മുഹമ്മ: മാരാരിക്കുളം മഹാദേവക്ഷേത്രത്തില് സംഘടിപ്പിച്ചിട്ടുള്ള ശ്രീമദ്ഭഗവത്ഗീത ഉപനിഷത്ത് ജ്ഞാനയജ്ഞത്തിനും മാര്ക്കണ്ഡേയപുരാണയജ്ഞത്തിനും ഒരുക്കങ്ങള് പൂര്ത്തിയായി. കോഴിക്കോട് കൊളത്തൂര് അദ്വൈതാശ്രമത്തിലെ സ്വാമി ചിദാനന്ദപുരിയാണ് ഗീതഉപനിഷത്ത് ജ്ഞാനയജ്ഞം നയിക്കുന്നത്. തൃശ്ശൂര് ചെറുവത്തേരി കിഴക്കേടത്തുമനയിലെ വിബിമാധവന് നമ്പൂതിരി മാര്ക്കണ്ഡേയപുരാണയജ്ഞംനയിക്കും. 18ന് തുടങ്ങി 26ന് സമാപിക്കും. രാവിലെ 6മുതല് 8വരെയും വൈകിട്ട് 7മുതല് 9 വരെയുമാണ് ഗീതഉപനിഷത് യജ്ഞം. മുന്കൂട്ടി പേര് രജിസ്ററര് ചെയ്യുന്നവര്ക്ക് മാത്രമാണ് പ്രവേശനം. രാവിലെ 8.30 മുതല് വൈകിട്ട് 5.30വരെയാണ് മാര്ക്കണ്ഡേയപുരാണയജ്ഞം.
പങ്കെടുക്കുന്നവര്ക്കുള്ള ഭക്ഷണം ക്ഷേത്രത്തില്നിന്നും നല്കും. 10വയസ്സുകഴിഞ്ഞ കുട്ടികള്ക്കും പങ്കെടുക്കാം. കൊച്ചുകുട്ടികളുമായി വരരുത്. മൊബൈല് ഫോണുകള്ക്കും നിരോധനമുണ്ട്. യജ്ഞവേദിയില് പ്രവേശിച്ചാല് പുറത്തിറങ്ങാനും പാടില്ല. യജ്ഞത്തിനു മുന്നോടിയായി ക്ഷേത്രത്തില് 17ന് ലക്ഷാര്ച്ചന നടക്കും. തന്ത്രിമുഖ്യന് മോനാട്ട് കൃഷ്ണന് നമ്പൂതിരിയുടെ മുഖ്യകാര്മ്മികത്ത്വത്തില് 21 പൂജാരിമാരാണ് ലക്ഷാര്ച്ചന നടത്തുന്നത്.
സ്വാമി ചിദാനന്ദപുരി ശങ്കരഭാഷ്യത്തിന് മലയാളത്തില് വ്യാഖ്യനം രചിച്ചിട്ടുണ്ട്. ഭഗവത്ഗീതയുടെ 18 അധ്യയങ്ങള് 18 പുസ്തകങ്ങളായാണ് പ്രസിദ്ധീകരിക്കുന്നത്. ഭഗവത്ഗീത നാലാം അദ്ധ്യായവും, കഠോപനിഷത്തുമാണ് സ്വാമി ചിദാനന്ദപുരി പഠിപ്പിക്കുന്നത്. ഗീത നാലാം അധ്യായം ജ്ഞാനകര്മ്മസന്യാസയോഗത്തിന്റെ ശങ്കരഭാഷ്യ മാണ് വിവരിക്കുന്നത്. മൂന്നാമത്തെ ഉപനിഷത്താണ് കഠോപനിഷത്ത്. ഇതില് നചികേതസിന് യമന് ബ്രഹ്മവിദ്യ ഉപദേശിക്കുന്നതാണ് പ്രധാനഭാഗം.
