ശ്രീനഗര്: ഹുറിയത്ത് കോണ്ഫറന്സ് നേതക്കളായ മിര്വൈസ് മൗലവി ഫറൂഖ് അബ്ദുള് ഗനി ലോണ് എന്നിവര് കൊല്ലപ്പെട്ടതിനോടനുബന്ധിച്ച് സംസ്ഥാനത്ത് പ്രഖ്യാപിച്ച റാലിക്ക് സര്ക്കാര് അനുമതി നിഷേധിച്ചു. റാലിക്ക് ആഹ്വാനം ചെയ്ത നേതാക്കളായ മിര്വൈസ് ഉമര് ഫറൂഖ്, സെയ്ത് അലി ഗിലാനി എന്നിവരെ റാലിക്കുപുറപ്പെടുന്നതിനുമുമ്പ് വീട്ടുതടങ്കലില് വച്ചു. എന്നാല് സംസ്ഥാനത്തിന്റെ വിവിധഭാഗങ്ങളില് കടകളും സ്കൂളുകളും അടഞ്ഞുകിടന്നു. വാഹനങ്ങള് നിരത്തിലിറക്കിയില്ല. വിഘടനവാദികള് ആഹ്വാനം ചെയ്ത പ്രതിഷേധം സമാധാനപരമായിരുന്നു.
മിര്വൈസ് മൗലവി ഫറൂഖ് 1990 മെയ് 21 ന് അജ്ഞാതരായ ഒരു സംഘം ആളുകളാല് വീടിനടുത്തുവെച്ച് കൊല്ലപ്പെടുകയായിരുന്നു. ഇതിന്റെ വാര്ഷികത്തോടനുബന്ധിച്ച് 2002 മെയ് 21 ന് നടന്ന റാലിയിലാണ് വിഘടനവാദി നേതാവായ അബ്ദുള് ഗനി ലോണ് കൊല്ലപ്പെടുന്നത്. എന്നാല് ഈ രണ്ടുകൊലപാതകങ്ങളിലും ഇതുവരെയും കുറ്റവാളികളെ കണ്ടെത്താന് കഴിഞ്ഞിട്ടില്ല. ഹുറിയത്ത് കോണ്ഫറന്സ് നേതാക്കള് റാലി ആഹ്വാനം ചെയ്തതിനെത്തുടര്ന്ന് സംസ്ഥാനത്തിന്റെ വിവിധഭാഗങ്ങളില് സുരക്ഷ ശക്തമാക്കിയിരുന്നു.
