ന്യൂദല്ഹി: ഭൂകമ്പം നാശം വിതച്ച നേപ്പാളിനു ഇന്ത്യയുടെ എല്ലാ സഹായവും വാഗ്ദാനം ചെയ്യുന്നുവെന്നു പ്രധാനമന്ത്രി നരേന്ദ്ര മോദി.
ട്വിറ്ററിലൂടെയാണ് അദ്ദേഹം ഇക്കാര്യം അറിയിച്ചത്. ഇന്നലെ ഉച്ചയോടെ നേപ്പാളിനെ തകര്ത്തെറിഞ്ഞ ഭൂകമ്പത്തില് 1800 ലധികം പേര്ക്കാണ് ജീവന് നഷ്ടമായത്. നേപ്പാളിന്റെ വേദന ഞങ്ങളെയും ദു:ഖിപ്പിക്കുന്നു പ്രധാനമന്ത്രി കുറിച്ചു.േ
നേപ്പാളിന്റെ വേദന നമ്മുടേതുകൂടിയാണ്. ഭൂകമ്പം എല്ലാവരേയും ദുഃഖത്തിലാഴിത്തി. ദുരന്തത്തിന്റെ തീവ്രത വെളിവാക്കുന്ന വിവരങ്ങള് പുറത്തുവന്നുകൊണ്ടിരിക്കുകയാണ്. കൂടുതല് വിവരങ്ങള് ശേഖരിച്ചുവരുന്നു.
നാട്ടിലും നേപ്പാളിലും ദുരന്തത്തില്പെട്ടവരെ കണ്ടെത്താന് ശ്രമങ്ങള് നടത്തിവരികയാണ്. നേപ്പാള് പ്രധാനമന്ത്രി സുശീല് കൊയ്രാളയുമായി ഫോണില് സംസാരിച്ചു. അവര്ക്ക് എല്ലാവിധ സഹായസഹകരണങ്ങളും ഉറപ്പ് നല്കിയിട്ടുണ്ട്.
അതേസമയം, രക്ഷാപ്രവര്ത്തനങ്ങള്ക്കായി ഇന്ത്യ ഒന്പത് വിമാനങ്ങള് നേപ്പാളിലേക്ക് അയച്ചിട്ടുണ്ട്. ഇന്ത്യന് വ്യോമസേനയുടെ സി-130ജെ സൂപ്പര് ഹെര്ക്കുലിസ് വിമാനം മൂന്നര ടണ് വരുന്ന ഭക്ഷണവും മരുന്നും വസ്ത്രങ്ങളുമായി നേപ്പാളിലേക്ക് പോയിട്ടുണ്ട്. ദേശീയ ദുരന്ത നിവാരണ സേനയുടെ സംഘം ഇന്നലെ വൈകുന്നേരം തന്നെ കഠ്മണ്ഡുവില് എത്തിയിട്ടുണ്ട്.
ഇതുവരെ 10 ദേശീയ ദുരന്ത നിവാരണ സേന സംഘങ്ങളാണ് നാശനഷ്ടം സംഭവിച്ചിടങ്ങളില് എത്തി രക്ഷാപ്രവര്ത്തനങ്ങള്ക്കു നേതൃത്വം നല്കുന്നത്. ഓരോ സംഘത്തിലും 45 അംഗങ്ങളെ വീതം വിന്യസിച്ചിട്ടുണ്ട്. അവശിഷ്ടങ്ങളില് കുടുങ്ങിക്കിടക്കുന്നവരെ കണ്ടെത്താന് സഹായിക്കുന്ന ലൈഫ് ഡിറ്റക്ടര് അടക്കമുള്ള അത്യാധുനിക സംവിധാനങ്ങളുമായാണ് സംഘം പ്രവര്ത്തനം നടത്തുന്നത്.
ഇന്ത്യാക്കാര്ക്ക് വേണ്ടി വിദേശകാര്യമന്ത്രാലയം 24 മണിക്കൂര് കണ്ട്രോള് റൂമും തുറന്നിട്ടുണ്ട്. നല്കിയിട്ടുള്ള ഹെല്പ്പ്ലൈന് നമ്പറില് നിന്നും കാഠ്മണ്ഡുവിലെ ഇന്ത്യന് എംബസിയുമായി ബന്ധപ്പെടാനാണ് നല്കിയിരിക്കുന്ന നിര്ദേശം.
