ഏതന്സ്: കടക്കെണിയിലായ ഗ്രീസ് യൂറോപ്യന് യൂണിയനില് നിന്ന് പുറത്താകാനുള്ള സാധ്യത വര്ധിച്ചു. അന്താരാഷ്ട്ര നാണയ നിധിയില് നിന്ന് കടമെടുത്ത 160 കോടി രൂപ തിരിച്ചടയ്ക്കുന്നതിന് യൂറോപ്യന് യൂണിയന് ഗ്രീസിന് അനുവദിച്ച സമയപരിധി അവസാനിച്ചതോടെയാണ് ഗ്രീസ് യൂറോപ്യന് യൂണിയനില് നിന്ന് പുറത്താകാനുള്ള സാധ്യത വര്ധിച്ചത്.
സാമ്പത്തിക പ്രതിസന്ധി രൂക്ഷമായതിനെ തുടര്ന്ന് അന്താരാഷ്ട്രനാണയ നിധിയില് നിന്നെടുത്ത കടം തിരിച്ചടയക്കുന്നതിന് യൂറോപ്യന് യൂണിയന് ഗ്രീസിനനുവദിച്ചിരുന്ന സമയപരിധി ചൊവ്വാഴ്ചയാണ് അവസാനിച്ചത്. കടം തിരിച്ചടയക്കുന്നതിന് കൂടുതല് സമയം അനുവദിക്കണമെന്ന ഗ്രീസിന്റെ അഭ്യര്ഥന അന്താരാഷ്ട്രനാണയ നിധിയും യൂറോപ്യന് യൂണിയനും തള്ളിയിരുന്നു. ഉടനടി കടം മടക്കി നല്കാനാകില്ലെന്ന് ഗ്രീസ് ഇന്നലെ ഔദ്യോഗികമായി പ്രഖ്യപിച്ചു.
ഇതേ തുടര്ന്ന് യൂറോപ്യന് യൂണിയന് അംഗരാജ്യങ്ങളിലെ ധനമന്ത്രിമാരുടെ യോഗം സ്ഥിതിഗതികള് വിലയിരുത്തി.കടം തിരിച്ചടയ്ക്കുന്നത് സംബന്ധിച്ച് യൂറോപ്യന് യൂണിയന് ചിലനിര്ദ്ദേശങ്ങള് മുന്നോട്ട് വച്ചിട്ടുണ്ട്. അതേ സമയം യൂറോപ്യന് യൂണിയന്റെ ഉപാധികള് ഞായറാഴ്ച നടക്കാനിരിക്കുന്ന ഹിതപരിശോധനയില് തള്ളണമെന്ന് പ്രധാനമന്ത്രി അലക്സി സിപ്രാസ് ജനങ്ങളോട് ആവശ്യപ്പെട്ടു. അല്ലാത്ത പക്ഷം പദവി ഒഴിയുമെന്നും അലക്സി സിപ്രാസ് മുന്നറിയിപ്പ് നല്കി.
കടുത്ത സാമ്പത്തിക പ്രതിസന്ധിയെ തുടര്ന്ന് ഗ്രീസില് ഭാഗിക സാമ്പത്തിക അടിയന്തരാവസ്ഥ പ്രഖ്യാപിച്ചിരിക്കുകയാണ്. ബാങ്കുകള് ഒരാഴ്ചത്തേക്ക് അടച്ചിടാനും നിര്ദേശമുണ്ട്. ഗ്രീസിന്റെ സാമ്പത്തിക തകര്ച്ച ലോകമെമ്പാടുമുള്ള ഓഹരിവിപണികളെ സാരമായി ബാധിച്ചിരുന്നു.
