അന്റോഫഗസ്ത (ചിലി): ആദ്യ മത്സരത്തില് അര്ജന്റീനയെ സമനിലയില് പിടിച്ചതിന്റെ ആത്മവിശ്വാസത്തില് കളത്തിലിറങ്ങിയ പരാഗ്വെ ഇന്നലെ വിജയം കരസ്ഥമാക്കി. കോപ്പ അമേരിക്കയില് ഗ്രൂപ്പ് ബിയില് നടന്ന പോരാട്ടത്തില് റാങ്കിങ്ങില് തങ്ങളേക്കാള് ഏറെ മുന്നിലുള്ള ജമൈക്കയെ 1-0നാണ് പരാഗെ പരാജയപ്പെടുത്തിയത്. ജമൈക്ക പ്രതിരോധത്തിന് ഊന്നല് നല്കിയപ്പോള് പരാഗ്വെ ആക്രമണ ഫുട്ബോളാണ് കാഴ്ചവെച്ചത്. ഇതോടെ കളി പലപ്പോഴും വിരസമാവുകയും ചെയ്തു.
ഇരുടീമുകളും ഒപ്പത്തിനൊപ്പം നിന്ന മത്സരത്തില് ജമൈക്കന് ഗോളി ഡ്വെയ്ന് കീറിന്റെ പിഴവിലൂടെയാണ് ഗോള് പിറന്നത്. ജമൈക്കന് ഗോള് മുഖത്തെ ലക്ഷ്യമാക്കി വിക്ടര് കതേറസ് പായിച്ച ലോംഗ് റേഞ്ച് ഷോട്ട് ജമൈക്കന് ഗോളി ഡ്വയ്ന് കെര് പെനാല്റ്റി ബോക്സിനു വെളിയിലെത്തി തട്ടിയകറ്റി. എന്നാല് ഒഴിഞ്ഞുനിന്ന എഡ്ഗാര് ബെനിറ്റെസിന്റെ കാലുകളിലേക്കാണു ഗോളി തട്ടിയകറ്റിയ പന്ത് എത്തിയത്. ബെനിറ്റെസിന്റെ ശക്തികുറഞ്ഞ ഇടംകാലടിയില് പന്ത് ജമൈക്കന് ഗോളിയുടെ മുകളിലൂടെ വലയുടെ നടുവില് വിശ്രമിച്ചു. പിന്നീട് ജമൈക്ക ആക്രമണം വര്ധിപ്പിച്ചെങ്കിലും ഒന്നും വലകുലുക്കാന് പര്യാപ്തമായിരുന്നില്ല. തോല്വിയോടെ ജമൈക്കയുടെ ക്വാര്ട്ടര് പ്രതീക്ഷകള് അസ്തമിച്ചു. കളിച്ച രണ്ട് മത്സരങ്ങളിലും പരാജയപ്പെട്ട ജമൈക്ക പോയിന്റൊന്നുമില്ലാതെ നാലാം സ്ഥാനത്താണ്.
ഫിഫ റാങ്കിംഗില് 65-ാം റാങ്കുകാരായ ജമൈക്കക്കെതിരെ 85-ാം റാങ്കുകാരായ പാരെഗ്വ മികച്ച കളിയാണ് പുറത്തെടുത്തത്. കളിയില് പന്ത് കൂടുതല് സമയം കൈവശംവച്ചതുമാത്രമല്ല, കൂടുതല് ഷോട്ടുകള് പായിച്ചതും പരാഗ്വെ താരങ്ങളാണ്. അവര് പായിച്ച 15 ഷോട്ടുകളില് അഞ്ചെണ്ണം ലക്ഷ്യത്തിലേക്ക് നീങ്ങിയെങ്കിലും ഒരെണ്ണം മാത്രമാണ് വലയില് കയറിയത്. അതേസമയം ജമൈക്കക്ക് ഒരിക്കല് മാത്രമാണ് പരാഗ്വെ ഗോളിയെ പരീക്ഷിക്കാന് കഴിഞ്ഞത്. ഗോള്കീപ്പര് ഡ്വെയ്ന് കീര് ജമൈക്കന് വന്മതിലായി നിലയുറപ്പിച്ചപ്പോള് പാരഗ്വെയുടെ മിക്ക ഷോട്ടുകളും പരാജയപ്പെടുകയായിരുന്നു.
പരാഗ്വെയുടെ റോക്കി സാന്റാ ക്രൂസും ഒര്ട്ടിഗോസയും ബെനിറ്റെസും കളം നിറഞ്ഞുകളിച്ചു. മികച്ച ഒത്തിണക്കത്തോടെ മധ്യനിരയും മുന്നേറ്റനിരയും അരങ്ങുവാണപ്പോള് ജമൈക്കന് പ്രതിരോധം അങ്കലാപ്പിലായി. പ്രതിരോധം പൊളിഞ്ഞപ്പോഴൊക്കെ ഗോളി പരാഗ്വെന് മുന്നേറ്റനിരക്ക് മുന്നില് വിലങ്ങുതടിയായി. ആദ്യപകുതിയില് സാന്റാക്രൂസിന്റെയും ഗൊണ്സാലസിന്റെയും ബോബാഡിയയുടെയും വാല്ഡസിന്റെയും ഷോട്ടുകള് ജമൈക്കന് ഗോള്മുഖത്ത് പരിഭ്രാന്തി പരത്തിയെങ്കിലും കാര്യമുണ്ടായില്ല.
അതേസമയം ജമൈക്കക്ക് ആസൂത്രിതമായ മികച്ച നീക്കങ്ങളൊന്നും എതിര്പോസ്റ്റിലേക്ക് നടത്താനുമായില്ല. ആദ്യപകുതിയില് ഒരിക്കല് പോലും പരാഗ്വെ ഗോളിയെ പരീക്ഷിക്കാന് അവര്ക്ക് ജമൈക്കന് സ്ട്രൈക്കര്മാര്ക്ക് കഴിഞ്ഞതുമില്ല.
രണ്ടാം പകുതിയിലും പരാഗ്വെയുടെ മുന്നേറ്റമായിരുന്നു. നാല്പ്പത്തിയേഴാം മിനിറ്റില് കാസരസ് ജമൈക്കന് വലയില് പന്ത് എത്തിച്ചുവെങ്കിലും അതിന് മുന്പ് തന്നെ ലൈന് റഫറിയുടെ ഓഫ് സൈഡ് കൊടി ഉയര്ന്നു. 59-ാം മിനിറ്റില് സമുദിയോയുടെ കനത്ത ഷോട്ടിന് വിലങ്ങുതടിയായത് ക്രോസ് ബാറും. ഇടയ്ക്കുള്ള ജമൈക്കന് മുന്നേറ്റങ്ങളോരോന്നും ലക്ഷ്യബോധമില്ലാത്തതായിരുന്നു. കളിയുടെ അവസാന മിനിറ്റുകളില് ജമൈക്ക താളം വീണ്ടെടുത്ത് പരാഗ്വെ ബോക്സിലേക്ക് ചില മുന്നേറ്റങ്ങള് നടത്തിയെങ്കിലും സമനില ഗോള് വിട്ടുനിന്നു.
