ന്യൂദല്ഹി: ദല്ഹിയിലെ ഭരണകാര്യങ്ങളില് ലഫ്. ഗവര്ണര് നജീബ് ജംഗിന്റെ ഇടപെടല് അവസാനിപ്പിക്കണമെന്ന് ആവശ്യപ്പെട്ട് മുഖ്യമന്ത്രി അരവിന്ദ് കെജ്രിവാള് പ്രധാനമന്ത്രി നരേന്ദ്രമോദിക്ക് കത്തയച്ചു. ഗവര്ണ്ണര് വഴി കേന്ദ്ര സര്ക്കാര് ദല്ഹി ഭരിക്കാന് ശ്രമിക്കുകയാണെന്നാണ് കേജ്രിവാളിന്റെ ആരോപണം.
ലഫ്. ഗവര്ണറുടെ നടപടികള് ജനാധിപത്യത്തിന് ഭൂഷണമല്ലെന്നും ഭരണത്തില് കൈകടത്തുന്ന സമീപനമാണ് അദ്ദേഹം സ്വീകരിക്കുന്നതെന്നും കത്തില് കുറ്റപ്പെടുത്തുന്നു. ഉയര്ന്ന ഉദ്യോഗസ്ഥരുടെ സ്ഥലം മാറ്റക്കാര്യത്തില് ദല്ഹി സര്ക്കാരുമായി കൂടിയാലോചിക്കുന്നില്ലെന്നും കേജ്രിവാള് കത്തില് പറയുന്നു.
ആക്ടിംഗ് ചീഫ് സെക്രട്ടറി നിയമനവുമായി ബന്ധപ്പെട്ടാണ് മുഖ്യമന്ത്രി അരവിന്ദ് കെജ്രിവാളും ലഫ്. ഗവര്ണര് നജീബ് ജംഗും തമ്മില് അഭിപ്രായഭിന്നത ഉടലെടുത്തത്. വിഷയത്തില് ലഫ്. ഗവര്ണറുടെ ഉത്തരവ് അനുസരിച്ചതിന്റെ പേരില് പ്രിന്സിപ്പല് സെക്രട്ടറിയെ കെജ്രിവാള് നീക്കിയിരുന്നു. സര്ക്കാരിന് പ്രവര്ത്തനസ്വാതന്ത്ര്യം അനുവദിക്കുന്നില്ലെന്നാണ് കെജ്രിവാളിന്റെയും ആം ആദ്മി പാര്ട്ടിയുടെയും പരാതി.
എന്നാല് ഭരണഘടനാപരമായ ഇടപെടല് മാത്രമേ നടത്തിയിട്ടുള്ളൂവെന്നാണ് ലഫ്. ഗവര്ണറുടെ മറുപടി. വിഷയത്തില് ഇന്നലെ കെജ്രിവാളും ലഫ്. ഗവര്ണറും രാഷ്ട്രപതിയുമായി കൂടിക്കാഴ്ച നടത്തിയിരുന്നു. അതിനിടെ ഉപമുഖ്യമന്ത്രി മനീഷ് സിസോദിയ ഉന്നത ഉദ്യോഗസ്ഥരുടെ യോഗം വിളിച്ചു ചേര്ത്തു. ലഫ്റ്റനന്റ് ഗവര്ണ്ണര് ഉദ്യോഗസ്ഥര്ക്ക് നേരിട്ട് ഉത്തരവു നല്കുകയാണെന്നും ഭരണത്തില് ഇടപെടുകയാണെന്നുമാണ് മനീഷ് സിസോദിയ ആരോപിക്കുന്നത്.
