ഫ്രാങ്ക്ഫര്ട്ട്: അടുത്തവര്ഷം ഫ്രാന്സില് നടക്കുന്ന യൂറോ 2016ന്റെ യോഗ്യതാ മത്സരത്തില് ഇന്ന് ലോകചാമ്പ്യന്മാരായ ജര്മ്മനിക്ക് കനത്ത വെല്ലുവിളി. ഗ്രൂപ്പ് ഡിയില് നടക്കുന്ന മത്സരത്തില് പോളണ്ടാണ് എതിരാളികള്. ഫ്രാങ്ക്ഫര്ട്ടിലാണ് മത്സരം. ഗ്രൂപ്പില് 6 കളികളില് നിന്ന് 14 പോയിന്റുള്ള പോളണ്ട് ഒന്നാമത്. 13 പോയിന്റുള്ള ജര്മ്മനി രണ്ടാം സ്ഥാനത്ത്. ഇന്ന് ജയിക്കുന്ന ടീം ഏറെക്കുറെ യോഗ്യത ഉറപ്പാക്കുകയും ചെയ്യും.
ബാസ്റ്റിയന് ഷ്വയ്ന്സ്റ്റീഗര് ക്യാപ്റ്റനായ ജര്മ്മന്നിര താരനിബിഡമാണ്. മരിയോ ഗോട്സെ, തോമസ് മുള്ളര്, ടോണി ക്രൂസ്, മാര്ക്കോ റയസ്, ആന്ദ്രെ ഷറ്ള്, മെസ്യൂട്ട് ഓസില് തുടങ്ങിയവരടങ്ങിയ മധ്യ-മുന്നേറ്റനിര പോളണ്ടിനേക്കാള് മികച്ചതാണ്. ബൊറൂസിയ ഡോര്ട്ട്മുണ്ടിന്റെ സൂപ്പര്താരം റോബര്ട്ടോ ലെവന്ഡോവ്സ്കിയാണ് പോളിഷ് പടയുടെ നായകന്. അവസാനം ഇരുടീമുകളും ഏറ്റുമുട്ടിയപ്പോള് പോളണ്ട് 2-0ന് വിജയിച്ചിരുന്നു. കഴിഞ്ഞ വര്ഷം ഒക്ടോബര് 12നായിരുന്നു മത്സരം.
ഈ വിജയം നല്കുന്ന ആത്മവിശ്വാസവുമായാണ് പോളണ്ട് ഇന്ന് ലോകചാമ്പ്യന്മാര്ക്കെതിരെ ഇറങ്ങുന്നത്. ഇന്ന് വിജയിച്ചാല് ജര്മ്മനിക്ക് ഗ്രൂപ്പില് ഒന്നാം സ്ഥാനത്തേക്കുയരാന് കഴിയും. എന്നാല് കഴിഞ്ഞ ലോകകപ്പിനുശേഷം പ്രതീക്ഷക്കൊത്ത പ്രകടനം പുറത്തെടുക്കാന് ജര്മ്മന് ടാങ്കുകള് കഴിഞ്ഞിട്ടില്ല. ഗ്രൂപ്പിലെ മറ്റ് മത്സരങ്ങളില് ജോര്ജിയ സ്കോട്ട്ലന്റുമായും ജിബ്രാള്ട്ടര് അയര്ലന്ഡുമായും ഏറ്റുമുട്ടും. ആറ് മത്സരങ്ങളില് നിന്ന് 11 പോയിന്റുള്ള സ്കോട്ട്ലന്ഡ് ഗ്രൂപ്പില് മൂന്നാമതാണ്. നാലാംസ്ഥാനത്തുള്ള അയര്ലന്ഡിന് 9 പോയിന്റാണുള്ളത്. മൂന്ന് പോയിന്റുള്ള ജോര്ജിയയും പോയിന്റൊന്നുമില്ലാത്ത ജിബ്രാള്ട്ടറും യോഗ്യത നേടില്ലെന്ന് ഏറെക്കുറെ ഉറപ്പായിക്കഴിഞ്ഞു.
ഗ്രൂപ്പ് എഫില് 6 കളികളില് നിന്ന് 14 പോയിന്റുമായി ഒന്നാം സ്ഥാനത്തുള്ള റുമാനിയക്ക് എതിരാളികള് കരുത്തരായ ഹംഗറി. 11 പോയിന്റുള്ള ഹംഗറി ഗ്രൂപ്പില് മൂന്നാമതാണ്. 13 പോയിന്റുമായി രണ്ടാം സ്ഥാനത്തുള്ള വടക്കന് അയര്ലന്ഡ് എവേ മത്സരത്തില് ഫറോ ദ്വീപുകളുമായി ഏറ്റുമുട്ടും. മുന് ചാമ്പ്യന്മാരും ഇത്തവണ യോഗ്യത നേടില്ലെന്ന് ഏറെക്കുറെ ഉറപ്പായിക്കഴിയുകയും ചെയ്ത ഗ്രീസ് ഫിന്ലാന്ഡുമായും കളിക്കും.
ഗ്രൂപ്പ് ഐയില് നടക്കുന്ന കളിയില് 10 പോയിന്റുമായി രണ്ടാം സ്ഥാനത്തുള്ള ഡെന്മാര്ക്കിന് അത്രതന്നെ പോയിന്റുമായി മൂന്നാം സ്ഥാനത്തുള്ള അല്ബേനിയയാണ് എതിരാളികള്. അപ്രസക്തമായ മറ്റൊരു മത്സരത്തില് സെര്ബിയയും അര്മേനിയയും തമ്മില് കളിക്കും.
ഇന്ന് നടക്കുന്ന സൗഹൃദ അന്താരാഷ്ട്ര മത്സരത്തില് പോര്ച്ചുഗല് യൂറോ 2016ന്റെ ആതിഥേയരായ ഫ്രാന്സുമായും കളിക്കും.
