ഗുവാഹത്തി: ക്രാഷ് ടെസ്റ്റിംഗും പുകപരിശോധനയും ഇല്ലാതെ ചെറിയ നാലുചക്ര വാഹനങ്ങള് പുറത്തിറക്കാന് വാഹന നിര്മാതാക്കള്ക്ക് അനുമതി നല്കരുതെന്ന് ഗുവാഹത്തി ഹൈക്കോടതി കേന്ദ്ര സര്ക്കാരിനോട് ആവശ്യപ്പെട്ടു. ഭാരം കുറഞ്ഞ നാലുചക്രവാഹനങ്ങളായ ക്വാഡ്രി സൈക്കിള്സ് എം1 വിഭാഗത്തില് ഉള്പ്പെടുത്തിവേണം ഇത്തരം പരിശോധനകള് നടത്തേണ്ടത്. ഇരുചക്ര-മുച്ചക്ര വാഹനങ്ങളുടെ ഗണത്തില്പെടുത്തിയാണ് ക്വാഡ്രി സൈക്കിള്സില് ഇപ്പോള് പരിശോധന നടത്തുന്നത്. എട്ടു സീറ്റില് കൂടാത്ത വാഹനങ്ങളാണ് എം1 വിഭാഗത്തില് ഉള്പ്പെടുന്നത്.
ആക്ടിങ്ങ് ചീഫ് ജസ്റ്റിസ് കെ.ശ്രീധര് റാവു, ജസ്റ്റിസ് പി.കെ. സൈക്കിയ എന്നിവരുടേതാണ് വിധി. മുകേഷ് അഗര്വാള്, റീതദാസ് മജുംദാര് എന്നിവര് നല്കിയ പൊതുതാല്പര്യ ഹര്ജിയിലാണ് പ്രസ്തുത വിധി. ഇന്ത്യയിലെ ചെറുകാര് നിര്മാതാക്കള് സുരക്ഷാ നിലവാരങ്ങള് പാലിക്കുന്നില്ലെന്ന് വിധി ന്യായത്തില് പറയുന്നു. യൂറോപ്യന് ന്യൂകാര് അസസ്മെന്റ് പ്രോഗ്രാം ടെസ്റ്റ് കഴിഞ്ഞ വര്ഷം ഇന്ത്യന് വാഹനങ്ങളില് നടത്തിയിരുന്നു. ചെറു വാഹനങ്ങള് പുറംതള്ളുന്ന കാര്ബണിന്റെ തോത് വളരെ കൂടുതലാണെന്നും അന്തരീക്ഷ മലിനീകരണത്തിന്റെ ഒരു പ്രധാന കാരണം ഇതാണെന്നും പരാതിയുണ്ട്.
ഡ്രൈവറുടേയും യാത്രക്കാരുടേയും സുരക്ഷയ്ക്ക് ചെറുകാറുകളില് എയര്ബാഗും ആന്റിലോക് ബ്രേയ്ക് സംവിധാനവും അനിവാര്യമാണ്. 2014 നവംബറില് യൂറോപ്യന് കാര് ടെസ്റ്റില് പങ്കെടുത്ത എം1, എന്1 വിഭാഗത്തിലെ ചെറുകാറുകള്ക്ക് ടെസ്റ്റില് വിജയിക്കാനായില്ല. ക്രാഷ് ടെസ്റ്റില് ഇന്ത്യന് കാറുകള് പരാജയപ്പെട്ടു. പുറംതള്ളപ്പെടുന്ന കാര്ബണ്ഡൈഓക്സൈഡിന്റെ തോതും വളരെ കൂടുതലായിരുന്നു. ക്രാഷ് ടെസ്റ്റ്, കാല്നടയാത്രക്കാരന്റെ സംരക്ഷണം എന്നിവ 2017 ഒക്ടോബര് മുതലുള്ള ടെസ്റ്റുകള്ക്ക് നിര്ബന്ധമാക്കിയിട്ടുണ്ട്. എയര്ബാഗുകളും ആന്റിലോക് ബ്രേയ്ക് സംവിധാനവും ചെറുകാറുകള്ക്ക് നിര്ബന്ധിതമാക്കണമെന്നും ഹൈക്കോടതി ചൂണ്ടിക്കാട്ടി.
