ടിന്റുവിന്റെ കാത്തിരിപ്പ് സഫലമായി

ഒടുവില്‍ ടിന്റുവിന്റെയും പി.ടി. ഉഷയുടെയും കാത്തിരിപ്പ് സഫലമായി. ഒപ്പം രാജ്യത്തിന്റെയും. രാജ്യാന്തര മീറ്റില്‍ തന്റെ ഇഷ്ടയിനമായ 800 മീറ്ററില്‍ ആദ്യമായി സ്വര്‍ണ്ണം നേടിയാണ് ടിന്റു വിമര്‍ശകരുടെ വായയടപ്പിച്ചത്. വുഹാനില്‍ നടന്ന ഇരുപത്തിയൊന്നാമത് ഏഷ്യന്‍ അത്‌ലറ്റിക് ചാമ്പ്യന്‍ഷിപ്പിലായിരുന്നു ടിന്റു ലൂക്കയുടെ സുവര്‍ണ്ണനേട്ടം. തന്റെ ഏറ്റവും മികച്ച സമയം പുറത്തെടുക്കാന്‍ കഴിഞ്ഞില്ലെങ്കിലും തികച്ചും ആധികാരികമായിട്ടായിരുന്നു ടിന്റുവിന്റെ സ്വര്‍ണ്ണക്കുതിപ്പ്. കനത്ത മഴയില്‍ നടന്ന മത്സരത്തില്‍ രണ്ട് മിനിറ്റ് 01.53 സെക്കന്റിലാണ് ടിന്റു സ്വര്‍ണത്തിലേക്ക് ഓടിയെത്തിയത്. സീസണില്‍ ടിന്റുവിന്റെ ഏറ്റവും മികച്ച സമയമാണിത്. എന്നാല്‍ ടിന്റുവിന് ഒളിമ്പിക് യോഗ്യത നേടാന്‍ കഴിഞ്ഞില്ല.

മുന്‍പ് പല മീറ്റുകളിലും മത്സരിച്ച് സ്വര്‍ണ്ണ മെഡലിന്റെ അരികത്തുവരെ എത്തിയെങ്കിലും അവസാന നിമിഷം കൈവിട്ടുപോവുകയായിരുന്നു. 2010 ഗ്വാങ്ഷു ഏഷ്യന്‍ ഗെയിംസില്‍ ടിന്റു വെങ്കല മെഡല്‍ നേടി (2:01.36)യെങ്കിലും തന്റെ വ്യക്തിഗത സമയത്തേക്കാള്‍ വളരെ കൂടുതല്‍ ആയിരുന്നു. ഫൈനലില്‍ ടിന്റുവിന് ഉജ്ജ്വല സ്റ്റാര്‍ട്ടാണ് ലഭിച്ചത്. തുടക്കം മുതല്‍ ലീഡ് നേടിയ ടിന്റു അവസാന നാല്‍പ്പത് മീറ്റര്‍ വരെ ലീഡ് നിലനിര്‍ത്തുകയും ചെയ്തു. അവസാന നാല്‍പ്പതു മീറ്റര്‍ വരെ മീറ്ററുകള്‍ പിന്നിലായിരുന്ന മത്‌സകോയും യാന്‍ ഹാങ്ങും ടിന്റുവിനെ മൂന്നാമതാക്കി സ്വര്‍ണ്ണവും വെള്ളിയും നേടുകയും ചെയ്തു. കഴിഞ്ഞ വര്‍ഷത്തെ ഇഞ്ചിയോണ്‍ ഏഷ്യന്‍ ഗെയിംസിലും ടിന്റുവിന് 2010ലേതുപോലെ സമാനമായ പിഴവാണ് സംഭവിച്ചത്. തുടക്കത്തിലെ വേഗം അവസാന 50 മീറ്ററില്‍ നിലനിര്‍ത്താന്‍ കഴിയാതിരുന്നതാണ് താരത്തിന് തിരിച്ചടിയായത്.

2011ലെ കോബ, 2013ലെ പൂനെ ഏഷ്യന്‍ അത്‌ലറ്റിക് ചാമ്പ്യന്‍ഷിപ്പുകളിലും ടിന്റുവിന് ശോഭിക്കാന്‍ കഴിഞ്ഞിരുന്നില്ല. വെങ്കലമായിരുന്നു ഈ രണ്ട് മീറ്റുകളിലും ടിന്റുവിന് ലഭിച്ചത്. വേണ്ടത്ര അന്താരാഷ്‌ട്ര മത്സര പരിചയമില്ലാത്തതാണ് ടിന്റുവിന് പലപ്പോഴും തിരിച്ചടിയാകുന്നത്. എന്നാല്‍ വുഹാനില്‍ ടിന്റു കഴിഞ്ഞ മീറ്റുകളിലെ പ്രകടനത്തിന് പ്രായശ്ചിത്തം ചെയ്യുന്നതാണ് കണ്ടത്. 2010ലെ കോമണ്‍വെല്‍ത്ത് ചാമ്പ്യന്‍ഷിപ്പില്‍ ആറാം സ്ഥാനത്താണ് പി.ടി. ഉഷയുടെ അരുമശിഷ്യയായ ടിന്റു ഫിനിഷ് ചെയ്തത്. അവസാന 50 മീറ്ററില്‍ വേഗംനിലനിര്‍ത്താന്‍ കഴിയാതിരുന്നതാണ് അന്നും തിരിച്ചടിയായത്. 2012ലെ ലണ്ടന്‍ ഒളിമ്പിക്‌സില്‍ പങ്കെടുത്തെങ്കിലും സെമിഫൈനലില്‍ പുറത്തായി.

അതേസമയം 800 മീറ്ററിലെ ദേശീയ റെക്കോര്‍ഡ് ടിന്റുവിന്റെ പേരിലാണ്. 2010-ല്‍ ക്രൊയേഷ്യയില്‍ നടന്ന കോണ്ടിനന്റല്‍ കപ്പിലായിരുന്നു 1 മിനിറ്റ് 59.17 സെക്കന്റില്‍ ഫിനിഷ് ചെയ്ത് ഷൈനി വില്‍സന്റെ പേരിലുള്ള റെക്കോര്‍ഡ് ടിന്റു തിരുത്തിക്കുറിച്ചത്.2008-ല്‍ ജക്കാര്‍ത്തയില്‍ നടന്ന ഏഷ്യന്‍ ജൂനിയര്‍ അത്‌ലറ്റിക് മീറ്റില്‍ 800 മീറ്ററില്‍ വെള്ളിമെഡല്‍ നേടിയാണ് ടിന്റു രാജ്യാന്തരമീറ്റുകളില്‍ സജീവമായത്.

കണ്ണൂര്‍ ജില്ലയിലെ ഇരിട്ടി കരിക്കോട്ടക്കരി സ്വദേശിനിയായ ടിന്റു ലൂക്കയുടെയും ലിസ്സിയുടെയും മകളാണ്.