ഉഫ (റഷ്യ): ഒരു പരിഗണനയും നല്കാതെ, ഭീകരവാദത്തിനെതിരേ യോജിച്ച പോരാട്ടം നടത്താന് പ്രധാനമന്ത്രി നരേന്ദ്ര മോദി ബ്രിക്സ് ഉച്ചകോടിയില് ആഹ്വാനം ചെയ്തു. യുഎന് ഉപരോധ സമിതിയില്, മുംബൈ ഭീകരാക്രമണത്തിന്റെ മുഖ്യ ആസൂത്രകന് സഖി ഉര് റഹ്മാന് ലഖ്വി വിഷയത്തില്, പാക്കിസ്ഥാന് അനുകൂല നിലപാടെടുത്ത ചൈനക്കുള്ള പരസ്യ വിമര്ശനംകൂടിയായി ഈ ആഹ്വാനം.
കഴിഞ്ഞ ദിവസം ചൈനാ പ്രസിഡന്റ് സീ ജിന് പിങ്ങുമായി നടത്തിയ കൂടിക്കാഴ്ചയിലും മോദി ഈ വിഷയത്തില് ഭാരതത്തിന്റെ പ്രതിഷേധം അറിയിച്ചിരുന്നു. അതിനിടെ, ഉച്ചകോടിയ്ക്കിടെ പാക് പ്രധാനമന്ത്രി നവാസ് ഷെരീഫുമായി പ്രധാനമന്ത്രി മോദി ഇന്ന് കൂടിക്കാഴ്ച നടത്തുമെന്ന് വിദേശകാര്യ വകുപ്പ് ഔദ്യോഗികമായി അറിയിച്ചു. പ്രധാനമന്ത്രി ഇന്നലെ, ഇറാന് പ്രസിഡന്റ് ഹസന് റൂഹാനിയുമായി കൂടിക്കാഴ്ച നടത്തി.
ഭീകരപ്രവര്ത്തനം ആരുചെയ്യുന്നു, ആര് സഹായവും സംരക്ഷണവും നല്കുന്നു, ഏതു ഗ്രൂപ്പു ചെയ്യുന്നു, ആരെ ബാധിക്കുന്നുവെന്നും മറ്റുമുള്ള ഒരു പരിഗണനയുമില്ലാതെ ഭീകരതയ്ക്കെതിരേ ഒന്നിച്ചു പോരാടണം. സാമാധാനവും സ്ഥിരതയുമാണ് സാമൂഹ്യ-സാമ്പത്തിക പുരോഗതിയുടെ അടിത്തറ. ഭീകരത ഉയര്ത്തുന്ന വെല്ലുവിളികളെ നേരിടുക നമ്മുടെ കൂട്ടായ ഉത്തരവദിത്തമാണ്, മോദി പറഞ്ഞു. ഇത് നമ്മള് ബ്രിക്സില് മാത്രമല്ല, ഐക്യരാഷ്ട്ര സുരക്ഷാ സമിതിയിലും മറ്റ് രാജ്യാന്തര വേദികളിലും തുടരണം.
അന്താരാഷ്ട്ര നിയമങ്ങളും ധാരണകളും എല്ലാവരും പാലിക്കണമെന്നു പറഞ്ഞ മോദി, ആനുകാലിക സ്ഥിതിക്കനുസരിച്ച് യു എന്നില് പരിഷ്കാരങ്ങള് നടപ്പാക്കണമെന്നു പറഞ്ഞു. 21-ാം നൂറ്റാണ്ടില് അതിനു പ്രസക്തി വേണമെങ്കില് പരിഷ്കാരങ്ങള് വരുത്തണം. ഏതു സാമൂഹ്യ, സാമ്പത്തിക മാറ്റങ്ങള്ക്കും യുഎന് സുരക്ഷാ സമിതിയില് പരിഷ്കാരം കൊണ്ടുവരണം.
ഫ്രാന്സില് യുഎന് നേതൃത്വത്തില്, 75-ാം വാര്ഷികത്തില് നടക്കാന് പോകുന്ന, കാലാവസ്ഥാ വ്യതിയാന ഉച്ചകോടിയില് ചില കര്ശന നിലപാടുകള് കൈക്കൊള്ളണമെന്ന് അഭിപ്രായപ്പെട്ടു. ഈ മേഖലയില് ബ്രിക്സിന് നിര്ണ്ണായക പങ്കുണ്ടെന്ന് അദ്ദേഹം ചൂണ്ടിക്കാട്ടി. അംഗരാജ്യങ്ങള് തമ്മിലുള്ള സമവായവും സഹകരണവും സംയുക്തനപടികളും വഴി ആഗോള വെല്ലുവിളികള് നേരിടാനാകുമെന്ന് അദ്ദേഹം ചൂണ്ടിക്കാട്ടി.
