ചേര്ത്തല: അനധികൃത വാഹന പാര്ക്കിങും വഴിയോരവാണിഭക്കാരുടെ കടന്നുകയറ്റവും, നഗരത്തെ ശ്വാസംമുട്ടിക്കുന്നു. പട്ടണത്തിലെ തിരക്കുള്ള പാതയോരങ്ങള് വഴിയോര വാണിഭക്കാര് കയ്യേറിയതോടെ കാല് നടയാത്രപോലും ദുസഹമായി.
ദേവീക്ഷേത്രത്തിന് പുറകിലൂടെ സ്വാകാര്യ ബസ് സ്റ്റാന്ഡിലേക്കുള്ള റോഡിലും, കെഎസ്ആര്ടിസി ബസ് സ്റ്റാന്ഡ് പരിസരങ്ങളിലും, സെന്റ് മേരീസ് സ്കൂള്, മിനി സിവില്സ്റ്റേഷന് റോഡ്, മാര്ക്കറ്റ് പരിസരം എന്നിവിടങ്ങളാണ് വഴിവാണിഭക്കാര് കൈയടക്കിയത്. പാതയോരങ്ങളില് ഗതാഗത തടസം സൃഷ്ടിച്ച് നാലുചക്ര വണ്ടികളില് പച്ചക്കറി, പഴവര്ഗങ്ങള് ഉള്പ്പടെയുള്ള സാധനങ്ങളുടെ വില്പ്പന പൊടിപൊടിക്കുകയാണ്. അന്യ സംസ്ഥാനങ്ങളില് നിന്നും സമീപ ജില്ലകളില് നിന്നും തുണികളുമായി വ്യാപാരത്തിനെത്തിയ വഴിവാണിഭക്കാരും ജനത്തിരക്കേറിയ റോഡുകളുടെ ഗതാഗത തടസമുണ്ടാക്കിയാണ് കച്ചവടം നടത്തുന്നത്.
കെഎസ്ആര്ടിസി ബസ് സ്റ്റാന്ഡില് നിന്നും സ്വകാര്യ ബസ് സ്റ്റാന്ഡിലേക്കുള്ള പാതയുടെ ഓരം നിറയെ ഇത്തരക്കാര് ചേക്കേറി. ഓണക്കാലമടുത്തതോടെ കൂടുതല് കച്ചവടക്കാര് ഇവിടങ്ങളിലേക്ക് എത്തിതുടങ്ങിയിട്ടുണ്ട്. കോട്ടയം, എറണാകുളം എന്നിവിടങ്ങളില് നിന്നും വരുന്ന നൂറ്കണക്കിന് ബസുകളും, മിനി സിവില് സ്റ്റേഷന്, സബ് രജിസ്ട്രാര് ഓഫീസ്, താലൂക്ക് ഓഫീസ്, ഡിവൈഎസ്പി ഓഫീസ്, എല്ഐസി ഓഫീസ് തുടങ്ങിയ നിരവധി സര്ക്കാര് സ്ഥാപനങ്ങളും സ്വകാര്യ ,വ്യവസായ സ്ഥാപനങ്ങളും സ്ഥിതിചെയ്യുന്ന ഇവിടെ അനധികൃത പാര്ക്കിങും തെരുവു കച്ചവടക്കാരും രൂക്ഷമായ ഗതാഗത തടസം സൃഷ്ടിക്കുകയാണ് . ഓണക്കാലമായതോടെ വ്യാപാര സ്ഥാപനങ്ങളുടെ ബോര്ഡുകളും കമാനങ്ങളും അനധികൃതമായി പാതയോരങ്ങളില് സ്ഥാപിച്ചതും റോഡരുകില് പലവ്യഞ്ജന, പച്ചക്കറി സാധനങ്ങളും നിരത്തുന്നതും യാത്രക്കാര്ക്ക് ദുരിതമായി. അന്യ സംസ്ഥാനങ്ങളില് നിന്നും ചരക്ക് കയറ്റിവരുന്ന വാഹനങ്ങള് തെക്കേ അങ്ങാടി വടക്കേ അങ്ങാടി ഭാഗങ്ങളിലടക്കം അനധികൃതമായി പാര്ക്കു ചെയ്യുന്നത് മണിക്കൂറുകളോളമാണ് ഗതാഗത തടസം സൃഷ്ടിക്കുന്നത്. ഗതാഗത തടസംമൂലം യാത്രക്കാരും വ്യാപാരികളും ദുരിതമനുഭവിക്കുമ്പോള് പോലീസ് അധികാരികള് ഈഭാഗത്തേക്ക് തിരിഞ്ഞു നോക്കുന്നില്ലെന്ന ആക്ഷേപമുണ്ട്.
നഗരത്തിലെ തിരക്കേറിയ ഭാഗങ്ങളില് ഗതാഗതം നിയന്ത്രിക്കുന്നതിനായി പോലീസ് ഉദ്യോഗസ്ഥരെ നിയമിക്കണമെന്നും ഗതാഗത തടസം സൃഷ്ടിച്ചു കൊണ്ടുള്ള വഴിയോര വാണിഭം കര്ശനമായി തടയണമെന്നും ആവശ്യം ശക്തമായിട്ടുണ്ട്.
