ബെംഗളൂരു: വിജയയാത്ര തുടരാന് റോയല് ചലഞ്ചേഴ്സ് ബംഗളൂരുവും വിജയവഴിയിലേക്ക് തിരിച്ചെത്താന് രാജസ്ഥാന് റോയല്സും ഇന്ന് അങ്കത്തിനിറങ്ങുന്നു. കഴിഞ്ഞ 24ന് രാജസ്ഥാന് റോയല്സിനെ അവരുടെ തട്ടകത്തില് ചെന്ന് കീഴടക്കിയതിന്റെ ആത്മവിശ്വാസത്തിലാണ് കോഹ്ലിയും കൂട്ടരും ഇന്ന് ചിന്നസ്വാമി സ്റ്റേഡിയത്തില് കളിക്കാനിറങ്ങുന്നത്. രാത്രി എട്ടിന് കളി ആരംഭിക്കും.
ഐപിഎല് എട്ടാം പതിപ്പിലെ ആദ്യ കളിയില് കൊല്ക്കത്ത നൈറ്റ് റൈഡേഴ്സിനെ പരാജയപ്പെടുത്തിയാണ് തുടങ്ങിയതെങ്കിലും പിന്നീട് തുടര്ച്ചയായി മൂന്ന് മത്സരങ്ങളില് പരാജയപ്പെടാനായിരുന്നു റോയല് ചലഞ്ചേഴ്സിന്റെ വിധി. സണ്റൈസേഴ്സിനോടും മുംബൈ ഇന്ത്യന്സിനോടും ചെന്നൈ സൂപ്പര് കിംഗ്സിനോടുമായിരുന്നു അവരുടെ പരായങ്ങള്. പിന്നീട് തുടര്ച്ചയായി രണ്ട് കളികളില് വിജയിച്ചതോടെ അവര് വീണ്ടും ട്രാക്കിലായി. രാജസ്ഥാന് റോയല്സിനോടും ദല്ഹി ഡെയര് ഡെവിള്സിനോടുമായിരുന്നു വിജയങ്ങള്. ദല്ഹിയെ കഴിഞ്ഞ ദിവസം പത്ത് വിക്കറ്റിനായിരുന്നു കോഹ്ലിയും സംഘവും തകര്ത്തെറിഞ്ഞത്. മിച്ചല് സ്റ്റാര്ക്കിന്റെ തീപാറുന്ന ബൗളിംഗായിരുന്നു വിജയം സമ്മാനിച്ചത്.
ലോക ക്രിക്കറ്റിലെ സൂപ്പര്താരങ്ങളായ ക്രിസ് ഗെയില്, എ.ബി. ഡിവില്ലിയേഴ്സ്, റൊസ്സൗവ്, ദിനേശ് കാര്ത്തിക് എന്നിവര്ക്കൊപ്പം ക്യാപ്റ്റന് വിരാട് കോഹ്ലിയും ഒത്തുചേരുമ്പോള് അവരുടെ കരുത്ത് പറഞ്ഞയിക്കാന് പറ്റത്തതാണ്. എന്നാല് സ്ഥിരതയാര്ന്ന പ്രകടനം പുറത്തെടുക്കാന് കഴിയുന്നില്ല എന്നതാണ് അവരെ കുഴക്കുന്നത്. എന്നാല് കഴിഞ്ഞ ദിവസം ദല്ഹിക്കെതിരെ ക്രിസ് ഗെയില് ഫോമിലേക്ക് തിരിച്ചെത്തിയ പ്രകടനം നടത്തിയെന്നതാണ് കോഹ്ലിയുടെയും കൂട്ടരുടെയും ആത്മവിശ്വാസം ഉയര്ത്തുന്നത്.
ഓസീസ് പേസര് മിച്ചല് സ്റ്റാര്ക്ക് നയിക്കുന്ന ബൗളിംഗ് നിരയും അതിശക്തമാണ്. സ്റ്റാര്ക്കിനൊപ്പം വരുണ് ആരോണ്, സീന് അബോട്ട്, യൂസ്വേന്ദ്ര ചഹല്, ഇഖ്ബാല് അബ്ദുള്ള, ഹര്ഷല് പട്ടേല്, സര്ഫ്രാസ് ഖാന് എന്നിവര് മികച്ച രീതിയില് പന്തെറിയുന്നവരാണ്.
