലുള്ളത്. ഫെഡറര് ആദ്യ സീസണില് ഇന്ത്യന് എയ്സിലായിരുന്നു കളിച്ചിരുന്നത്. കഴിഞ്ഞ വര്ഷം ടീമിന്റെ ഐക്കണ് താരമായിരുന്ന നൊവാക്ക് ദ്യോക്കോവിച്ച് ഇത്തവണ സിംഗപ്പൂര് സ്ലാമ്മേഴ്സിനൊപ്പമാണ്.
നേരത്തെ ഇന്ത്യന് സൂപ്പര് ലീഗ് ഫുട്ബോളില് എഫ്സി ഗോവയിലും കോഹ്ലി ഉടമസ്ഥാവകാശം സ്വന്തമാക്കിയിരുന്നു.
രണ്ടാം സീസണില് അഞ്ച് ടീമുകളാണ് മത്സരിക്കുക. കോഹ്ലിയുടെ ടീമിന് പുറമെ ജപ്പാന് വാരിയേഴ്സ്, ഇന്ത്യന് എയ്സസ്, ഫിലിപ്പൈന് മാവെറിക്സ്, സിംഗപ്പൂര് സ്ലാമേഴ്സ് എന്നിവയാണ് മറ്റ് ടീമുകള്. ഇതില് ജപ്പാന് വാരിയേഴ്സ് ആദ്യമായാണ് ലീഗിലെത്തുന്നത്.
