ദക്ഷിണാഫ്രിക്ക കറങ്ങി വീണു

കൃഷ്ണഗിരി: ആദ്യ മത്സരത്തിലെ തെറ്റ് ഇന്ത്യ എ ആവര്‍ത്തിച്ചില്ല. നിലയുറപ്പിക്കാന്‍ അനുവദിക്കാതെ ദക്ഷിണാഫ്രിക്ക എയെ ആദ്യ ദിനം തന്നെ കൂടാരം കയറ്റി ഇന്ത്യന്‍ സ്പിന്നര്‍മാര്‍. ഇടംകൈയന്‍ സ്പിന്നര്‍ അക്ഷര്‍ പട്ടേലും ഓഫ്‌സ്പിന്നര്‍ ജയന്ത് യാദവും ലെഗ് സ്പിന്നര്‍ കരണ്‍ ശര്‍മയും കൃഷ്ണഗിരിയിലെ കളിത്തട്ട് ഉഴുതുമറിച്ചപ്പോള്‍ ദക്ഷിണാഫ്രിക്കന്‍ യുവനിര 260ന് പുറത്ത്. ഓപ്പണര്‍ സ്റ്റിയാന്‍ വാന്‍ സിലിന്റെ (96) മികവ് അവരെ അല്‍പ്പമെങ്കിലും തുണച്ചു. അഞ്ചു വിക്കറ്റുമായി അക്ഷര്‍ പട്ടേല്‍ ഇന്ത്യന്‍ പോരാട്ടം നയിച്ചു.

ടോസ് നേടി ബാറ്റിങ് തുടങ്ങിയ ദക്ഷിണാഫ്രിക്കയ്‌ക്ക് ഓപ്പണര്‍മാര്‍ വാന്‍ സിലും റീസ ഹെന്റിക്‌സും (22) മികച്ച തുടക്കമേകി. ആദ്യ വിക്കറ്റില്‍ 58 റണ്‍സ് ചേര്‍ത്തു സഖ്യം. പിന്നീടെത്തിയവരും വാന്‍ സിലിന് പിന്തുണ നല്‍കിയതോടെ സ്‌കോര്‍ 200 കടന്നു. 204ല്‍ നില്‍ക്കെ ശതകത്തിന് നാലു റണ്‍ അകലെ വാന്‍ സില്‍ വീണതോടെ സന്ദര്‍ശകരുടെ പതനം തുടങ്ങി. ജയന്ത് യാദവിന്റെ പന്തില്‍ പ്രതിരോധം നഷ്ടപ്പെട്ട വാന്‍ സില്‍ ക്ലീന്‍ ബൗള്‍ഡ്. പിന്നെ തുടര്‍ച്ചയായി വിക്കറ്റുകള്‍ പൊഴിഞ്ഞു. ഒംഫിലി റമേല (30), ഗിഹാന്‍ ക്ലോയെറ്റെ (26), നായകന്‍ ഡെയ്ന്‍ വിലാസ് (24) എന്നിവരും സംഭാവന നല്‍കി. എന്നാല്‍, കഴിഞ്ഞ കളിയില്‍ സെഞ്ചുറി നേടിയ ക്വിന്റണ്‍ ഡി കോക്ക് പൂജ്യത്തിന് പുറത്ത്.

92 റണ്‍സ് വഴങ്ങി അക്ഷറിന്റെ അഞ്ചു വിക്കറ്റ് പ്രകടനം. ജയന്ത് യാദവ് മൂന്നും, കരണ്‍ ശര്‍മ രണ്ടും വിക്കറ്റെടുത്തു.

ഇന്ത്യന്‍ ടീമിലേക്കു സ്ഥാനക്കയറ്റം ലഭിച്ച കരുണ്‍ നായരില്ലാതെയാണ് ഇന്ത്യ കളത്തിലിറങ്ങിയത്. ഓള്‍റൗണ്ടര്‍ ബാബ അപരാജിത്, ഷെല്‍ഡണ്‍ ജാക്‌സണ്‍, പേസര്‍ ഷര്‍ദുല്‍ താക്കൂര്‍, കരണ്‍ ശര്‍മ എന്നിവര്‍ ടീമിലിടം നേടി. വിക്കറ്റ് കീപ്പര്‍ കൂടിയായ ജാക്‌സണെ ബാറ്റ്‌സ്മാനായാണ് ഉള്‍പ്പെടുത്തിയത്. പേസര്‍മാരായ അഭിമന്യു മിഥുനെയും, ഈശ്വര്‍ പാണ്ഡെയും ഒഴിവാക്കി. ദക്ഷിണാഫ്രിക്ക പേസര്‍ വെയ്ന്‍ പാര്‍നെലിനു പകരം ലോണ്‍വാബോ ടോട്‌സ്ബീയെ ഉള്‍പ്പെടുത്തി.

സ്‌കോര്‍ബോര്‍ഡ്

ദക്ഷിണാഫ്രിക്ക

ഒന്നാമിന്നിങ്‌സ്

റീസ ഹെന്റിക്‌സ് സി അപരാജിത് ബി അക്ഷര്‍ 22, സ്റ്റിയാന്‍ വാന്‍ സില്‍ ബി ജയന്ത് 96, ഗിഹാന്‍ ക്ലോയെറ്റെ സി വിജയ് ശങ്കര്‍ ബി ജയന്ത് 26, ഒംഫിലി റമേല സി അപരാജിത് ബി കരണ്‍ 30, തെംബ ബാവുമ സി അപരാജിത് ബി അക്ഷര്‍ 17, ക്വിന്റണ്‍ ഡി കോക്ക് സ്റ്റംപ്ഡ് അങ്കുഷ് ബി അക്ഷര്‍ 0, ഡെയ്ന്‍ വിലാസ് ബി അക്ഷര്‍ 24, ഡെയ്ന്‍ പെയ്ഡ്റ്റ് സി വിജയ് ശങ്കര്‍ ബി അക്ഷര്‍ 12, ഹാര്‍ദസ് വില്‍ജ്യോന്‍ എല്‍ബിഡബ്ല്യു ബി കരണ്‍ 0, ലോണ്‍വാബോ ടോട്‌സ്ബീ എല്‍ബിഡബ്ല്യു ബി അക്ഷര്‍ 0, ബ്യൂറന്‍ ഹെന്റിക്‌സ് നോട്ടൗട്ട് 0, എക്‌സ്ട്രാസ് 33, ആകെ 89.5 ഓവറില്‍ 260.

വിക്കറ്റ് വീഴ്ച: 1-58, 2-107, 3-185, 4-204, 5-206, 6-230, 7-255, 8-256, 9-260, 10-260.

ബൗളിങ്: ഷാര്‍ദുല്‍ താക്കൂര്‍ 10-0-35-0, വിജയ് ശങ്കര്‍ 7-3-8-0, അക്ഷര്‍ പട്ടേല്‍ 27.5-6-92-5, ജയന്ത് യാദവ് 21-5-53-3, കരണ്‍ ശര്‍മ 19-8-36-2, ബാബ അപരാജിത് 5-0-12-0.