ന്യൂദല്ഹി: രാഷ്ട്രപിതാവ് മഹാത്മാഗാന്ധിയെ വധിച്ച കേസിലെ പ്രതിക്ക് വരെ ശിക്ഷാ ഇളവ് നല്കിയിട്ടുണ്ടെന്നും മുന്പ്രധാനമന്ത്രി രാജീവ്ഗാന്ധിയെ കൊന്നകേസിലെ പ്രതിയുടെ ശിക്ഷയിലും ഇളവ് നല്കണമെന്നും തമിഴ്നാട് സര്ക്കാര് സുപ്രീംകോടതിയില്. രാജീവ്ഗാന്ധി വധക്കേസിലെ ജീവപര്യന്തം തടവിന് ശിക്ഷിക്കപ്പെട്ട പ്രതികളുടെ ശിക്ഷാ ഇളവ് സംബന്ധിച്ച് ചീഫ് ജസ്റ്റിസ് എച്ച്എല് ദത്തു അധ്യക്ഷനായ ബെഞ്ചിലായിരുന്നു തമിഴ്നാടിന്റെ ആവശ്യം.
മഹാത്മാഗാന്ധി വധക്കേസിലെ പ്രതി ഗോപാല് ഗോഡ്സെയുടെ ജീവപര്യന്തം ശിക്ഷ 16 വര്ഷത്തിന് ശേഷം അവസാനിപ്പിച്ചെന്ന് തമിഴ്നാട് കോടതിയില് ചൂണ്ടിക്കാട്ടി. രാഷ്ട്രപിതാവിനെ വധിച്ച കേസിലെ പ്രതിയെ പോലും 16വര്ഷങ്ങള്ക്ക് ശേഷം മോചിപ്പിച്ചു, തമിഴ്നാടിന്റെ അഭിഭാഷകന് രാകേഷ് ദ്വിവേദി പറഞ്ഞു.
ഗാന്ധിവധക്കേസിലാകാമെങ്കില് രാജീവ് വധക്കേസിലെന്തുകൊണ്ട് ആയിക്കൂടെന്നും കഴിഞ്ഞ 23 വര്ഷമായി പ്രതികള് ജയിലിലാണെന്നും തമിഴ്നാട് അഭിഭാഷകന് വാദിച്ചു. വധക്കേസുകളില് 16വര്ഷം ശിക്ഷ അനുഭവിച്ച എല്ലാവരേയും മോചിപ്പിക്കണമെന്നല്ല ആവശ്യം. ഈ കേസിലെ പ്രതികളെ കാലം മാറ്റിയിട്ടുണ്ട്. ഇത്തരത്തിലുള്ള മാറ്റങ്ങള് വന്നവരെ വെറുതെ വിടണം. അവരുടെ മൗലികാവകാശമല്ലേ അത്, ദ്വിവേദി പറഞ്ഞു. കോടതിയില് വാദം തിങ്കളാഴ്ചയും തുടരും.