മറുവശത്ത് തുടര്ച്ചയായ രണ്ട് പരാജയങ്ങള്ക്കും അതിനു ശേഷം ഒരു കളി മഴ കാരണം ഉപേക്ഷിക്കുകയും ചെയ്തതിന്റെ ക്ഷീണത്തിലാണ് രാജസ്ഥാന് റോയല്സ്. കഴിഞ്ഞ ദിവസം തങ്ങളുടെ ഹോം ഗ്രൗണ്ടില് ബംഗളൂരുവിനോടേറ്റ പരാജയത്തിന് പകരംവീട്ടുക എന്ന ലക്ഷ്യത്തോടെയായിരിക്കും ഷെയ്ന് വാട്സണും കൂട്ടരും ഇന്ന് കളത്തിലിറങ്ങുന്നത്. ആദ്യ അഞ്ച് മത്സരങ്ങള് തുടര്ച്ചയായി വിജയിച്ചശേഷമാണ് രാജസ്ഥാന് റോയല്സ് ആദ്യ പരാജയം നേരിട്ടത്.
ഏപ്രില് 21ന് കിംഗ്സ് ഇലവന് പഞ്ചാബിനോടായിരുന്നു ഐപിഎല് എട്ടാം പതിപ്പിലെ ആദ്യ തോല്വി. കഴിഞ്ഞ ദിവസം കൊല്ക്കത്ത നൈറ്റ് റൈഡേഴ്സിനെതിരായ കളിയാണ് ഒരു പന്തുപോലും എറിയാന് കഴിയാതെ മഴയില് ഒലിച്ചുപോയത്. തുടക്കത്തിലെ മികവ് പുറത്തെടുക്കാന് പിന്നീട് രാജസ്ഥാന് റോയല്സ് താരങ്ങള്ക്ക് കഴിയാതിരുന്നതാണ് തിരിച്ചടിയായത്. എവിടെയോ ഒരു താളപ്പിഴ അവരുടെ നിരയില് നിഴലിക്കുന്നു.
ഇന്ത്യന് താരം അജിന്ക്യ രഹാനെക്ക് പുറമെ ഷെയ്ന് വാട്സണ്, സ്റ്റീവന് സ്മിത്ത്, സഞ്ജു വി. സാംസണ്, സ്റ്റുവര്ട്ട് ബിന്നി, ദീപ്ക് ഹൂഡ, കരുണ് നായര് തുടങ്ങി ഒരുപിടി മികച്ച താരങ്ങളാണ് അവരുടെ കരുത്ത്. ഒപ്പം ഓള് റൗണ്ടര് ജെയിംസ് ഫോക്നറും ടീമിന് മുതല്ക്കൂട്ടാണ്. ക്രിസ് മോറിസ്, ടിം സൗത്തി, ധവാല് കുല്ക്കര്ണി, പ്രവീണ് താംബെ തുടങ്ങിയ മികച്ച ബൗളര്മാരും അവര്ക്കുണ്ട്. കഴിഞ്ഞ രണ്ട് മത്സരങ്ങളില് സംഭവിച്ച പിഴവ് തിരുത്തി ഇറങ്ങിയാല് ഇന്ന് അവര്ക്ക് വീണ്ടും വിജയവഴിയില് തിരിച്ചെത്താന് കഴിയും. എന്തായാലും വിജയത്തുടര്ച്ചക്കായി റോയല് ചലഞ്ചേഴ്സ് ബംഗളൂരുവും തിരിച്ചടികള്ക്കുശേഷം വിജയവഴിയില് തിരിച്ചെത്താന് രാജസ്ഥാന് റോയല്സും ഇറങ്ങുന്നതോടെ മത്സരം ആവേശകരമായിരിക്കുമെന്ന് ഉറപ്പാണ്.
