കൊച്ചി: ജില്ലയില് പലഭാഗത്തുനിന്നും വ്യാപകമായി മില്മ പാല് മോഷ്ടിച്ചയാളെ കളമശ്ശേരി പോലീസ് അറസ്റ്റുചെയ്തു. തൃശൂര് ജില്ലയിലെ കൈപറമ്പ് ചെറുശ്ശേരി വീട്ടില് ജോമി (25)യാണ് പിടിയിലായത്. കളമശ്ശേരി സര്ക്കിള് ഇന്സ്പെക്ടര് മാര്ട്ടിന്റെ നേതൃത്വത്തില് സബ്ഇന്സ്പെക്ടര് വി.ഗോപകുമാര്, സിപിഒ ബിജു, എസ്ഐ പരീത് എന്നിവരടങ്ങുന്ന സംഘമാണ് അറസ്റ്റുചെയ്തത്. ഇയാള് ജില്ലയുടെ വിവിധ ഭാഗങ്ങളില് നിന്നും മില്മാപാല് മോഷ്ടിച്ചതായി സമ്മതിച്ചിട്ടുണ്ട്.
തുടര്ച്ചയായപാല് മോഷണത്തെതുടര്ന്ന് ഇടപ്പള്ളിയിലുള്ള മില്മയുടെ ഓഫീസില് നിന്നും സിറ്റി പോലീസ് കമ്മീഷണര്ക്കും തൃക്കാക്കര അസിസ്റ്റന്റ് പോലീസ് കമ്മീഷണ് സിജോ അലക്സാണ്ടറിനും പരാതി നല്കിയിരുന്നു. പുലര്ച്ചെ 3.30നോട് കൂടി മില്മയുടെ വിവിധ ഏജന്റുകള്ക്കായി എത്തിക്കുന്നപാല് ഇയാളുടെ കെഎല്-8 എവി 2192 എസിഇ വാനിലാണ് കടത്തിക്കൊണ്ടുപോകാറുള്ളത്.
സൗത്ത് കളമശ്ശേരിയില് മോഷണം നടത്തവെ ഇയാളുടെ ദൃശ്യങ്ങള് അടുത്തുള്ള സിസിടിവി ക്യാമറയില് പതിഞ്ഞിരുന്നു. എന്നാല് ഇയാളുടെ മുഖം വ്യക്തമായി ലഭിച്ചിരുന്നില്ല. ഇയാളുടെ വാഹനത്തിനു മുന്വശം പ്രത്യേകതരത്തിലുള്ള സ്റ്റിക്കര് പതിച്ചിരുന്നു. അത്തരത്തിലുള്ള സ്റ്റിക്കര് പതിച്ച വാഹനങ്ങള് കേന്ദ്രീകരിച്ചു നടത്തിയ അന്വേഷണത്തിലാണ് ഇയാള് പിടിയിലായത്.
ഇന്ന് പുലര്ച്ചെ 3.30 ന് പതിവുപോലെ മോഷണത്തിനായി എത്തിയ ഇയാളെ പതിയിരുന്ന പോലീസ് സംഘം അറസ്റ്റ് ചെയ്യുകയായിരുന്നു. മോഷ്ടിച്ച കവര് പാലുകള് ഇയാള് വിവിധ സ്ഥലങ്ങളില് വിറ്റഴിച്ചതായി വിവരം ലഭിച്ചിട്ടുണ്ട്.
